শনিবাৰে তামিলনাডুৰ ৰাজনৈতিক ইতিহাসত এক যুগান্তকাৰী মুহূৰ্ত দেখা যাব৷ বিগত কেইবাদশকৰ পাছত প্ৰথমবাৰৰ বাবে এটা নৱগঠিত দলে প্ৰথমবাৰ নিৰ্বাচন খেলিয়েই চৰকাৰ গঠন কৰিব৷ কেইবাদিনৰ ৰাজনৈতিক অনিশ্চয়তা আৰু আলোচনাৰ পাছত তামিলনাডুৰ ভেত্ৰি কাজাগাম অৰ্থাৎ টিভিকে প্ৰধান থালাপতি বিজয়ে মুখ্যমন্ত্ৰী হিচাপে শপত গ্ৰহণ কৰিব৷ কংগ্ৰেছ, ভিচিকে, চিপিআই আৰু চিপিআইএমৰ সমৰ্থন লাভ কৰি টিভিকে সংখ্যাগৰিষ্ঠতা পাবলৈ সক্ষম হৈছে৷ টিভিকেৰ নেতৃত্বাধীন জোঁটত এতিয়া ১১৮খন আসন হৈছেগৈ৷ যি বিধানসভাত সংখ্যাগৰিষ্ঠতা লাভৰ বাবে যথেষ্ট৷
টিভিকে নেতৃত্বাধীন চৰকাৰৰ চূড়ান্ত অনুমোদনৰ বিষয়ে ৰাজ্যপালৰ তৰপৰ পৰা কোনো আনুষ্ঠানিক বিবৃতি নাহিলেও আগন্তুক ৫ বছৰত বিজয়ে কেনেকৈ অতি সামান্য সংখ্যাগৰিষ্ঠাৰে এটা জোঁট পৰিচলনা কৰিব সেই দিশত দৃষ্টি থাকিব সকলোৰে৷ আনকি দুই এজন বিধায়কৰ বিদ্ৰোহেও তামিলনাডুৰ ৰাজনীতিৰ পট পৰিবৰ্তন কৰাৰ উদাহৰণ আছে৷ তেনেক্ষেত্ৰত বিজয়ে সকলো দিশ কেনেদৰে সামৰি ৰাখে সেয়া দেখিব দেশৰ জনতাই৷ ৰাজনৈতিক বিশেষজ্ঞসকলে কৈছে, বিচক্ষণতা আছে বাবেই ইমান কম সময়ৰ ভিতৰত তেওঁ জনতাৰ মাজলৈ সোমাই গৈছে৷ কিন্তু তাৰমাজতো বিশেষ ৩টা পৰিস্থিতিৰ সন্মুখীন হ’ব পাৰে বিজয়-
১. তামিলনাডুৰ অধিকাংশ চৰকাৰেই বৰ্তমানলৈকে স্থিতিশীল হিচাপেই কাৰ্যনিৰ্বাহ কৰি আহিছে৷ ১৯৫২ চনৰ পাছত এইবাৰেই তামিলনাডুত প্ৰথমবাৰৰ বাবে ত্ৰিশংকু বিধানসভা৷ সংখ্যাগৰিষ্ঠাতকৈ কম আসন লাভ কৰি ইমানকেইটা দলক লৈ শাসনভাৰ চমজি লোৱাটো সহজ নহয়৷ কিন্তু বিজেপিক বাধা দিবলৈ বৰ্তমান পৰ্যন্ত সকলোদলেই একমত৷
কংগ্ৰেছ আৰু বাওঁদলৰ কেইবাজনো নেতাই তামিলনাডুৰ ৰাজনৈতিক অস্থিতিশীলতা ৰোধ কৰি, ধৰ্মনিৰপেক্ষ মূল্যবোধ বজায় ৰাখি আৰু ৰাজ্যৰ ৰাজনীতিৰ পৰা সাম্প্ৰদায়িক শক্তিক দূৰৈত ৰাখিব বিচাৰিছিল৷ বিজয়েও তেনে এক মূল্যবোধৰ ৰাজনীতিয়েই কৰিছে৷ সেয়ে অন্য দলসমূহেও বিজয়ক সমৰ্থনৰ হাত আগুৱাই দিছে৷
২. দলসমূহে কোনো কাৰণৰ সমৰ্থনৰ হাত উঠাই ল’লে কি হ’ব?
যদি ডাঙৰ কোনো মতবিৰোধৰ কাৰণে জোঁটৰ সকলো দলে টিভিকেৰ পৰা সমৰ্থন প্ৰত্যাহাৰ কৰে তেন্তে চৰকাৰ গঠনৰ বাবে প্ৰয়োজনীয় সংখ্যা বিজয়ৰ পক্ষত নাথাকিব আৰু তেওঁ বিধানসভাত সংখ্যাগৰিষ্ঠতা মানি ল’ব লাগিব৷ ইফালে ডিএমকেৰো যদি সংখ্যাগৰিষ্ঠতা নাথাকে তেন্তে নতুন নিৰ্বাচন ঘোষণা নোহোৱা পৰ্যন্ত ৰাজ্যপালে সংবিধানৰ ৩৫৬ অনুচ্ছেদ অনুসৰি ৰাষ্ট্ৰপতি শাসন জাৰি কৰিব পাৰে৷
এই কথাও লক্ষ্যণীয় যে বাম দলসমূহে কৌশলগত নমনীয়তাৰ পথ বাচি লৈছে আৰু বিজয়ৰ চৰকাৰৰ সৈতে তেওঁলোক থকাৰ প্ৰতিশ্ৰুতিও দিছে৷ অৱশ্যে তেওঁলোকে সেই কথাও ঘোষণা কৰিছে যে কিছু নীতিগত বিষয়ত ডিএমকে নেতৃত্বাধীন জোঁটক সমৰ্থন কৰি যাব বাওঁদলসমূহে৷ ইয়াৰ ফলত কিছু চাপ আছে টিভিকেৰ ওপৰত৷
৩. যদি এটা দলেও সমৰ্থন প্ৰত্যাহাৰ কৰে তেতিয়া কি হ’ব?
এই পৰিস্থিতিত য’ত তিনিটা দলৰ ভিতৰত কোনো এটা দলে টিভিকেৰ পৰা সমৰ্থন প্ৰত্যাহাৰ কৰাৰ সিদ্ধান্ত লয় তেতিয়া বিজয়ে এএমএমকেৰ দৰে অন্যান্য দলৰ সমৰ্থন জোগাৰ কৰিবলৈ বাধ্য হ’ব৷ তেওঁ আকৌ আস্থা ভোটৰ সময়ত সংখ্যাগৰিষ্ঠতাৰ প্ৰমাণ কৰিব লাগিব আৰু সেয়া ব্যৰ্থ হলেও ৰাষ্ট্ৰপতি শাসন জাৰি হ’ব৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
