পাকিস্তান মন্ত্ৰীসভাত তেওঁ আছিল হিন্দু সাংসদ, ভাৰতলৈ আহি আজি কুলফি বিক্ৰি কৰি সংসাৰ চলাইছে পাক আইনপ্ৰণেতাই, আঁৰত কি কাৰণ?

৩৪ জন সদস্যৰে এখন ভৰপুৰ সংসাৰ দাবায়া ৰামৰ৷ সোধপোছৰ পাছত ভাৰত চৰকাৰৰ অনুমতিতেই তেওঁলোকক ঘৰলৈ যাবলৈ দিয়া হৈছে৷ ফতেহাবাদ জিলাৰ ৰাতিয়া তহছিলৰ ৰতনগড় গাওঁৰ ঘৰলৈ উভতি যোৱাৰ অনুমতি দিয়া হৈছে ৰামৰ পৰিয়ালৰ অইন ২৮ জন সদস্যকো৷

দেশবিভাজনৰ দুবছৰ পূৰ্বে পাকিস্তানৰ পঞ্জাৱত জন্ম হৈছিল ৰামৰ৷ দেশবিভাজনৰ ফলত তীব্ৰ যন্ত্ৰণাৰে দিন কটাব লগা হৈছিল ৰামৰ পৰিয়ালে৷ সংখ্যালঘূসকলৰ ওপৰত তীব্ৰ চাপ থকা স্বত্ত্বেও ১৯৪৭ চনৰ পাছত সেই দেশতেই থাকি যায় তেওঁলোক৷ সেই দেশত থকাৰ সময়ত তেওঁলোকক ধৰ্মান্তৰণৰ প্ৰৱল চাপো দিয়া হৈছিল৷

পাকিস্তানত জন্মৰ সময়ত তেওঁৰ নাম দেশৰাজ ৰখা হৈছিল৷ নিৰ্বাচনৰ পূৰ্বে ভোটাৰ কাৰ্ড তৈয়াৰ কৰিবলৈ আহোতে পাক কৰ্মকৰ্তাসকলে জোৰ কৰি তেওঁৰ নাম পৰিবৰ্তন কৰি দাবায়া ৰাম ৰাখে৷ ১৯৮৮ চনৰ পাকিস্তানৰ জাতীয় পৰিষদৰ সদস্যৰ তালিকাত তেওঁৰ নাম আল্লাহ দাবায়া হিচাপে ৰখা হয়৷ এনেকৈয়ে নামৰ পৰিবৰ্তন কৰি তেওঁক ধৰ্মান্তৰণৰ বাবে জোৰ দি থাকে পাক অধিকাৰীসকলে৷ ইয়াৰ বিৰোধীতা কৰি নিজৰ অস্তিত্ব ধৰি ৰাখে ৰামৰ পৰিয়ালে৷ সময়ৰ লগে লগে পৰিস্থিতি কিন্তু ভালৰ বিপৰীতে বেয়াৰ ফালেই গৈ থাকে৷ এই পৰিস্থিতিতেই ৰাজনীতিৰ ময়দানত ভৰি থয় ৰামে৷ সাংসদৰ স্থান লোৱাৰ বাবে আৰম্ভ হয় তেওঁৰ যুঁজ৷ এসময়ত ৰাজনীতিৰ ময়দানত হিন্দু নাগৰিকৰ শক্তিশালী জনপ্ৰতিনিধি হিচাপে উজলি উঠে ৰাম৷

১৯৮৮ চনত লোহিয়া আৰু বখাৰ জিলাৰ জনপ্ৰতিনিধি নিৰ্বাচিত হৈ পাক সংসদৰ সদস্য হয় ৰাম৷ সাংসদ হোৱাৰ পাছত তেওঁৰ পৰিয়ালত আৰম্ভ হয় সংখ্যাগুৰুৰ উপদ্ৰৱ৷ তেওঁৰ পৰিয়ালৰ এগৰাকী যুৱতীক জোৰকৈ উঠাই নি মুছলমান যুৱকৰ সৈতে বিয়া কৰোৱায় দিয়ে তাৰেই স্থানীয় সংখ্যাগুৰুসকলে৷ ধৰ্মীয় মৌলবাদীৰ বিৰুদ্ধে যুঁজ দিবলৈ গৈ প্ৰায় সকলোখিনিয়েই হেৰুৱাই পেলায় ৰামে৷ ধন সম্পত্তি সকলোবোৰ হেৰুৱালেও ৰামে আত্মবিশ্বাস হেৰুওৱা নাছিল৷ আত্মীয়ক এনেকৈ বলপূৰ্বক ধৰ্মান্তৰিত কৰাই বিয়া কৰোৱা কাৰ্যক লৈ আদালতৰ কাষ চাপে ৰাম৷ প্ৰথমে উচ্চ ন্যায়ালয় আৰু পাছলৈ উচ্চতম ন্যায়ালয়ৰো কাষ চাপে ৰাম৷ কিন্তু পাক উচ্চতম ন্যায়ালয়ে তেওঁৰ সেই গোচৰ খাৰিজ কৰে৷ সেই ঘটনাৰ পাছতেই পাকিস্তানত নিৰাপদ নহয় বুলি বুজি উঠে ৰামে৷ প্ৰায় ৫২ বছৰতকৈ বেছি সময় কটোৱা জন্মভূমি ত্যাগ কৰি তেওঁ ভাৰতলৈ অহাৰ বাবে আবেদন কৰে৷