‘এক দেশ এক নিৰ্বাচন’, বিধেয়কত অনুমোদন মোদী চৰকাৰৰ
সংসদৰ শীতকালীন অধিৱেশনৰ মাজতে প্ৰধানমন্ত্ৰী নৰেন্দ্ৰ মোডীৰ অধ্যক্ষতাত কেন্দ্ৰীয় কেবিনেটৰ এখন গুৰুত্বপূৰ্ণ বৈঠক অনুষ্ঠিত হয়। এই বৈঠকতে কেন্দ্ৰীয় কেবিনেটে ‘এক দেশ এক নিৰ্বাচন’ বিধেয়কত অনুমোদন জনায়। এতিয়া কেন্দ্ৰীয় চৰকাৰে শীতকালীন অধিৱেশনত সদনত উপস্থাপন কৰিব পাৰিব এই বিধেয়ক।
কেন্দ্ৰীয় কেবিনেটে আজি বৃহস্পতিবাৰ ১২ ডিচেম্বৰ ২০২৪ তাৰিখে অনুমোদন জনাই এই বিধেয়কত। এতিয়া অহা সপ্তাহত সংসদত দাখিল কৰাৰ সম্ভাৱনা আছে এই এক দেশ এক নিৰ্বাচন বিধেয়ক।
ইয়াৰ পূৰ্বে ১৮ ছেপ্টেম্বৰত ‘এক দেশ, এক নিৰ্বাচন’ সম্পৰ্কীয় কোবিন্দ সমিতিৰ প্ৰতিবেদন কেন্দ্ৰীয় মন্ত্ৰীসভাই অনুমোদন জনাইছিল। প্ৰধানমন্ত্ৰী মোদীয়ে প্ৰথমে ২০১৯ চনৰ ৭৩ সংখ্যক স্বাধীনতা দিৱস উপলক্ষে এক দেশ, এক নিৰ্বাচনৰ ধাৰণা আগবঢ়াইছিল। তেওঁ কৈছিল যে দেশৰ সংহতিৰ প্ৰক্ৰিয়া সদায় অব্যাহত থাকিব লাগে। ২০২৪ চনৰ স্বাধীনতা দিৱস উপলক্ষে এই সন্দৰ্ভতো প্ৰধানমন্ত্ৰীয়ে নিজৰ মতামত ব্যক্ত কৰিছিল।
উল্লেখ্য যে কেন্দ্ৰীয় চৰকাৰে আৰম্ভণিৰে পৰাই এক দেশ, এক নিৰ্বাচনক সমৰ্থন কৰি আহিছে। কিন্তু বৰ্তমানৰ ব্যৱস্থাটো সলনি কৰাটো অতি প্ৰত্যাহ্বানজনক কাম। ইয়াৰ বাবে একমত অতি গুৰুত্বপূৰ্ণ। দেশত One Nation One Election ৰূপায়ণ কৰিবলৈ হ’লে সংবিধান সংশোধনৰ বাবে প্ৰায় ৬ খন বিধেয়ক আনিব লাগিব। এই সকলোবোৰ সংসদত উত্তীৰ্ণ হ’বলৈ হ’লে দুই তৃতীয়াংশ সংখ্যাগৰিষ্ঠতাৰ প্ৰয়োজন হ’ব।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
