দুবছৰ পূৰ্বে যিগৰাকী মহিলাক মৃত বুলি ভাবি পৰিয়ালে শেষকৃত্য সম্পন্ন কৰিছিল, সেই ২৮ বছৰীয়া মহিলাগৰাকীয়ে ৫ ছেপ্টেম্বৰত হঠাতে জীৱিত অৱস্থাত নিজৰ ঘৰলৈ উভতি আহে। শিৱানী নামৰ ঘৰলৈ ঘূৰি অহাৰ পিছতে এতিয়া আটাইতকৈ ডাঙৰ প্ৰশ্নটো হৈছে—যদি শিৱানী জীৱিত আছিল, তেন্তে দুবছৰ পূৰ্বে নলাৰ পৰা উদ্ধাৰ হোৱা আৰু ভৈনছাকুণ্ডত দাহ কৰা মৃ*তদেহটো কাৰ আছিল? চাঞ্চল্য সৃষ্টি কৰা এই ঘটনা সংঘটিত হৈছে উত্তৰ প্ৰদেশৰ ৰাজধানী লক্ষ্ণৌৰ বাক্ষী কা তালাব (BKT) অঞ্চলত। লগতে, আৰক্ষীৰ তদন্ত পদ্ধতি আৰু মৃ*তদেহ চিনাক্তকৰণ ব্যৱস্থাক লৈ ডাঙৰ প্ৰশ্নৰ সৃষ্টি কৰিছে।
তথ্য অনুসৰি, BKTৰ নৱিকোট নন্দনা অঞ্চলৰ বাসিন্দা সৰ্বেশ সিং ওৰফে হীগুৰ কন্যা শিৱানীৰ ২০২০ চনৰ ২২ এপ্ৰিলত সীতাপুৰৰ শ্বাকতাপুৰৰ বাসিন্দা আনন্দ সিঙৰ সৈতে বিবাহ হৈছিল। অভিযোগ অনুসৰি, বিবাহৰ কিছুদিন পিছতে শহুৰেকৰ পৰিয়ালে ভূমি দাবী কৰি শিৱানীক মানসিকভাৱে হাৰাশাস্তি কৰিবলৈ আৰম্ভ কৰিছিল। পৰিস্থিতি ক্ৰমাৎ বেয়া হোৱাত শিৱানীৰ পিতৃ-মাতৃয়ে তেওঁক নিজৰ ঘৰলৈ লৈ আহিছিল। ২০২৪ চনৰ ২ মে’ত শিৱানীয়ে নিজৰ পৰিচয় পত্ৰ আনিবলৈ ভিখাপুৰলৈ যোৱা আৰু ইন্দোৰবাগ CHCত পেটৰ বিষৰ চিকিৎসা লোৱাৰ কথা কৈ ঘৰৰ পৰা ওলাই গৈছিল। কিন্তু সেইদিন ধৰি তেওঁ ঘৰলৈ উভতি নাহিল। পৰিয়ালৰ লোকে আত্মীয়-স্বজনৰ ঘৰকে ধৰি বিভিন্ন ঠাইত বিচাৰ-খোঁচাৰ কৰিও কোনো সন্ধান নোপোৱাত ৪ মে’ত BKT থানাত শিৱানী নিৰুদ্দেশ হোৱা বুলি অভিযোগ দাখিল কৰে।
শিৱানী নিৰুদ্দেশ হোৱাৰ প্ৰায় ডেৰ-দুমাহ পিছত, ২০২৪ চনৰ ১৬ জুলাইত ছাইৰাপুৰ আৰক্ষী থানাৰ অন্তৰ্গত IIM ৰোডৰ পিছফালে থকা এটা নলাৰ পৰা এগৰাকী মহিলাৰ পচি যোৱা মৃ*তদেহ উদ্ধাৰ কৰা হয়। মৃতদেহটো চিনাক্ত কৰিব নোৱাৰা অৱস্থাত আছিল। ঘটনাৰ খবৰ পোৱাৰ পিছত শিৱানীৰ পৰিয়ালৰ লোক ঘটনাস্থলীলৈ যায়। মৃ*তদেহটোৰ আঙুলিত থকা আঙঠি আৰু হাতৰ ব্ৰেচলেট দেখি পৰিয়ালৰ লোকে সেইটো শিৱানীৰ মৃ*তদেহ বুলি চিনাক্ত কৰে।
আৰক্ষীয়ে মৃ*তদেহৰ পৰিচয় নিশ্চিত কৰিবলৈ DNA নমুনাও সংগ্ৰহ কৰিছিল। কিন্তু DNA পৰীক্ষাৰ ফলাফল অহাৰ পূৰ্বেই পৰিয়ালৰ লিখিত চিনাক্তকৰণৰ ভিত্তিত মৃ*তদেহটো তেওঁলোকক গতাই দিয়া হয়। পিছত ভৈনছাকুণ্ডত মৃ*তদেহটোৰ শেষকৃত্য সম্পন্ন কৰা হয়।
কিন্তু বিগত ৫ ছেপ্টেম্বৰৰ সন্ধিয়া ঘটনাটোৱে সম্পূৰ্ণ নতুন ৰূপ লয়। হঠাতে শিৱানী নিজৰ গাঁও নৱিকোট নন্দনাৰ ঘৰলৈ উভতি আহে। দুবছৰ পূৰ্বে যিগৰাকী কন্যাক মৃ*ত বুলি ভাবি পৰিয়ালে শেষকৃত্য সম্পন্ন কৰিছিল, সেইগৰাকী কন্যাকে জীৱিত অৱস্থাত সন্মুখত দেখি পৰিয়ালৰ লোক স্তম্ভিত হৈ পৰে। ঘটনাৰ পিছতে পৰিয়ালে BKT আৰক্ষী আৰু স্থানীয় প্ৰশাসনক বিষয়টো অৱগত কৰে। শিৱানীৰ উভতি অহাৰ খবৰে আৰক্ষীৰ মাজতো তীব্ৰ চাঞ্চল্যৰ সৃষ্টি কৰে।
এতিয়া আৰক্ষীৰ তদন্তৰ কেন্দ্ৰবিন্দু হৈছে—২০২৪ চনৰ ২ মে’ত ঘৰৰ পৰা ওলাই যোৱাৰ পিছত শিৱানী ইমানদিন ক’ত আছিল? এই সময়ছোৱাত তেওঁ কাৰ সৈতে আছিল, কিয় পৰিয়ালৰ সৈতে কোনো যোগাযোগ কৰা নাছিল আৰু এতিয়া হঠাতে কিয় ঘৰলৈ উভতি আহিল—এই সকলোবোৰ প্ৰশ্নৰ উত্তৰ বিচাৰিবলৈ আৰক্ষীয়ে শিৱানীৰ পৰা তথ্য সংগ্ৰহ কৰি আছে।
শিৱানী জীৱিত বুলি নিশ্চিত হোৱাৰ পিছত এতিয়া গোচৰটোৰ আটাইতকৈ ডাঙৰ ৰহস্য হৈ পৰিছে ২০২৪ চনত নলাৰ পৰা উদ্ধাৰ হোৱা সেই অচিনাক্ত মহিলাগৰাকী। ভৈনছাকুণ্ডত যিগৰাকী মহিলাৰ শেষকৃত্য সম্পন্ন কৰা হৈছিল, তেওঁ প্ৰকৃততে কোন আছিল? তেওঁ আন কোনো ঠাইৰ পৰা নিৰুদ্দেশ হোৱা মহিলা আছিল নেকি? নে তেওঁৰ মৃ*ত্যুৰ আঁৰত কোনো অপৰাধ জড়িত আছিল?
এই প্ৰশ্নবোৰৰ উত্তৰ এতিয়া নতুনকৈ বিচাৰিব লাগিব আৰক্ষীয়ে। লগতে পূৰ্বৰ তদন্তত DNA পৰীক্ষাৰ ফলাফল অহাৰ পূৰ্বেই কেৱল অলংকাৰৰ ভিত্তিত মৃ*তদেহ চিনাক্ত কৰাৰ সিদ্ধান্ত কিয় লোৱা হৈছিল, সেই বিষয়েও প্ৰশ্ন উত্থাপন হৈছে। শিৱানীৰ উভতি অহাৰ পিছত দুবছৰ পূৰ্বে বন্ধ হোৱা গোচৰটোৱে যেন পুনৰ নতুন ৰূপ লৈছে। এতিয়া আৰক্ষীৰ সন্মুখত দুটা ডাঙৰ প্ৰশ্ন—শিৱানী দুবছৰ ক’ত আছিল আৰু নলাত উদ্ধাৰ হোৱা মৃ*তদেহটো আচলতে কাৰ আছিল?
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
