চীনৰ এখন আদালতে সোমবাৰে উৎকোচ লোৱাৰ অভিযোগত দেশখনৰ এজন প্ৰাক্তন চৰকাৰী বিষয়াক মৃ*ত্যুদণ্ডৰ ৰায় দিয়ে। অভিযুক্ত বিষয়াজনৰ নাম য়াং য়ৌলিন। অভিযোগ অনুসৰি, তেওঁ প্ৰায় ৩০ বছৰৰ ধৰি নিজৰ ক্ষমতা আৰু পদমৰ্যাদাৰ অপব্যৱহাৰ কৰি বিপুল পৰিমাণৰ উৎকোচ লৈছিল। য়াং চীনৰ পূব উপকূলীয় জিয়াংছু প্ৰদেশৰ ৰাজধানী নানজিঙৰ প্ৰাক্তন অৰ্থনৈতিক উন্নয়ন বিষয়াৰূপে দায়িত্ব পালন কৰিছিল। চাংঝৌ ইণ্টাৰমিডিয়েট পিপলছ কোৰ্টে সোমবাৰে প্ৰকাশ কৰা এক বিবৃতিত জনায় যে, য়াঙে ১৯৯৩ চনৰ পৰা ২০২৩ চনৰ ভিতৰত অবৈধভাৱে ২.২১ বিলিয়ন ইউয়ান (প্ৰায় ৩০০০ কোটি টকা) মূল্যৰ সম্পদ উৎকোচৰ জৰিয়তে আহৰণ কৰিছিল। ইয়াৰ উপৰিও তেওঁৰ বিৰুদ্ধে চৰকাৰী ধন আত্মসাৎ, ক্ষমতাৰ অপব্যৱহাৰ আৰু মানী লণ্ডাঙৰ অভিযোগো প্ৰমাণিত হৈছে। আদালতৰ মতে, বিগত কিছু বছৰৰ ভিতৰত এয়া চীনত উদ্ধাৰ হোৱা আটাইতকৈ বৃহৎ দুৰ্নীতিৰ ঘটনাসমূহৰ ভিতৰত অন্যতম।
১৯৯৩ৰ পৰা মেলিছিল দুৰ্নীতিৰ পোহাৰ
চীনৰ এটা সংবাদ মাধ্যমৰ প্ৰতিবেদন অনুসৰি, ৬৯ বছৰীয়া য়াং য়ৌলিনে ১৯৯৩ চনৰ পৰা ২০২৩ চনলৈ নানজিঙত বিভিন্ন গুৰুত্বপূৰ্ণ পদত কৰ্মৰত আছিল। তেওঁ নিজৰ প্ৰভাৱ আৰু ক্ষমতাৰ অপব্যৱহাৰ কৰি বহু লোকক অভিযান্ত্ৰিক ঠিকাদাৰী, ভূমি হস্তান্তৰ আৰু বিত্তীয় সুবিধা লাভ কৰাত সহায় কৰিছিল। ইয়াৰ বিনিময়ত তেওঁ নগদ ধন আৰু মূল্যৱান সামগ্ৰীৰ ৰূপত বিপুল পৰিমাণৰ উৎকোচ গ্ৰহণ কৰিছিল। চীনৰ ৰাষ্ট্ৰপতি শ্বি জিনপিঙে আৰম্ভ কৰা দুৰ্নীতি বিৰোধী অভিযানৰ অংশ হিচাপে য়াং য়ৌলিনৰ বিৰুদ্ধে তদন্ত চলোৱা হয়। এই অভিযানৰ আওতাত সামৰিক বাহিনী, উচ্চ পৰ্যায়ৰ বেংকিং খণ্ড আদি বিভিন্ন ক্ষেত্ৰতো তদন্ত চলোৱা হৈছে। অৱশ্যে সমালোচকসকলে অভিযোগ কৰে যে, এই অভিযান কেতিয়াবা ৰাজনৈতিক প্ৰতিদ্বন্দ্বীক আঁতৰাবলৈও ব্যৱহাৰ কৰা হয়। আদালতে কয় যে, য়াঙে নিজৰ কৰ্মজীৱনৰ অধিকাংশ সময় নানজিঙৰ অৰ্থনৈতিক আৰু প্ৰযুক্তিগত উন্নয়ন ক্ষেত্ৰত কাম কৰিছিল যদিও তেওঁ অত্যন্ত গুৰুতৰ অপৰাধ সংঘটিত কৰিছে। তেওঁৰ কাৰ্যকলাপে ৰাষ্ট্ৰ আৰু জনসাধাৰণৰ স্বাৰ্থৰ ওপৰত ব্যাপক ক্ষতি সাধন কৰিছে।
দোষ স্বীকাৰ অভিযুক্তৰ
বিচাৰৰ সময়ত য়াং য়ৌলিনে নিজৰ অপৰাধ স্বীকাৰ কৰাৰ লগতে নিজৰ কৰ্মৰ বাবে গভীৰ অনুতাপ প্ৰকাশ কৰে। তদন্তকাৰী সংস্থাক কিছুমান বিষয়ত তেওঁ সহযোগিতা কৰিছিল যদিও আদালতে কয় যে, তেওঁৰ অপৰাধৰ গুৰুত্ব ইমানেই বেছি যে এই সহযোগিতাৰ ভিত্তিত শাস্তি লাঘৱ কৰাৰ কোনো অৱকাশ নাই। এই গোচৰৰ ৰাজহুৱা শুনানি মাৰ্চ আৰু এপ্ৰিলত দুটা পৃথক দিনত অনুষ্ঠিত হৈছিল। আদালতৰ তথ্য অনুসৰি, দুয়োটা শুনানিত ৩০ জনতকৈ অধিক লোক উপস্থিত আছিল। আদালতে য়াঙৰ ব্যক্তিগত সম্পত্তি জব্দ কৰাৰ লগতে উৎকোচ হিচাপে গ্ৰহণ কৰা সমগ্ৰ ধন উদ্ধাৰ কৰিবলৈ সংশ্লিষ্ট কৰ্তৃপক্ষক নিৰ্দেশ দিছে। উল্লেখ্য যে, চীনত দুৰ্নীতিৰ অভিযোগত বহু জ্যেষ্ঠ বিষয়াক পূৰ্বেও মৃ*ত্যুদণ্ড দিয়া হৈছে।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
