আইপিএলত ভাৱিব নোৱৰা সাফল্য তেওঁৰ৷ মাত্ৰ ১৫ বছৰ বয়সতে অৰেঞ্জ কেপসহ একাধিক সাফল্য লাভ কৰিছে বৈভৱ সূৰ্যবংশীয়ে৷ এইবাৰ আৰু ৰাজস্থান ৰয়েলছৰ জাৰ্ছি নহয়৷ টিম ইণ্ডিয়াৰ নীলা জাৰ্ছিত বৈভৱক দেখিব দেশৰ ক্ৰিকেট অনুৰাগীয়ে৷ সেই সপোন পূৰণ হোৱাৰ পথত নেকি? নিজৰ অৱস্থান স্পষ্ট কৰিলে বিচিচিআইয়ে৷
ৰাজস্থান ৰয়েলছে ফাইনেল খেলাৰ সুযোগ নাপালে৷ কিন্তু ট্ৰফী দিয়া অনুষ্ঠানত বৈভৱৰ দিশেই সকলোৰে নজৰ৷ পাঁচটা ব্যক্তিগত পুৰস্কাৰ লাভ কৰিছে ১৫ বছৰ বয়সীয়া বৈভৱে৷ আহমেদাবাদ নৰেন্দ্ৰ মোদী ষ্টেডিয়ামত আৰ চি বি আৰু গুজৰাট টাইটান্সৰ বিৰুদ্ধে ফাইনেল চলাৰ সময়ত বৈভৱৰ কাষতে বহি আছিল আইচিচিৰ চেয়াৰমেন জয় শ্বাহ৷ ফাইনেলৰ পাছতেই বিচিচিআইৰ সচিব দেৱজিত লন শইকীয়াক সংবাদমাধ্যমে বৈভৱৰ আন্তৰ্জাতিক অভিষেক সম্পৰ্কে প্ৰশ্ন কৰে৷
তাৰ উত্তৰত দেৱজিত লন শইকীয়াই কয়, ‘এইবাৰৰ আইপিএল খুবেই ভালকৈ পাৰ হ’ল৷ আশা কৰো সকলো সমৰ্থকেই আনন্দ কৰিছে৷ দুবাৰৰ চেম্পিয়ন হোৱাৰ বাবে আৰ চি বিক পোনতে অভিনন্দন জনাইছো৷ বৈভৱ সূৰ্যবংশী এজন ভাল খেলুৱৈ৷ তেওঁৰ উজ্জ্বল ভৱিষ্যত আছে৷ ক্ৰিকেটৰ সৰ্বোচ্চ স্তৰলৈ লৈ যোৱাৰ বাবে বিচিচিআইয়ে সকলোখিনি কৰিব৷ অৰ্থাৎ বৰ্ডৰ সচিবে এয়াই ইংগিত দিছে যে অচিৰেই বৈভৱৰ আন্তৰ্জাতিক অভিষেক হ’ব পাৰে৷
এইবাৰ কি কি পুৰস্কাৰ পালে বৈভৱে?
৭৭৬ ৰান কৰাৰ বাবে অৰেঞ্জ কেপ৷ যাৰ সৈতে আছে ১০ লাখ টকা৷
টুৰ্নামেণ্টৰ সকলোতকৈ দামী প্লেয়াৰ হিচাপে এমভিপি৷ তাৰ বাবে পাব ১৫ লাখ টকা৷
সকলোতকৈ বেছি ষ্ট্ৰাইক ৰেট-২৩৭৷ তাৰ বাবে তেওঁ পাব ১০লাখ টকা৷
সকলোতকৈ বেছি ছিক্সো তেঁৱেই কোবাইছে৷ ৭২টা ছিক্স কোবোৱাৰ বাবে তেওঁ পাব ১০লাখ টকা৷
১৫বছৰ বয়সত ভাৱিব নোৱৰা কাম কৰি দেখুৱাইছে বৈভৱে৷ সেয়ে এইবাৰ টিম ইণ্ডিয়াতো বৈভৱ সূৰ্যবংশীক দেখা পাব বুলি আশা কৰিছে ক্ৰিকেট অনুৰাগীসকলে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
