প্ৰেম আৰু বিৱাহৰ প্ৰতিশ্ৰুতি দি এগৰাকী যুৱতীক মানৱ সৰবৰাহৰ চক্ৰৰ হাতত বিক্ৰী কৰাৰ এক চাঞ্চল্যকৰ ঘটনা পোহৰলৈ আহিছে। বিহাৰৰ পূব চম্পাৰণ জিলাৰ মতিহাৰীৰ এগৰাকী যুৱতীক পশ্চিম বংগৰ এটা ৰেড লাইট এলেকাৰ পৰা আৰক্ষীয়ে উদ্ধাৰ কৰে। এই ঘটনাৰ সৈতে জড়িত থকাৰ অভিযোগত ৰোহিত কুমাৰ নামৰ এজন যুৱকক গ্ৰেপ্তাৰ কৰা হৈছে। বিগত ৮ অক্টোবৰত যুৱতীগৰাকীৰ পৰিয়ালে তেওঁ নিৰুদ্দেশ হোৱাৰ এজাহাৰ দাখিল কৰিছিল। ইয়াৰ মাজতে যুৱতীগৰাকীয়ে গোপনে ফোন কৰি কান্দি কান্দি পৰিয়ালক সোনকালে উদ্ধাৰ কৰিবলৈ অনুৰোধ জনায়। যুৱতীগৰাকীৰ এই ফোনকলৰ পিছতে আৰক্ষীয়ে উদ্ধাৰ অভিযান আৰম্ভ কৰে।
আৰক্ষীৰ তথ্য অনুসৰি, মুজফ্ফৰপুৰ জিলাৰ চাহেবগঞ্জ থানা এলেকাৰ শ্বাহপুৰপট্টিৰ বাসিন্দা ৰোহিত কুমাৰৰ সৈতে যুৱতীগৰাকীৰ প্ৰায় এবছৰ আগতে চিনাকি হৈছিল। পৰিয়ালৰ সূত্ৰে দুয়োৰে মাজত সম্পৰ্ক গঢ় লৈ উঠিছিল আৰু পিছলৈ সেয়া প্ৰেমৰ সম্পৰ্কলৈ ৰূপান্তৰিত হৈছিল। অভিযোগ অনুসৰি, যুৱতীগৰাকীৰ বিশ্বাস অৰ্জন কৰাৰ পিছত ৰোহিতে তেওঁক মতিহাৰী ৰে’ল ষ্টেচনলৈ লৈ যায়। তাত ৰোহিতৰ আন দুজন সহযোগীও উপস্থিত আছিল। পিছত ৰোহিতে সোনকালে আহি পোৱাৰ আশ্বাস দি যুৱতীগৰাকীক কলকাতালৈ যাবলৈ প্ৰলোভিত কৰে। কিন্তু অভিযোগ অনুসৰি, তাত উপস্থিত হোৱাৰ পিছত যুৱতীগৰাকীক বে*শ্যাবৃত্তিত ব্যৱহাৰ কৰাৰ উদ্দেশ্যে বিক্ৰী কৰি দিয়া হয়।
যুৱতীগৰাকীক উদ্ধাৰৰ বাবে বিহাৰ আৰক্ষীয়ে পশ্চিমবংগ আৰক্ষীৰ সহযোগত এক বিশেষ অভিযান চলায়। আৰক্ষীৰ এটা দলে গ্ৰাহকৰ ৰূপ লৈ পজিপোডাৰ ৰেড লাইট এলেকাত প্ৰৱেশ কৰে। পৰিয়ালে যোগান ধৰা ফটোৰ সহায়ত আৰক্ষীয়ে যুৱতীগৰাকীক চিনাক্ত কৰে আৰু নিৰাপদে উদ্ধাৰ কৰিবলৈ সক্ষম হয়। আৰক্ষীয়ে ঘটনাৰে জড়িতৰ অভিযোগত ৰোহিত কুমাৰক গ্ৰেপ্তাৰ কৰে। আৰক্ষীৰ জেৰাত চাঞ্চল্যকৰ তথ্য পোহৰলৈ অহা বুলি জানিব পৰা গৈছে। অভিযোগ অনুসৰি, ৰোহিত কুমাৰে নিজৰ প্ৰেমিকাক ৰেড লাইট এলেকাত ২ লাখ টকাৰ বিনিময়ত বিক্ৰী কৰিছিল। জেৰাৰ সময়ত ৰোহিতে পংকজ, প্ৰিন্স আৰু ছোনী নামৰ আন তিনিজন লোকৰ নামো প্ৰকাশ কৰা বুলি আৰক্ষীৰ সূত্ৰত উল্লেখ কৰা হৈছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
