সকলোবোৰ পৰিকল্পনামতেই আগুৱাইছে৷ শনিবাৰে তৃতীয়বাৰৰ বাবে প্ৰধানমন্ত্ৰী হিচাপে শপতগ্ৰহণ কৰিব নৰেন্দ্ৰ মোদীয়ে৷ এই শপতগ্ৰহণ অনুষ্ঠানত উপস্থিত থাকিব বাংলাদেশৰ প্ৰধানমন্ত্ৰী শেখ হাছিনা আৰু শ্ৰীলংকাৰ প্ৰেছিডেণ্ট ৰনিল বিক্ৰমসিংহ৷ চুূবুৰীয়া দুই দেশৰ ৰাষ্ট্ৰপ্ৰধানক ফোন কৰি শপতগ্ৰহণ অনুষ্ঠানত আমন্ত্ৰণ জনাইছে মোদীয়ে৷
প্ৰাথমিকভাৱে লাভ কৰা তথ্য অনুসৰি ভূটানৰ প্ৰধানমন্ত্ৰী শেৰিং তোবগে, নেপালৰ প্ৰধানমন্ত্ৰী পুষ্পকমল দাহাল আৰু মৰিছাচৰ প্রধানমন্ত্ৰী প্ৰবীন্দ জুহনখেও শপতগ্ৰহণ অনুষ্ঠানলৈ আমন্ত্ৰণ লাভ কৰিছে৷ পিটিআইৰ খবৰ অনুসৰি বুধবাৰে মোদীয়ে শ্ৰীলংকাৰ প্ৰেছিডেণ্টক ফোন কৰি আমন্ত্ৰণ জনাইছে৷ খবৰৰ সত্যতা স্বীকাৰ কৰি শ্ৰীলংকাৰ প্ৰেছিডেণ্টৰ সচিবালয়ে জনোৱা অনুসৰি শ্ৰীলংকাৰ প্ৰধানমন্ত্ৰীয়ে আমন্ত্ৰণ ৰক্ষা কৰি ভাৰতলৈ অহাটো প্ৰায় নিশ্চিত৷
ইফালে সূত্ৰই প্ৰকাশ কৰা মতে বুধবাৰে হাছিনাক ফোন কৰি আমন্ত্ৰণ জনাইছে মোদীয়ে৷ অন্য ৰাষ্ট্ৰপ্ৰধানৰ মাজত হাছিনাই প্ৰথম মোদীক তৃতীয়বাৰৰ বাবে পোৱা বিজয়ৰ বাবে অভিনন্দন জনাইছিল৷ বৃহস্পতিবাৰে আনুষ্ঠানিকভাৱে মোদীয়ে হাছিনাক আমন্ত্ৰণ জনাইছে৷ শনিবাৰে ভাৰতৰ মাটিত ভৰি দিব হাছিনাই৷ শনিবাৰে বিশেষ বিমানেৰে বাংলাদেশৰ পৰা মোদীক অভিনন্দন জনাবলৈকে আহিব হাছিনা৷
উল্লেখ্য যে ২০১৯ৰ শপতগ্ৰহণ অনুষ্ঠানতো বিমষ্টেক গোষ্টীৰ সদস্য দেশকেইখনক আমন্ত্ৰণ জনাইছিল মোদীয়ে৷ আমন্ত্ৰিত অতিথিৰ তালিকাত আছিল বাংলাদেশ, ভুটান, ম্যানমাৰ, নেপাল আৰু শ্ৰীলংকা, থাইলেণ্ডৰ ৰাষ্ট্ৰপ্ৰধান৷ দহ বছৰ পূৰ্বে ক্ষমতালৈ অহাৰ সময়ত প্ৰথম শপতগ্ৰহণ অনুষ্ঠানত ছাৰ্ক গোষ্ঠীৰ সদস্যসকলক আমন্ত্ৰণ জনাইছিল মোদীয়ে৷ সেইবাৰ এনডিএৰ শপত গ্ৰহণ অনুষ্ঠানত উপস্থিত হৈছিল পাকিস্থানৰ প্ৰধানমন্ত্ৰী নাৱাজ শৰিফো৷ ২০১৯ চনৰ মোদীৰ শপতগ্ৰহণ অনুষ্ঠানত শপত লৈছিল ২৪জন মন্ত্ৰী আৰু ৯ জন উপমন্ত্ৰীয়ে৷ কিন্তু এইবাৰ বিজেপিয়ে সংখ্যাগৰিষ্ঠতা লাভ কৰা নাই৷ সেয়ে মোদী মন্ত্ৰীসভাত এইবাৰ বিশেষ আদৰ সাদৰেৰে ৰাখিব লাগিব টিডিপি আৰু জেডিইউৰ দৰে দলসমূহক৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
