ৰাজ্যৰ আইন-শৃংখলাক লৈ গুৰুত্বপূৰ্ণ বৈঠকত ব্যস্ত আছিল মুখ্যমন্ত্ৰী হিমন্ত বিশ্ব শৰ্মা। দেৰগাঁৱত অনুষ্ঠিত জ্যেষ্ঠ আৰক্ষী অধীক্ষকৰ সন্মিলনত ৰাজ্যৰ অপৰাধ নিয়ন্ত্ৰণ, আইন-শৃংখলা আৰু আৰক্ষীৰ ভূমিকা সন্দৰ্ভত চলি আছিল গুৰুত্বপূৰ্ণ আলোচনা। কিন্তু এই পাহাৰসম ব্যস্ততাৰ মাজতো মুখ্যমন্ত্ৰীৰ মনত থাকিল ৰাজ্যৰ এগৰাকী ভাগিনীৰ কথা। আৰক্ষী সন্মিলনৰ মাজতে এগৰাকী ভাগিনীৰ সৈতে কথা পাতি ‘জীৱন প্ৰেৰণা’ৰ আপডেট লোৱাৰ কথা ছ’চিয়েল মিডিয়াত নিজেই প্ৰকাশ কৰিলে মুখ্যমন্ত্ৰীগৰাকীয়ে। অৰ্থাৎ, চৰকাৰী কাম-কাজৰ ব্যস্ততাৰ মাজতো জনসাধাৰণৰ ব্যক্তিগত সমস্যাৰ খবৰ ৰখাৰ এক বাৰ্তা দিলে মুখ্যমন্ত্ৰীয়ে।
নিজৰ ফেচবুক পেজত মুখ্যমন্ত্ৰী হিমন্ত বিশ্ব শৰ্মাই লিখিছে— “দেৰগাঁৱৰ আৰক্ষী সন্মিলনত থাকোঁতেই ভাগিনীজনীৰ সৈতে কথা পাতিছিলোঁ। জীৱন প্ৰেৰণাৰ আপডেট লৈছিলোঁ। জীৱন প্ৰেৰণা পোৱাসকলে জনাবলৈ নাপাহৰিবা। DM কৰিবও পাৰিবা।” মুখ্যমন্ত্ৰীৰ এই বাৰ্তাই ‘জীৱন প্ৰেৰণা’ৰ সুবিধা লাভ কৰা তথা এতিয়াও সুবিধা লাভ নকৰা ছাত্ৰ-ছাত্ৰীৰ মাজত নতুনকৈ চৰ্চা সৃষ্টি কৰিছে। বিশেষকৈ, যোগ্য হিতাধিকাৰীসকলে কোনো কাৰণত আঁচনিৰ ধন লাভ নকৰিলে সেই বিষয়ে মুখ্যমন্ত্ৰীক অৱগত কৰাৰ সুযোগ থকাৰ কথাটো তেওঁ নিজেই স্পষ্ট কৰি দিছে।
মুখ্যমন্ত্ৰীৰ আহ্বান অনুসৰি, ‘জীৱন প্ৰেৰণা’ লাভ কৰা লোকসকলে নিজৰ আপডেট জনোৱাৰ লগতে যোগ্য হৈয়ো এতিয়াও ধন লাভ নকৰা স্নাতক উত্তীৰ্ণ ছাত্ৰ-ছাত্ৰীয়েও মুখ্যমন্ত্ৰীৰ সৈতে পোনপটীয়াকৈ যোগাযোগ কৰিব পাৰিব। আনকি ছ’চিয়েল মিডিয়াৰ DMৰ জৰিয়তেও বিষয়টো জনাব পাৰিব বুলি মুখ্যমন্ত্ৰীয়ে উল্লেখ কৰিছে। দেৰগাঁৱৰ গুৰুত্বপূৰ্ণ আৰক্ষী সন্মিলনত ৰাজ্যৰ আইন-শৃংখলা পৰিস্থিতি লৈ ব্যস্ত থকাৰ সময়তো ‘জীৱন প্ৰেৰণা’ৰ দৰে জনকল্যাণমূলক বিষয়ৰ আপডেট লোৱাটো মুখ্যমন্ত্ৰীৰ এই পোষ্টৰ অন্যতম গুৰুত্বপূৰ্ণ দিশ হিচাপে পৰিগণিত হৈছে।
ৰাজ্যৰ ছাত্ৰ-ছাত্ৰীৰ ভৱিষ্যতৰ সৈতে জড়িত কথা সকলোতকৈ আগত, এয়াই যেন মুখ্যমন্ত্ৰীৰ এই বাৰ্তাত প্ৰতিফলিত হৈছে। ব্যস্ততাৰ মাজতো এগৰাকী ‘ভাগিনী’ৰ সৈতে কথা পাতি তেওঁৰ সুবিধাৰ খবৰ লোৱাটোৱে চৰকাৰী আঁচনিৰ হিতাধিকাৰীসকলৰ সৈতে পোনপটীয়া সংযোগৰ এক উদাহৰণো দাঙি ধৰিছে। মুখ্যমন্ত্ৰীৰ এই বাৰ্তাৰ মূল আহ্বান স্পষ্ট—‘জীৱন প্ৰেৰণা’ৰ সুবিধা লাভ কৰা সকলে নিজৰ খবৰ জনাওক আৰু যোগ্য হৈয়ো সুবিধা লাভ নকৰাসকলে বিষয়টো জনাওক। অৰ্থাৎ, প্ৰশাসনৰ ব্যস্ততাৰ মাজতো হিতাধিকাৰীৰ কণ্ঠ যাতে মুখ্যমন্ত্ৰীৰ ওচৰলৈ পোনপটীয়াকৈ যায়, তাৰ বাবে এক মুকলি পথৰ কথাই তেওঁ আগবঢ়াইছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
