অসম লাইভ২৪ঃ বন্দনাৰ অধ্যায় শেষ হোৱা নাই। দুটাকৈ হত্যাকাণ্ড সংঘটিত কৰা বন্দনাৰ এটাৰ পাছত আনটো কলা অধ্যায় পোহৰলৈ আহিছে। পৰকীয়া প্ৰেম আৰু সম্পত্তিৰ লালসাতেই কিমান নিকৃষ্ট পন্থা গ্ৰহণ কৰিছিল বন্দনাই সকলোবোৰেই পোহৰলৈ আহিছে।
প্ৰায় ৭ মাহৰ পূৰ্বে সংঘটিত এই কাণ্ড। অথচ কোনেও ভূ নাপালে এই হত্যাকাণ্ডৰ। নিজেই হত্যা কৰি বন্দনাই আৰক্ষীৰ কাষতো দিছিল মিছা অভিযোগ। নিজেই হত্যা কৰি স্বামী আৰু শাহুৱেক, হেৰোৱা বুলি এজাহাৰ দিছিল নুনমাটি থানাত।
১০ বছৰ পূৰ্বে বন্দনা বিবাহ পাশত আৱদ্ধ হৈছিল অমৰজ্যোতিৰ সৈতে। পৰিয়ালটোত মাক, অমৰজ্যোতি আৰু পত্নী বন্দনা। অমৰজ্যোতিৰ মাকৰ নামত ৫ টা ফ্লেট আছিল। ধনজিৎ নামৰ যুৱকজনৰ সৈতে সু সম্পৰ্ক আছিল বন্দনাৰ। স্বামীৰ সৈতে সম্পত্তিক লৈ আৰু আন পাৰিবাৰিক কাৰণত দুয়োৰে মাজত আছিল তীব্ৰ সংঘাত। আনকি বিবাহ বিচ্ছেদৰ প্ৰক্ৰিয়াও আৰম্ভ হৈছিল দুয়োৰে।
অৰূপ ডেকা নামৰ বন্ধু জনৰ সহযোগত তেওঁ এ এছ ০১ জে চি ৫৭৯৫ নম্বৰৰ একচেন্ট গাড়ীৰে তিনিও ফুৰিবলৈ ওলাই গ’ল শ্বিলং চেৰাপুঞ্জীৰ দিশে। লগত লৈ গ’ল দুটা টোপোলা। এটাত স্বামী অমৰজ্যোতিৰ টুকুৰা কৰা মৃতদেহ আনটোত অমৰজ্যোতিৰ মাতৃ শংকৰী দেৰ নশ্বৰ দেহ। এটা মৃতদেহ পেলাই দিলে চেৰাপুঞ্জীলৈ যোৱাৰ পথত আনটো মৃতদেহ পেলালে ডাউকী সমীপৰ দ’ খাৱৈত। তথ্য প্ৰমাণ নষ্ট কৰিবলৈ ফ্লেটৰ ওপৰৰ ছাদত বহু সামগ্ৰী জ্বলাই দিলে।
কিন্তু অপৰাধ কৰি জানো কোনো হাৰি যাব পাৰে। অৱশেষত নিজে ৰচা জালত নিজেই পৰিল বন্দনা। আৰক্ষীয়ে এতিয়া বন্দনাক লৈ মেঘালয়ৰ ডাউকিত চলাই আছে অভিযান। ১০ বছৰে সংসাৰ কৰা অমৰজ্যোতিৰ শৰীৰৰ অংশ বন্দনাৰ কথামতেই উদ্ধাৰ কৰিছে আৰক্ষীয়ে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ