বৰাক উপত্যকাত উন্নয়নৰ নতুন জোৱাৰ অনাৰ প্ৰতিশ্ৰুতিৰে বিশেষ বৈঠকত মিলিত হৈছে মুখ্যমন্ত্ৰী হিমন্ত বিশ্ব শৰ্মা৷ বৰাক উপত্যকা উন্নয়ন বিভাগৰ সৈতে বৈঠকত মিলিত হৈছে মুখ্যমন্ত্ৰীগৰাকী৷ মুখ্যমন্ত্ৰীগৰাকীয়ে মঙলবাৰে লোকসেৱা ভৱনত বৰাত উপত্যকাৰ কেইবাজনো মন্ত্ৰী বিধায়কৰ লগতে বৰাক উপত্যকা উন্নয়ণ বিভাগৰ বিষয়াসকলৰ সৈতে এক বৈঠকত মিলিত হয়৷
হিমন্ত বিশ্ব শৰ্মা চৰকাৰৰ অধীনত ২০২১ চনৰ পৰা বৰাকত চলি অহা উন্নয়নমূলক প্ৰচেষ্টাসমূহক অধিক গতি প্ৰদান কৰিবলৈ কেইবাটাও প্ৰচেষ্টা গ্ৰহণৰো সিদ্ধান্ত লোৱা হৈছে এই বৈঠকত৷ চৰকাৰৰ কেন্দ্ৰীভূত প্ৰচেষ্টাৰ সৈতে সংগতি ৰাখি ২০২৪ চনৰ ডিচেম্বৰ মাহত বৰাক উপত্যকা উন্নয়ন বিভাগৰ সৃষ্টি কৰা হৈছিল৷ উদ্দেশ্য এটাই যে বৰাকৰ উন্নয়নৰ গতিশীলতা ধৰি ৰখা৷ অসম বাজেটত বিভাগটোৰ বাবে ১০০ কোটি টকা ধনৰাশিও আৱণ্টন দিয়া হৈছিল৷
আজিৰ বৈঠকত মুখ্যমন্ত্ৰীয়ে বৰাক উপত্যকাৰ জনপ্ৰতিনিধিসকলৰ লগতে বিভাগটোৰ বিষয়া কৰ্মচাৰীসকলক বৰাক উপত্যকা অঞ্চলৰ তিনিখন জিলা কাছাৰ, হাইলাকান্দি আৰু শ্ৰীভূমিৰ ক্ষিপ্ৰ উন্নয়ন সুনিশ্চিত কৰিবলৈ সেই অনুসৰি পৰিকল্পনা আৰু ৰূপৰেখা প্ৰস্তুত কৰিবলৈ নিৰ্দেশনা প্ৰদান কৰা হৈছে৷ বৈঠকত ডঃ শৰ্মাই বিভাগটোক সকলো জিলাৰ সম উন্নয়নৰ সুবিধাৰ বাবে উমৈহতীয়া উন্নয়নৰ লক্ষ্যৰ পৰিকল্পনা কৰিবলৈ নিৰ্দেশনা প্ৰদান কৰিছে৷ অসম চৰকাৰে তিনিওখন জিলাৰ অসামৰিক চিকিৎসালয়ত এম আৰ আইৰ সুবিধাসমূহ যাতে ক্ষিপ্ৰতাৰে আৰম্ভ কৰিব পাৰে৷ বৈঠকত নতুন দিল্লী আৰু কলকাতাত বৰাক ভৱন স্থাপনৰ বিষয়েও আলোচনা কৰা হয়৷
বৰাক উপত্যকাত প্ৰতিভাসমূহক উপযুক্ত মঞ্চ দিয়া, প্ৰচাৰ আৰু প্ৰসাৰৰ বাবে বৰাক সাংস্কৃতিক মহোৎসৱ আৰু বৰাক ক্ৰীয়া মহোৎসৱ অনুষ্ঠিত কৰাৰ পৰিকল্পনাও বৈঠকত কৰা হয়৷ বিভাগটোৰ কামকাজ সুকলমে আগুৱাই নিবলৈ শিলচৰৰ পুৰণি আৱৰ্তভৱত এটা অস্থায়ী কাৰ্যালয় স্থাপন কৰা হব বুলিও জনাই মুখ্যমন্ত্ৰীগৰাকীয়ে৷ তদুপৰি বৰাকত বিভিন্ন প্ৰকল্পৰ কাম চলি আছে৷ সেইসমূহৰ অগ্ৰগতিৰো বুজ লয় মুখ্যমন্ত্ৰীগৰাকীয়ে৷
উল্লেখ্য যে বৰাক উপত্যকা সচিবালয় ২০২৬ চনৰ ফেব্ৰুৱাৰী মাহৰ ভিতৰত সাজু হোৱাৰ সম্ভাৱনা আছে বুলিও উল্লেখ কৰি ২০২৫ চনৰ অক্টোবৰৰ ভিতৰত নতুন ৫০০ বিচনাযুক্ত এছ এম তি এইচ ব্লকো বৰাকে লাভ কৰিব বুলি জনাই মুখ্যমন্ত্ৰীগৰাকীয়ে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
