ভাৰতৰ অনুৰোধ ৰক্ষা কৰিলে চীনে৷ ভাৰতৰ বিদেশমন্ত্ৰী এছ জয়শংকৰক তিনিবিধ সামগ্ৰী ৰপ্তানীৰ আশ্বাস দিলে চীনৰ বিদেশমন্ত্ৰী ওৱাং ইয়ে৷ সোমবাৰে দুদিনীয়া ভ্ৰমণেৰে ভাৰতলৈ আহিছিল তেওঁ৷ সেই দিনাই জয়শংকৰক দেখা কৰে ওয়াং ইয়ে৷ সংবাদ সংস্থা এ এন আই আৰু একাধিক সংবাদমাধ্যমৰ প্ৰতিবেদন অনুসৰি ভাৰতৰ বিদেশমন্ত্ৰীৰ সৈতে সাক্ষাতত তেওঁ তিনিবিধ সামগ্ৰী অৰ্থাৎ কৃষিক্ষেত্ৰত ব্যৱহৃত সাৰ, দুষ্প্ৰাপ্য খনিজ আৰু সুৰংগ খনন কৰাৰ যন্ত্ৰ টানেল বোৰিং মেছিন আকৌ ভাৰতলৈ ৰপ্তানী কৰাৰ কথা আলোচনা কৰে চীনৰ বিদেশমন্ত্ৰীৰ সৈতে৷
চীনে নিৰাপত্তাগত কাৰণ চাই ভাৰতত এই দুষ্প্ৰাপ্য খনিজ ৰপ্তানীৰ বিষয়েও বিধিনিষেধ আৰোপ কৰি ৰাখিছিল৷ ফলত অসুবিধাত পৰিছিল বাহন নিৰ্মাতাই৷ কেন্দ্ৰৰ এক সূত্ৰৰ খবৰ যে বিগত মাহত চীন যাত্ৰাত গৈ এই অসুবিধাৰ কথা সেই দেশৰ বিদেশমন্ত্ৰীক জনাইছিল জয়শংকৰে৷
সেই সূত্ৰৰ দাবী দুই বিদেশমন্ত্ৰীৰ বৈঠকত ডোনাল্ড ট্ৰাম্প আৰু শুল্কৰ প্ৰসংগও উঠিছে৷ ৰাছিয়াৰ পৰা তেল আমদানিৰ বাবে ইতিমধ্যেই ভাৰতীয় পণ্যৰ ওপৰত অতিৰিক্ত ২৫ শতাংশ শুল্ক জাপি দিছে আমেৰিকাই৷ চীনেও ৰাছিয়াৰ পৰা ইন্ধন আমদানি কৰে৷ সেই ক্ষেত্ৰত ৰাছিয়াৰ সৈতে বাণিজ্যিক সম্পৰ্ক ৰাখিলে চীনৰ ওপৰতো ট্ৰাম্পে শুল্ক জাপি দিব বুলি বহুতেই ধাৰণা কৰিছে৷ অৱশ্যে সকলোবোৰ নিৰ্ভৰ কৰিছে ৰাছিয়া ইউক্ৰেইনৰ যুদ্ধক লৈ ট্ৰাম্প প্ৰস্তাবিত ত্ৰিপাক্ষিক বৈঠকৰ গতিপ্ৰকৃতিৰ ওপৰত৷ সেয়ে এই বিষয়ে পূৰ্বৰে পৰাই সজাগ হৈ আছে চীন৷ সেই কাৰণেই তেওঁলোকে দ্বিপাক্ষিক সম্পৰ্কৰ টনাআঁজোৰা মোহাৰি ভাৰতৰ সৈতে সম্পৰ্ক উন্নত কৰাৰ চেষ্টা কৰিছে ধাৰণা কৰা হৈছে৷
দুদিনীয়া এই ভ্ৰমণত মঙলবাৰে ভাৰতৰ জাতীয় নিৰাপত্তা উপদেষ্টা অজিত ডোভালৰ সৈতে বৈঠকত বহিছে চীনৰ বিদেশমন্ত্ৰী৷ সেই বৈঠকতেই মূলত ভাৰত চীন সীমান্ত সংক্ৰান্তিয় বিষয়টোক লৈ আলোচনাৰ কথা আছে৷ তাৰ পূৰ্বে সোমবাৰে সন্ধিয়া বৈঠকত চীনৰ বিদেশমন্ত্ৰীক জয়শংকৰে কয়, ‘এয়া সীমান্ত সংক্ৰান্তিয় বিষয়৷ এই বিষয় অত্যন্ত গুৰুত্বপূৰ্ণ৷ কাৰণ আমাৰ সম্পৰ্কৰ যিকোনো ইতিবাচক অগ্ৰগতিৰ ভিত্তিয়েই হৈছে সীমান্তৰ শান্তি আৰু স্থিতাবস্থা৷ সেয়ে সীমান্তত উত্তেজনা কমোৱাৰ প্ৰক্ৰিয়াক আৰু আগুৱাই লৈ যাব লাগিব৷’ মঙলবাৰে সন্ধিয়া প্ৰধানমন্ত্ৰী নৰেন্দ্ৰ মোদীৰ সৈতে দেখা কৰাৰ কথা আছে চীনৰ বৈদেশিকমন্ত্ৰীৰ৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
