অসম লাইভ২৪ঃ দলিত যুৱকক মাৰপিট কৰি, কাণত ধৰাই উঠা বহা কৰোৱাই নহয় আৰক্ষীৰ জোঁতা চেলেকিবলৈকো বাধ্য কৰোৱাইছিল। এই ঘটনা উত্তৰ প্ৰদেশৰ। বিগত বৃহস্পতিবাৰে যোগী আদিত্যনাথৰ ৰাজ্য সোনভদ্ৰ জিলাত এই ঘটনা। ইতিমধ্যে সেই বিশেষ ভিডিঅ’ক লৈ দেশজুৰি আৰম্ভ হৈছে চৰ্চা। সমাজবাদী পাৰ্টিৰ প্ৰধান অখিলেখ যাদৱে বিশেষ ভিডিঅ’টো টুইট কৰি যোগী চৰকাৰক আক্ৰমণৰ লক্ষ্য কৰি লৈছে।
মধ্যপ্ৰদেশৰ পাছতেই এইবাৰ উত্তৰপ্ৰদেশ। দলিত যুৱকক মাৰধৰ কৰি জোতা চেলেকিবলৈকো বাধ্য কৰাইছিল। আৰক্ষী সূত্ৰৰ খবৰ অনুসৰি ৰাজেন্দ্ৰ নামৰ দলিত সম্প্ৰদায়ৰ যুৱকজনে তেওঁৰ আত্মীয়ৰ ঘৰলৈ আহোতেই এই ঘটনা। ৰাজেন্দ্ৰ পেছাত এগৰাকী ইলেক্ট্ৰিক মিস্ত্ৰি। তেওঁ যাৰ ঘৰলৈ ফুৰিবলৈ আহিছিল তেওঁলোকৰ বাসগৃহত বিদ্যুতৰ খুঁটাত এক সমস্যাই দেখা দিয়ে। ৰাজেন্দ্ৰই বিশেষ কামটো কৰি পেলালে। ৰাজেন্দ্ৰৰ এই প্ৰতিভা দেখিয়েই চুবুৰীয়া বহুজনে ৰাজেন্দ্ৰক ঘৰৰ পৰা কামৰ বাবে মতা আৰম্ভ কৰে।
ৰাজেন্দ্ৰই এনেদৰে কাম কৰিবলৈ আৰম্ভ কৰাত চুবুৰীয়া বহু মিস্ত্ৰিয়ে আপত্তি দৰ্শাই। স্থানীয় ইলেক্ট্ৰিক মিস্ত্ৰি তেজবালি সিংহ পেটেলে কাম হেৰুৱাৰ বাবেই ৰাজেন্দ্ৰক মাতি মাৰপিট কৰে। তৰপাছতেই কাণত ধৰাই উঠা বহা কৰোৱাই ৰাজেন্দ্ৰক। মাৰপিট কৰোৱাতেই শান্ত নাথাকি ৰাজেন্দ্ৰক জোতা চেলেকিবলৈ দিয়া হয়। সমগ্ৰ ঘটনাক লৈ অখিলেখ যাদৱৰ টুইট, ‘উত্তৰপ্ৰদেশৰ সোনভদ্ৰৰ ঘটনা মধ্যপ্ৰদেশৰ ঘটনাতকৈ কোনো গুণে কম নহয়। এতিয়া যোগী চৰকাৰে দোষীৰ ঘৰত বুলডোজাৰ চলাবনে? বিজেপিৰ লোকসকলে দলিতক উৎপীড়নৰ ইতিহাস ৰচনা কৰিছে।’ অৱশ্যে আৰক্ষীয়ে অভিযুক্ত ইলেক্ট্ৰিক মিস্ত্ৰি তেজবালিক গ্ৰেপ্তাৰ কৰিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
