চাইবাৰ অপৰাধীয়ে নিতৌ নতুন নতুন কৌশল ব্যৱহাৰ কৰি সাধাৰণ জনতাৰ পৰা উদ্যোগপতিলৈ নিজৰ জালত পেলাই আহিছে। শেহতীয়াকৈ ৰাজস্থানৰ জয়পুৰত সংঘটিত হোৱা এক চাইবাৰ প্ৰৱঞ্চনাই সকলোকে চিন্তিত কৰি তুলিছে। কোম্পানীৰ বছ বা পৰিচালকৰ পৰিচয় ব্যৱহাৰ কৰি এজন একাউণ্টেণ্টক বিশ্বাসত লৈ প্ৰায় ৬.৮০ কোটি টকা বিভিন্ন বেংক একাউণ্টলৈ ট্ৰেন্সফাৰ কৰাই লোৱাৰ এক ঘটনা পোহৰলৈ আহিছে। ঘটনাৰ পিছতে কোম্পানীটোৰ মুখ্য কাৰ্যবাহী বিষয়াই ৰাজ্যিক চাইবাৰ অপৰাধ আৰক্ষী থানাত অভিযোগ দাখিল কৰে। অভিযোগ লাভ কৰাৰ পিছত আৰক্ষীয়ে ক্ষিপ্ৰতাৰে তদন্ত আৰম্ভ কৰে আৰু মাত্ৰ এসপ্তাহৰ ভিতৰতে এই কাণ্ডৰ সৈতে জড়িত চাৰিজন লোকক গ্ৰেপ্তাৰ কৰে।
আৰক্ষীৰ তথ্য অনুসৰি, চাইবাৰ অপৰাধীয়ে প্ৰথমে কোম্পানীটোৰ এজন একাউণ্টেণ্টৰ কম্পিউটাৰটো হেক কৰে। তাৰ পিছত একাউণ্টেণ্টজনৰ হোৱাটছএপ যোগাযোগ তালিকাৰ পৰা কোম্পানীটোৰ প্ৰকৃত বছৰৰ মোবাইল নম্বৰটো আঁতৰাই তাৰ স্থানত একে নাম আৰু একে প্ৰফাইল ফটোৰে এটা নতুন নম্বৰ যোগ কৰে। ইয়াৰ ফলত একাউণ্টেণ্টজনে নতুন নম্বৰটো কোম্পানীটোৰ প্ৰকৃত পৰিচালকৰ বুলি ভাবি লয়।
ইয়াতেই ক্ষান্ত নাথাকি চাইবাৰ অপৰাধীসকলে কোম্পানীটোৰ বছ আৰু একাউণ্টেণ্টৰ মাজত আগতে হোৱা কথোপকথনৰ ধৰণ অনুকৰণ কৰি নতুনকৈ মেছেজ আদান-প্ৰদান কৰে। ফলত একাউণ্টেণ্টজনৰ সন্দেহৰ কোনো কাৰণ নাথাকিল। অৱশেষত পৰিচালকৰূপী চাইবাৰ অপৰাধীৰ নিৰ্দেশ অনুসৰি কোম্পানীটোৰ একাউণ্টৰ পৰা তিনিটা বেংক একাউণ্টলৈ মুঠ ৬.৮ কোটি টকা ট্ৰেন্সফাৰ কৰা হয়।
ঘটনাটোৰ বিষয়ে জানিব পাৰি ৰাজ্যিক চাইবাৰ অপৰাধ আৰক্ষী আৰু ১৯৩০ চাইবাৰ অপৰাধ হেল্পলাইনৰ সৈতে জড়িত দলে তৎক্ষণাত বেংকসমূহৰ সৈতে যোগাযোগ কৰি লেনদেনসমূহৰ ওপৰত ব্যৱস্থা গ্ৰহণ কৰে। আৰক্ষীৰ তৎপৰতাৰ ফলত প্ৰতাৰিত ধনৰ ভিতৰত প্ৰায় ৩.৫০ কোটি টকা বিভিন্ন বেংক একাউণ্টত ফ্ৰীজ কৰিবলৈ সক্ষম হয়। তদন্তত আৰক্ষীয়ে জানিব পাৰে যে অভিযুক্তসকলে প্ৰতাৰণাৰ ধন পোনপটীয়াকৈ নিজৰ বেংক একাউণ্টত জমা কৰা নাছিল। ইয়াৰ পৰিৱৰ্তে তেওঁলোকে আন লোকৰ বেংক একাউণ্ট ব্যৱহাৰ কৰিছিল। এই একাউণ্ট প্ৰদান কৰা লোকসকলক ইয়াৰ বিনিময়ত কমিচন দিয়া হৈছিল।
প্ৰতাৰিত ধন এই একাউণ্টসমূহত জমা হোৱাৰ পিছত চেক, এটিএম, ইউপিআই, নগদ ধন জমা মেচিন, ডিজিটেল ৱালেট আৰু আন বহু বেংক একাউণ্টৰ জৰিয়তে ধন স্থানান্তৰ কৰা হৈছিল। আৰক্ষীৰ তদন্তত এইটোও পোহৰলৈ আহিছে যে চাইবাৰ অপৰাধীসকলে বিভিন্ন টেলিগ্ৰাম চেনেলৰ জৰিয়তে বেংক একাউণ্ট, এটিএম কাৰ্ড, ছিম কাৰ্ড আৰু পাছবুক আদি সংগ্ৰহ কৰিছিল।
এটা বেংক একাউণ্টৰ সম্পূৰ্ণ ‘কিট’ৰ বাবে প্ৰায় ১০ হাজাৰৰ পৰা ১৫ হাজাৰ টকা পৰ্যন্ত দিয়া হৈছিল বুলি তদন্তত প্ৰকাশ পাইছে। প্ৰতাৰণাৰ ধন কোনো একাউণ্টত জমা হোৱাৰ পিছতে সেয়া দ্ৰুতগতিত আন একাউণ্টলৈ স্থানান্তৰ কৰা হৈছিল। আৰক্ষীৰ মতে, প্ৰথম পৰ্যায়ত ব্যৱহাৰ কৰা তিনিটা বেংক একাউণ্টৰ পৰা ধন প্ৰায় ২৫০টা বেংক একাউণ্টলৈ স্থানান্তৰ কৰা হৈছিল। বিভিন্ন একাউণ্টৰ মাজেৰে বাৰে বাৰে ধন স্থানান্তৰ কৰাৰ মূল উদ্দেশ্য আছিল ধনৰ প্ৰকৃত উৎস লুকুৱাই ৰখা।
এই ঘটনাৰ তদন্ত চলাই ৰাজ্যিক চাইবাৰ অপৰাধ আৰক্ষীয়ে চাৰিজন অভিযুক্তক গ্ৰেপ্তাৰ কৰে। মায়ংক কচৌটিয়া, বৃজমোহন ড্ৰন ওৰফে লাকী, সমনাৰাম, মোহিত যাদৱ ওৰফে মতি। এই চাইবাৰ প্ৰৱঞ্চনাৰ তদন্তত আন্তঃৰাষ্ট্ৰীয় সংযোগৰ কথাও পোহৰলৈ আহিছে। বেংক লেনদেনৰ সৈতে জড়িত ইণ্টাৰনেট প্ৰট’কল বা IP ঠিকনা বিশ্লেষণ কৰি আৰক্ষীয়ে কিছুমান গুৰুত্বপূৰ্ণ তথ্য লাভ কৰিছে।
তদন্ত অনুসৰি, বেংক একাউণ্টত ধন জমা হোৱাৰ পিছত সেই ধন ছিংগাপুৰ আৰু হংকঙত থকা গেঙৰ মাষ্টাৰ মাইণ্ডসকলৰ সৈতে জড়িত নেটৱৰ্কলৈ স্থানান্তৰ কৰা হৈছিল বুলি সন্দেহ কৰা হৈছে। ইয়াৰ পিছত বিভিন্ন বেংক একাউণ্ট, কিউআৰ ক’ড আৰু ডিজিটেল মাধ্যমৰ একাধিক স্তৰৰ জৰিয়তে ধন ঘূৰাই-পকাই স্থানান্তৰ কৰা হৈছিল। ইয়াৰ উদ্দেশ্য আছিল ধনৰ উৎস আৰু প্ৰকৃত হিতাধিকাৰীক চিনাক্ত কৰাটো কঠিন কৰি তোলা।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
