কৰ্মজীৱন আৰু সন্তানৰ লালন-পালনৰ মাজত ভাৰসাম্য ৰক্ষা কৰাটো কৰ্মৰত অভিভাৱকসকলৰ বাবে সদায়েই এক ডাঙৰ প্ৰত্যাহ্বান। এই সমস্যাৰ প্ৰতি লক্ষ্য ৰাখি নতুন শ্ৰম সংহিতা (New Labour Code)ৰ অধীনত কৰ্মস্থলত শিশুৰ যত্নৰ বাবে Creche সুবিধাৰ নিয়ম অধিক বিস্তৃত আৰু নমনীয় কৰা হৈছে। ছ’চিয়েল ছিকিউৰিটি কোড, ২০২০ আৰু অকুপেচনেল ছেফ্টি, হেল্থ এণ্ড ৱৰ্কিং কণ্ডিচনছ কোড, ২০২০ (OSHWC)ৰ লগতে শ্ৰম আৰু নিয়োগ মন্ত্ৰালয়ে জাৰি কৰা স্পষ্টীকৰণ অনুসৰি, ৫০ জন বা তাতকৈ অধিক কৰ্মচাৰী থকা প্ৰতিষ্ঠানত ছয় বছৰৰ তলৰ সন্তান থকা কৰ্মচাৰীসকলৰ বাবে ক্ৰেছ সুবিধা বাধ্যতামূলক। এই ক্ৰেছ সুবিধা কাৰ্যালয়ৰ পৰা এক কিলোমিটাৰৰ ভিতৰত থাকিব লাগিব। আইন অনুসৰি, কোম্পানীয়ে নিজাববীয়াকৈ Creche চলাব পাৰে অথবা ওচৰৰ আন প্ৰতিষ্ঠানৰ সৈতে মিলি এক যৌথ Creche সুবিধাও গঢ়ি তুলিব পাৰে।
নতুন নিয়মৰ এটা উল্লেখযোগ্য পৰিবৰ্তন হৈছে যে ক্ৰেছ সুবিধা এতিয়া কেৱল মহিলা কৰ্মচাৰীৰ বাবে সীমাবদ্ধ নহয়। ২০২৬ চনৰ ১৬ মাৰ্চত শ্ৰম আৰু নিয়োগ মন্ত্ৰালয়ে জাৰি কৰা স্পষ্টীকৰণ অনুসৰি, OSHWC Codeৰ অধীনত ক্ৰেছ সুবিধা সকলো কৰ্মচাৰীৰ বাবে উপলব্ধ থাকিব লাগিব। অৱশ্যে, Social Security Codeৰ কিছুমান ধাৰাত এতিয়াও “মহিলা” আৰু Single Parent আদি শব্দ ব্যৱহাৰ কৰা হৈছে। কিন্তু উদ্যোগ মহলত এই বিধানসমূহ সম্পূৰ্ণ লিংগ-নিৰপেক্ষ কৰাৰ দাবী ক্ৰমাৎ বৃদ্ধি পাইছে।
যদি কোনো কোম্পানীয়ে বাস্তৱিকভাৱে Crecheৰ সুবিধা প্ৰদান কৰিব নোৱাৰে, তেন্তে কৰ্মচাৰীৰ সন্মতি সাপেক্ষে কোম্পানীয়ে নগদ Creche ভাট্টা দিব পাৰে। প্ৰতিটো শিশুৰ বাবে প্ৰতিমাহে কমেও ৫০০ টকা ভাট্টা দিব লাগিব সংশ্লিষ্ট কৰ্মচাৰীক। এই সুবিধা সাধাৰণতে সৰ্বাধিক দুটা সন্তানলৈকে প্ৰযোজ্য। অৱশ্যে যমজ সন্তানৰ ক্ষেত্ৰত খৰচৰ পৰিমান ব্যতিক্ৰম হ’ব পাৰে।
আনহাতে দিনটোত চাৰিবাৰ Crecheলৈ যোৱাৰ অনুমতি, য’ত বিশ্ৰামৰ সময়ো অন্তৰ্ভুক্ত থাকিব। সন্তানৰ বয়স ১৫ মাহ নোহোৱালৈকে প্ৰতিদিনে দুবাৰ স্তনপান (Nursing) বিৰতি, প্ৰতিবাৰত বিৰতিৰ সময়ত ১৫ মিনিট আৰু লগতে Crecheলৈ প্ৰতিবাৰে অহা-যোৱাৰ বাবে অতিৰিক্ত ১৫ মিনিট সময়ৰ সুবিধা দিব লাগিব। আইন অনুসৰি কোম্পানীয়ে কেৱল ক্ৰেছৰ বাবে ঠাই দিলেই নহ’ব, শিশুৰ সুৰক্ষা আৰু সুস্থ পৰিৱেশ নিশ্চিত কৰাটোও বাধ্যতামূলক।
সুৰক্ষা আৰু সুস্থ পৰিৱেশৰ ক্ষেত্ৰত CCTV নজৰদাৰী ব্যৱস্থা থাকিব লাগিব। Creche কৰ্মচাৰীৰ আৰক্ষী সত্যাপন, বিশুদ্ধ বতাহ আৰু খোৱাপানীৰ সুবিধা, প্ৰাথমিক চিকিৎসা (First Aid)ৰ ব্যৱস্থা, শিশুসকলৰ বাবে নিৰাপদ খেলপথাৰ আৰু খেলাৰ স্থান, পৰিষ্কাৰ-পৰিচ্ছন্ন আৰু স্বাস্থ্যসন্মত পৰিৱেশৰ ব্যৱস্থা থাকিব লাগিব। এই নতুন ব্যৱস্থাসমূহৰ লক্ষ্য হৈছে কৰ্মৰত অভিভাৱকসকলৰ ওপৰত সন্তানৰ যত্নৰ চাপ হ্ৰাস কৰা আৰু কৰ্মস্থলক অধিক পৰিয়াল-বান্ধৱ (Family-friendly) কৰি তোলা।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
