এনাৰ্জি লকডাউন কি? আকৌ কি লকডাউনৰ সম্ভাৱনা? হঠাৎ ইমান বছৰৰ পাছত কিয় ট্ৰেণ্ডিঙত এই শব্দ?

আমেৰিকা, ইজৰায়েল আৰু ইৰান জড়িত যুদ্ধত তৈয়াৰ হোৱা এনাৰ্জি সংকটৰ কাৰণে সমগ্ৰ বিশ্বৰ দেশসমূহে আকৌ কভিডৰ দৰেই শ্বাটডাউন দেখিব পাৰে৷ এই কথা বহুতৰে মনত৷ এনাৰ্জি লকডাউন শব্দটো ছচিয়েল মিডিয়াত খুবেই জনপ্ৰিয় হৈ পৰিছে৷ আৰু ইউজাৰসকলে ভাৱিছে চলমান সংঘাতৰ মাজত আমাৰ দেশতো এই ধৰণৰ বিধি নিষেধ আৰোপ হ’ব নেকি সন্দেহ হৈছে বহুজনৰ মনত৷

কেইবাখনো দেশে ঘোষণা কৰিছে যে নানান ধৰণৰ বিধিনিষেধ৷ যাতে ইন্ধন, গেছ আৰু বিদ্যুৎ সংৰক্ষণ যথাযথভাৱে হয়৷ বিশ্বব্যাপী তেলৰ সৰবৰাহ এতিয়াও ব্যাহত হৈয়েই আছে৷ আৰু হৰমুজ প্ৰণালীৰে জাহাজৰ অবাধ চলাচল আৰু নাই৷ যদিও ইয়াক লকডাউন বুলি কোৱা হোৱা নাই তথাপিও জনতাই বুজি উঠিছে কঠিন সময়ে যে সন্মুখত অপেক্ষা কৰিছে৷

ভাৰততো আকৌ ট্ৰেণ্ডিয় চাৰ্ছৰ তালিকাত আছে লকডাউন শব্দটো৷ কিন্তু ঠিক চাৰি বছৰ পাছত হঠাৎ কিয় আকৌ এই শব্দৰ অৱতাৰণা? বিশেষজ্ঞই কৈছে নতুনকৈ কৰ’না আতংক বা চাৰি বছৰৰ বৰ্ষপূৰ্তি নহয়, বৰং আন্তৰ্জাতিক পৰিস্থিতিত নতুনকৈ আলোচিত এই শব্দ৷ পশ্চিম এছিয়াৰ যুদ্ধ পৰিস্থিতিৰ কাৰণেই নতুনকৈ এই ভয়ংকৰ দিনসমূহৰ স্মৃতি সকলোৰে দুচকুত ভাহি উঠিছে৷ অৱৰুদ্ধ হৰমুজ প্ৰণালী আৰু যুদ্ধৰ বাবে ইন্ধন সৰবৰাহ ব্যাহত হোৱাত সংকট তৈয়াৰ হৈছে বিভিন্ন ক্ষেত্ৰত৷ ফলত বহুজনৰ মনত প্ৰশ্ন উঠিছে, এই ধৰণৰ সংকটে আকৌ লকডাউনৰ দৰে পৰিস্থিতি তৈয়াৰ কৰিব পাৰে৷ উদ্বেগ বঢ়াইছে প্ৰধানমন্ত্ৰী মোদীৰ মুখৰ কভিডকালীন প্ৰসংগইয়ো৷ কৰনাকালৰ কথা মনত পেলাই তেওঁ কৈছে, ‘আমি সকলোৱে একগোট হৈ এই ধৰণৰ পৰিস্থিতিৰ বাবে প্ৰস্তুত হৈ থকাটো প্ৰয়োজন৷ আমি ঠিক কৰ’নাকালত একলগ হোৱাৰ দৰেই একলগ হৈ থাকিব লাগিব৷!’

দেশত এলপিজি সংকটৰ পৰিস্থিতি বুজাবলৈ এই মন্তব্য কৰিছিল প্ৰধানমন্ত্ৰীয়ে৷ বহু দেশে ইতিমধ্যেই অয়েল ৰেছনিং কৰিছে৷ জাপানত ইন্ধন ৰেছনিং আছে৷ কিছু দেশত ইন্ধন ভাউছাৰ দিয়া হৈছে৷ দক্ষিণ কোৰিয়াতো ৰেছনিং আছে৷ বাংলাদেশ, ফিলিপাইন্স আৰু শ্ৰীলংকাত পেট্ৰলৰ বাবে পাম্পসমূহত দীঘল লাইন দেখা গৈছে৷ অষ্ট্ৰেলিয়া চৰকাৰে সেই দেশৰ জনগণক অহেতুক ঘূৰাফূৰা কৰাত বাধা আৰোপ কৰিছে৷ ভাৰতৰ ৮০ শতাংশ তেল আহে হৰমুজ প্ৰণালীৰ পৰা৷ পাকিস্তানত ইতিমধ্যেই অৰ্থনৈতিক সংকট আছে৷ তেলৰ অপ্ৰতুলতাই সেই সংকটত আৰু বঢ়াই দিছে৷