অসম লাইভ২৪ঃ মাত্ৰ ১৪ বছৰ বয়সতেই বিয়া হৈছিল। বিবাহপাশত আৱদ্ধ হোৱাৰ বাবেই পঢ়াশুনাও এৰিব লগা হৈছিল। তাৰপিছত ১৮ বছৰ বয়সত মাতৃ হয় অম্বিকা। নিজে সপোন দেখাৰ বয়সত সন্তানক লালন পালন কৰি সময় কটাব লগা হৈছিল অম্বিকাই। অম্বিকাই সৰুতে সপোন দেখিছিল এগৰাকী আমোলা হোৱাৰ। সেই সপোনটোক কিছুদিনৰ বাবে পাহৰি পেলালেও শেষ পৰ্যন্ত তেওঁ আইপিএছ হয়গৈ।
মাত্ৰ ১৪ বছৰ বয়সতেই এগৰাকী আৰক্ষী কনিষ্টবলৰ সৈতে বিবাহপাশত আৱদ্ধ হৈছিল অম্বিকা। তাৰপিছত আইপিএছ হোৱাৰ এই যাত্ৰা তেওঁৰ সহজ নাছিল। কিন্তু অম্বিকাৰ এই সপোনটোক পুনৰবাৰ জীয়াই তুলিছিল তেওঁৰ স্বামীয়ে। বাল্যবিবাহে শিক্ষাজীৱন কাঢ়ি লৈছিল অম্বিকাৰ পৰা। এবাৰ তেওঁ স্বামীৰ সৈতে গণতন্ত্ৰ দিৱসৰ কুচকাৱাছ চাবলৈ গৈছিল। তাতেই অম্বিকাই দেখিছিল, উচ্চপদস্থ আৰক্ষীবিষয়াসকলক কেনেকৈ সন্মান জনোৱা হয়। তাৰপাছতেই অম্বিকাই ঠিৰাং কৰি লৈছিল যে তেওঁ আইপিএছ বিষয়া হ’বই। ঘৰলৈ উভতি আহিয়েই অম্বিকাই তেওঁৰ আৰক্ষী স্বামীক সেই সপোনটোৰ কথা কয়। কিন্তু স্বামীয়ে অম্বিকাক বুজাইছিল যে এয়া সহজ কথা নহয়। ইয়াৰ বাবে পোনতে অম্বিকাই বৰ্ড পৰীক্ষাত উত্তীৰ্ণ হ’ব লাগিব সেই কথাও বুজাই কৈছিল। অম্বিকাৰ স্বামীয়ে কৈছিল যে, তেওঁ এতিয়া দুটাকৈ সন্তানৰ মাতৃ। শিশুকেই চোৱাচিতা কৰিব নে পঢ়াশুনাত মনোনিৱেশ কৰিব?
কিন্তু স্বামীৰ বুজনিত তেওঁ ক’লে যে চিভিল চাৰ্ভিছ পৰীক্ষাত তেওঁ পাছ কৰিবই। সকলো চেলেঞ্জ গ্ৰহণ কৰিবলৈ তেওঁ সাজু বুলিও স্বামীক জনাই। বিবাহৰ বাবেই তেওঁৰ পঢ়া শুনাত যিহেতু যতি পৰিছিল সেয়ে আকৌ তেওঁ পঢ়াশুনা আৰম্ভ কৰে। সন্তানক এৰি বিদ্যালয়লৈ যাবলৈ অসুবিধা হোৱাৰ বাবেই ডিছটেন্সতেই পঢ়াশুনা কৰিবলৈ আৰম্ভ কৰে। দশমৰ পাছতেই দ্বাদশ শ্ৰেণীৰ পৰীক্ষা দিয়ে অম্বিকাই। তাৰপিছতেই স্নাতকো উত্তীৰ্ণ হয় অম্বিকা। স্নাতক হোৱাৰ পাছতেই চিভিল চাৰ্ভিছ পৰীক্ষাৰ বাবে পঢ়াশুনা আৰম্ভ কৰে অম্বিকাই। অম্বিকা তামিলনাডুৰ বাসিন্দা। অম্বিকাৰ গাওঁৰ কাষত চিভিল চাৰ্ভিছ পৰীক্ষাৰ কছিঙৰ বাবে কোনো চেণ্টাৰো নাছিল।
অম্বিকাই তাৰপিছতেই সিদ্ধান্ত লয় যে, তেওঁ চেন্নাইলৈ যাব৷ তাতেই ইউপিএছচি পৰীক্ষাৰ বাবে কছিং লয় অম্বিকাই৷ সন্তান দুয়োটাক স্বামীৰ কাষত এৰি থৈ যায় অম্বিকাই৷ অম্বিকা চেন্নাই যোৱাৰ পাছত দুই সন্তানক চোৱাচিতা কৰি সন্তানক মাতৃৰ অভাৱ অনুভৱ কৰিবলৈ দিয়া নাছিল অম্বিকাৰ স্বামীয়ে৷ ইয়াৰপাছতেই পৰীক্ষাত অৱতীৰ্ণ হয় অম্বিকা৷ প্ৰথম দুবাৰ উত্তীৰ্ণ হ’ব নোৱাৰিলেও তৃতীয়বাৰত উত্তীৰ্ণ হয় অম্বিকা৷ ২০০৮ চনত আইপিএছ অফিচাৰ হয় অম্বিকা৷
অম্বিকাক পোনতে মহাৰাষ্ট্ৰত কেডাৰ হিচাপে নিয়োগ কৰা হয়৷ মুম্বাই আৰক্ষীৰ ডিচিপি পদতো আছিল অম্বিকা৷ মহাৰাষ্ট্ৰত ‘লেডী সিংহম’ বুলি ক’লেই সকলোৱেই চিনি পায় অম্বিকাক৷ প্ৰায়সমূহ ভাষণতে অম্বিকাই তেওঁৰ সফলতাৰ কাহিনী কৈ আহিছে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
