অক্টোবৰ মাহত কেন্দ্ৰীয় কৰ্মচাৰী আৰু পেঞ্চনভোগী কৰ্মীৰ বাবে স্বস্তিৰ কাৰণ হ’ব বুলি ধাৰণা কৰা হৈছে৷ মিডিয়া ৰিপৰ্ট অনুসৰি চৰকাৰে দীপাৱলিৰ পূৰ্বে দুটাকৈ ডাঙৰ ঘোষণা কৰিব পাৰে৷ প্ৰথমতে মহাৰ্ঘ ভাট্টা(DA) আৰু মহাৰ্ঘ ত্ৰাণ(DR) বৃদ্ধি, দ্বিতীয়তে দীৰ্ঘকাল ধৰি আহিব আহিব বুলি ৰৈ থকা অষ্টম বেতন কমিছন গঠনৰ বিজ্ঞাপ্তি৷ যদি সঁচাকৈয়ে অষ্টম পে কমিছন কাৰ্যকৰী হয় তেতিয়া প্ৰায় ১.২ কোটি কেন্দ্ৰীয় চৰকাৰৰ কৰ্মচাৰী আৰু পেঞ্চনভোগীয়ে এই চৰকাৰী সুবিধা লাভ কৰিব৷
মহাৰ্ঘ ভাট্টা কিমান বাঢ়িব?
বৰ্তমান কেন্দ্ৰীয় কৰ্মচাৰীয়ে ৫৫শতাংশ মহাৰ্ঘ ভাট্টা পায়৷ শেহতীয়া তথ্যৰ ভিত্তিত অনুমান কৰা হৈছে যে চৰকাৰে এই মহাৰ্ঘ ভাট্টা ৩ শতাংশলৈ বৃদ্ধিৰ ঘোষণা কৰিব পাৰে৷ এই সংশোধনী ২০২৫ চনৰ জুলাইৰ পৰা কাৰ্যকৰ কৰা হব৷ অৰ্থাৎ কৰ্মচাৰীয়ে অক্টোবৰৰ দৰমহাৰ সৈতে বা পেঞ্চনৰ সৈতে শেষ তিনি মাহৰ বকেয়াও পাব পাৰে৷ উল্লেখ্য যে চৰকাৰে প্ৰতি বছৰ দুবাৰকৈ ডি এ সংশোধন কৰে৷ প্ৰথমে জানুৱাৰীৰ পৰা জুন মাহৰ ভিতৰত আৰু দ্বিতীয়টো জুলাইৰ পৰা ডিচেম্বৰৰ ভিতৰত৷ এই বছৰ দীপাৱলি ২০-২১ অক্টোবৰত আৰু ধাৰণা কৰা হৈছে অক্টোবৰৰ প্ৰথম সপ্তাহত এই ঘোষণা কৰা হ’ব৷ বিগত বছৰ চৰকাৰে ১৬ অক্টোবৰত ডি এ বৃদ্ধিৰ ঘোষণা কৰিছিল৷
অষ্টম বেতন কমিছন সম্পৰ্কে প্ৰত্যাশা
কেন্দ্ৰীয় কৰ্মচাৰীসকলৰ মাজত এতিয়া সকলোতকৈ চৰ্চাত বিষয় হৈছে অষ্টম বেতন কমিছন৷ ২০২৫ চনৰ জানুৱাৰীত চৰকাৰে কমিছন গঠনৰ ইংগিত দিছিল, কিন্তু এতিয়াও ইয়াৰ বিজ্ঞাপ্তি জাৰি কৰা নহল৷ বহুতেই চৰ্চা চলাইছে যে দীপাৱলিৰ পূৰ্বে এই বিষয়ে সিদ্ধান্ত লোৱা হব পাৰে৷
চৰকাৰৰ ওপৰত চাপ বৃদ্ধি
অষ্টম বেতন কমিছনক লৈ কৰ্মচাৰী সংগঠনসমূহে ক্ৰমাগতভাৱে চাপ দি আছে৷ সম্প্ৰতি ৰে’ল কৰ্মচাৰীসকলৰ ইউনিয়নসমূহে দাবী তুলিছে যে চৰকাৰে যিমান পাৰে সোনকালে বিজ্ঞাপ্তি জাৰি কৰক৷ অল ইণ্ডিয়া ৰে’লৱে এমপ্লয়িজ ফেডাৰেছনে ১৯ ছেপ্টেম্বৰত দেশব্যাপী আন্দোলনৰো ধমকি দিছে৷ উল্লেখ্য যে সপ্তম দৰমহা কমিছনৰ ম্যাদ ২০২৫ চনৰ ডিচেম্বৰত শেষ হৈছে সেয়ে নতুন কমিছনৰ ঘোষণা বেছি দিন স্থগিত ৰখা সম্ভৱ নহয় বুলিও ধাৰণা কৰা হৈছে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
