অসম লাইভ২৪ঃ এক শোকাৱহ পথ দুৰ্ঘটনা। নিমিষতে উকা হ’ল এখন ঘৰ৷ মাতৃয়ে হিয়া ঢাকুৰিয়াই কান্দিছে, চোতালত নিথৰ হৈ শুই আছে ভাতৃ-ভগ্নী৷ নাই মাতৃৰ কথালৈ কাণসাৰ নাই৷ নতুনকৈ অনা ঢাৰিত একেলগে চোতালত শুই আছে ভাতৃ-ভগ্নী৷ দুয়োয়ে যেন অজান মুলুকৰ পৰা পাইছিল আমন্ত্ৰণহে! দুৰ্ঘটনাত মৃত্যুৰ সাবটি লোৱাৰ কেইমানা ঘণ্টাৰ পূৰ্বে দুয়োৱে সামাজিক মাধ্যমত শ্বেয়াৰ কৰিছিল এটা ৰীল৷ ৰীলটোত অভিনয় কৰিছিল দুই ভাতৃ-ভগ্নীয়েই৷ গীতটোও আছিল হৃদয় কঁপায় যোৱা৷ ৰীলটোত থকা গীতটিত আছিল , আমি একেলগে জীয়াম, আমি একেলগে মৰিম…মাতৃয়ে হয়তো ৰীল দেখি ভৱা নাছিল, সঁচাকৈয়ে একেলগেই গুচি যাব দুই সন্তান৷
১৭ জানুৱাৰীত সুৰামত্ত চিকিৎসকৰ বাহনৰ খুন্দাত অকালতে প্ৰাণ হেৰুৱাইছে ৰঙিয়াৰ দুই ভাতৃ-ভগ্নীয়ে। ১৪ বছৰীয়া গায়ত্ৰী দাস আৰু ৮ বছৰীয়া অবিনাশ দাসে চিপছ আনিবলৈ ওলাই যাওঁতেই সংঘটিত হৈছে এই শোকাৱহ দুৰ্ঘটনা৷ জানিব পৰা মতে, কামৰূপৰ কেন্দুকোনাৰ ৩১নং ৰাষ্ট্ৰীয় ঘাইপথত সুৰাসক্ত চিকিৎসকৰ বাহনে মহটিয়াই নিছিল দুয়োকে। তাৰ পিছতে চিকিৎসাধীন হৈ আছিল যদিও অৱশেষত মৃত্যুৰ ওচৰত হাৰ মানে দুই কণমানিয়ে৷
উল্লেখ্য যে দুৰ্ঘটনা সংঘটিত কৰা সুৰামত্ত চিকিৎসকৰ নাম নগেন চন্দ্ৰ হুজুৰী বুলি জানিব পৰা গৈছে৷ ঘটনাত গুৰুতৰভাৱে আহত হৈছে আন এগৰাকী কিশোৰীৰ আইনাল হক নামৰ এগৰাকী ফেৰীৱালাও আহত হৈছে এই দুৰ্ঘটনাত।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ