মৌনি ৰয় বুলি ক’লে সকলোৱে চিনি পায়। বলীউডত নিজৰ স্থান দখল কৰিবলৈ সক্ষম হোৱা অভিনেত্ৰীগৰাকীয়ে নিজৰ ব্যক্তিগত জীৱনক লৈ যথেষ্ঠ চৰ্চা লাভ কৰিছে। ডুবাইৰ ব্যৱসায়ী সুৰজ নাম্বিয়াৰৰ সৈতে বিচ্ছেদৰ কথা ঘোষণা কৰিছে। উদ্যোগটোৰ অন্যতম সুখী দম্পতী হিচাপে পৰিচিত এই দম্পতীৰ আনুষ্ঠানিক বিচ্ছেদৰ খবৰে অনুৰাগীসকল স্বাভাৱিকতে স্তম্ভিত কৰি তুলিছে। এই বিচ্ছেদৰ মাজতে পুনৰ ছচিয়েল মিডিয়াত ওলাই আহিছে সুৰজৰ এটি পুৰণি সাক্ষাৎকাৰ। য’ত সুৰজে নিজেই স্পষ্ট কৰি দিছে যে বিবাহৰ ভেটিটো আচলতে কঠিন চৰ্তৰ মাজত গঢ় লৈ উঠিছে!
২০১৯ চনৰ পৰা ডুবাইত আৰম্ভ হৈছিল দুয়োৰে সম্পৰ্ক। প্ৰথম দৃষ্টিতে দেখি প্ৰেমত পৰিছিল যদিও, শীঘ্ৰে প্ৰেম বিবাহলৈ পৰিণত হৈছিল। প্ৰায় তিনি বছৰ ধৰি ডেটিং কৰাৰ পিছত ২০২২ চনৰ জানুৱাৰী মাহত মৌনি আৰু সুৰজে ৰাজকীয় ধৰণে বিবাহৰ অনুষ্ঠান আয়োজিত কৰে। কিন্তু বাহিৰৰ পৰা যিমানেই মৰমীয়াল যেন নালাগিলেও, তাৰ আঁৰৰ কাহিনী একেবাৰে পৃথক আছিল। সুৰজে আৰম্ভণিৰে পৰা বিবাহৰ বিৰোধী আছিল। কিন্তু মৌনীয়ে স্পষ্টকৈ কয় যে তেওঁ কেৱল প্ৰেমত নহয়, পৰিয়াল গঢ়িব বিচাৰে।
সেই পুৰণি সাক্ষাৎকাৰটোত সুৰজে নিজেই স্বীকাৰ কৰে যে, “মই কিছু সময় বিচাৰিছিলো। কিন্তু মৌনিয়ে স্পষ্টকৈ কৈছিল যে আমি বিবাহপাশত আৱদ্ধ নহ’লে আমাৰ ৰাস্তা সদায় পৃথক পৃথক হ’ব। ময়ো তেওঁক হেৰুৱাৰ ভয়ত একেলগে থাকিবলৈ মান্তি হৈছিলো।” পিছলৈ মৌনীয়ে তেওঁক মুম্বাইৰ জীৱনশৈলীৰ লগত খাপ খুৱাবলৈ সকলো প্ৰকাৰে সহায় কৰিছিল আৰু সুৰজে তেওঁলোকৰ যাত্ৰাক সুন্দৰ বুলি অভিহিত কৰিছিল।
আনহাতে, মৌনীয়েও এবাৰ কৈছিল যে সময়ৰ লগে লগে তেওঁলোকৰ সম্পৰ্কৰ বিষয়ে বুজাবুজি গঢ় লৈ উঠিছিল। ইয়াৰ উপৰিও অভিনেত্ৰীগৰাকীয়ে ইজনে সিজনৰ ব্যস্ততাক সন্মান জনাই কেনেকৈ ভাল সময় উপভোগ কৰিছিল সেই বিষয়েও কয়। কিন্তু হয়তো কোনেও ভবা নাছিল যে চৰ্তৰে আৰম্ভ হোৱা প্ৰেম কাহিনী ইমান সোনকালে শেষ হ’ব। জীৱনৰ সকলো আৱেগ, প্ৰেম আৰু স্মৃতি একাষৰীয়া কৰি অৱশেষত মৌনি আৰু সুৰজে বিবাহ বিচ্ছেদৰ পথ বাছি লয়।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
