২০২১ চনৰ ৮ ডিচেম্বৰ তামিলনাডুৰ কুন্নুৰৰ ওচৰত এম আই-১৭ ভি ৫ হেলিকপ্টাৰ দুৰ্ঘটনাত মৃত্যু হৈছিল চিডিএছ বিপিন ৰাৱাটৰ৷ তেওঁৰ সৈতে প্ৰাণ হেৰুৱাইছিল তেওঁৰ পত্নী মধুলিকা ৰাৱাটসহ ১১ জনে৷ ঘটনাৰ কাৰণ প্ৰযুক্তিগত সমস্যা নাছিল৷ এক ঘটনাৰ বিবৃত্তিত বায়ুসেনাই জনাইছিল যে পাইলটৰ বিভ্ৰান্তিবোধ তথা স্পেটিয়েল ডিছৱৰিয়েণ্টেছনৰ বাবেই এই দুৰ্ঘটনা ঘটিছিল৷
ঘটনাৰ ৩ বছৰ পাছত লোকসভাৰ প্ৰতিৰক্ষা সংক্ৰান্তিয় স্থায়ী কমিটিৰ প্ৰতিবেদনত কোৱা হৈছে যে মানুহৰ ভুলতেই চিডিএছ বিপিন ৰাৱাটৰ হেলিকপ্টাৰ দুৰ্ঘটনা হৈছিল৷ অষ্টদশ লোকসভাৰ স্থায়ী কমিটিৰ ৰিপৰ্টত কোৱা হৈছে যে, ২০১৭ চনৰ ২০২২ আৰ্থিক বছৰত ‘ত্ৰয়োদশ প্ৰতিৰক্ষা সময়কাল পৰিকল্পনা’ চলাৰ সময়ত বায়ু সেনাৰ মুঠ ৩৪ দুৰ্ঘটনা ঘটিছে৷ ২০২১-২২ আৰ্থিক বৰ্ষত মুঠ ৯টা দুৰ্ঘটনা ঘটিছিল আৰু ২০২১ চনৰ ৮ ডিচেম্বৰত দুৰ্ঘটনাটোও পাইলটৰ ভুলতেই ঘটিছিল৷
২০২২ চনত এন ডি টিভিক এক সূত্ৰই জনাইছিল যে পাইলটৰ ভুলৰ কাৰণেই সেইদিনা বায়ুসেনাৰ চপাৰ দুৰ্ঘটনাৰ কবলত পৰিছিল৷ লোকসভাৰ প্ৰতিৰক্ষা সংক্ৰান্তিয় স্থায়ী কমিটিৰ প্ৰতিবেদনেও এই কথাতেই ছিলমোহৰ মাৰিছে৷ বায়ুসেনাৰ তৰফৰ যি বিবৃত্তি প্ৰকাশ কৰা হৈছিল তাত চিডিএছ বিপিন ৰাৱাটৰ হেলিকপ্টাৰ দুৰ্ঘটনাৰ নেপথ্যত পাইলটৰ বিভ্ৰান্তি বুলিয়েই কোৱা হৈছে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
