দীৰ্ঘ সময়ৰ পৰা সীমা বিবাদ তথা অন্যান্য কাৰণত ভাৰত আৰু চীনৰ মাজৰ সম্পৰ্ক সন্তোষজনক নহয়। কিন্তু আজি চীনে দুয়োখন দেশৰ সম্পৰ্কক লৈ এক গুৰুত্বপূৰ্ণ মন্তব্য আগবঢ়াইছে। চীনে ভাৰত সন্দৰ্ভত মন্তব্য আগবঢ়াই কয় যে-চীন আৰু ভাৰত প্ৰতিদ্বন্দ্বী অথবা প্ৰতিৰোধী ৰাষ্ট্ৰ নহয়। দুয়োখন দেশ পৰস্পৰৰ শত্ৰুও নহয়, বৰঞ্চ দুয়োখন দেশ পৰস্পৰৰ সহযোগীহে হোৱা উচিত। অনাগত দিনত দুয়োখন ৰাষ্ট্ৰই মিলি আৰ্থিক, প্ৰতিৰক্ষাকে ধৰি বিভিন্ন দিশৰ ক্ষেত্ৰত বিকাশ সাধন কৰাৰ সম্ভৱনাময় বাট আছে বুলিও মন্তব্য কৰে।
কিয় সলনি হ’ল ভাৰতৰ প্ৰতি চীনৰ সুৰ?
শেহতীয়াভাৱে ৰাছিয়াৰ ৰাষ্ট্ৰপতি ভ্লাদমিৰ পুটিনে ভাৰত-চীন-ৰাছিয়াৰ সম্পৰ্কক লৈ এটা অতি গুৰুত্বপূৰ্ণ মন্তব্য কৰিছিল। ৰাছিয়াৰ ৰাষ্ট্ৰপতিগৰাকীৰ মন্তব্যৰ পিছতে চীনৰ বিদেশ মন্ত্ৰালয়ৰ প্ৰবক্তা লিন জিয়ানৰ চীন-ভাৰতৰ সম্বন্ধক লৈ কৰা মন্তব্যটোই এতিয়া চৰ্চা লাভ কৰিছে। লিন জিয়ানে লগতে এইটোও কয় যে-ভাৰত আৰু চীনে সহযোগী দেশৰ দৰে আগবাঢ়িব লাগে। চীন-ভাৰতৰ সম্বন্ধই পৰস্পৰৰ বিকাশৰ ক্ষেত্ৰত গুৰুত্বপূৰ্ণ ভূমিকা গ্ৰহণ কৰিব পাৰে বুলিও মন্তব্য কৰে চীনৰ বিদেশ মন্ত্ৰালয়ৰ প্ৰবক্তাগৰাকীয়ে। তেওঁ লগতে পাকিস্তান সন্দৰ্ভতো মন্তব্য প্ৰকাশ কৰি কয়- চীনে পাকিস্তান আৰু ভাৰত দুয়োখন দেশৰ সৈতে সু-সম্পৰ্ক ৰক্ষা কৰাৰহে পক্ষপাতী। চীন-ভাৰত আৰু ৰাছিয়াৰ ত্ৰিকোণীয় সম্বন্ধৰ ক্ষেত্ৰতো চীনে ধনাত্মক সংকেত আগবঢ়াইছে। সেই প্ৰসংগত লিন জিয়ানে কয় যে ৰাছিয়া, চীন আৰু ভাৰত বিশ্বৰ বৃহৎ অৰ্থব্যৱস্থাৰ দেশসমূহৰ অন্যতম। তিনিওখন দেশৰ ত্ৰিকোণীয় সম্বন্ধই নিজৰ দেশৰ আৰ্থিক স্থিতিক মজবুত কৰাৰ উপৰিও বিশ্ব শান্তি, সুৰক্ষাৰ ক্ষেত্ৰতো গুৰুত্বপূৰ্ণ ভূমিকা গ্ৰহণ কৰিব পাৰে।
ভাৰত-চীন সম্পৰ্কক লৈ কি কৈছিল ৰাছিয়াৰ ৰাষ্ট্ৰপতিগৰাকীয়ে?
ৰাছিয়াৰ ৰাষ্ট্ৰপতি ভ্লাদমিৰ পুটিনে ভাৰত-চীনৰ সম্পৰ্ক অত্যন্ত সংবেদনশীল বুলি উল্লেখ কৰি কয় যে-দুয়োখন দেশৰ সম্পৰ্ক বহুতৰপীয়া স্তৰত আছে। দুয়োখন দেশৰ সম্পৰ্কৰ মাজত বহিঃশক্তিৰ হস্তক্ষেপ উচিত নহয় বুলিও মন্তব্য কৰিছিল পুটিনে। দুয়োখন দেশৰ সম্পৰ্কৰ কথা ক’বলৈ গৈ ৰাষ্ট্ৰপতি পুটিনে ভাৰতৰ প্ৰধানমন্ত্ৰী নৰেন্দ্ৰ মোদী আৰু চীনৰ ৰাষ্ট্ৰপতি জিনপিঙৰো ভূয়সী প্ৰশংসা কৰে। তেওঁ লগতে দুয়োখন দেশৰ নেতাই পৰস্পৰৰ মাজৰ সম্পৰ্ক অধিক উন্নত কৰাৰ ক্ষেত্ৰত নিজাববীয়া প্ৰচেষ্টা অব্যাহত ৰাখিছে বুলিও মন্তব্য কৰে।
এই লেখাটো যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
