চৰকাৰৰ নিয়ন্ত্ৰণত থাকিব ব্যক্তিগত সম্পত্তি, আহি গ’ল নতুন আইন!

চীনত ব্যক্তিগত সম্পত্তি সন্দৰ্ভত নতুনকৈ চৰ্চালৈ অহা বিষয়টোক লৈ বহু সংবাদত ‘সংকটৰ সময়ত চৰকাৰে নাগৰিকৰ সম্পত্তি নিজৰ নিয়ন্ত্ৰণলৈ ল’ব পাৰিব’ বুলি কোৱা হৈছে। কিন্তু ইয়াৰ আঁৰত থকা আইনখনৰ বিষয়ে এটা গুৰুত্বপূৰ্ণ কথা স্পষ্ট কৰা প্ৰয়োজন—এয়া সম্পূৰ্ণ নতুনকৈ সৃষ্টি হোৱা ক্ষমতা নহয়; চীনে ২০১০ চনৰ পৰাই ৰাষ্ট্ৰীয় প্ৰতিৰক্ষা মোবিলাইজেচনৰ আইনত এনে ব্যৱস্থাৰ কথা ৰাখিছিল। ২০২৬ চনৰ ২৮ আগষ্টত এই আইনখন সংশোধন কৰা হৈছে আৰু সংশোধিত আইন ১ অক্টোবৰ ২০২৬ৰ পৰা কাৰ্যকৰী হ’ব।

চীনৰ নতুন সংশোধিত আইনত কি কোৱা হৈছে?

চীনৰ সংশোধিত National Defense Mobilization Lawৰ মূল লক্ষ্য হৈছে যুদ্ধ বা ৰাষ্ট্ৰীয় সুৰক্ষাৰ ডাঙৰ সংকটৰ সময়ত দেশৰ সামৰিক বাহিনীৰ লগতে সমাজ আৰু অৰ্থনীতিৰ বিভিন্ন সম্পদকো একেলগে ব্যৱহাৰ কৰিব পৰা ব্যৱস্থা শক্তিশালী কৰা। অৰ্থাৎ, কেৱল সেনাবাহিনীৰ ওপৰত নিৰ্ভৰ নকৰি প্ৰয়োজন হ’লে অসামৰিক সম্পদো ৰাষ্ট্ৰীয় প্ৰতিৰক্ষাৰ কামত ব্যৱহাৰ কৰিব পাৰিব। সহজ ভাষাত ক’বলৈ গ’লে, যদি দেশৰ সাৰ্বভৌমত্ব, ভূখণ্ড, নিৰাপত্তা বা আন গুৰুত্বপূৰ্ণ ৰাষ্ট্ৰীয় স্বাৰ্থৰ ওপৰত ডাঙৰ ভাবুকি আহে আৰু চৰকাৰে ৰাষ্ট্ৰীয় প্ৰতিৰক্ষা মোবিলাইজেচন ঘোষণা কৰে, তেন্তে চৰকাৰৰ হাতত অসামৰিক সম্পদ সংগ্ৰহ বা ব্যৱহাৰ কৰাৰ আইনী ক্ষমতা থাকিব। চীনৰ National Defense Lawতো ৰাষ্ট্ৰীয় প্ৰতিৰক্ষা মোবিলাইজেচনৰ সময়ত সংগঠন আৰু ব্যক্তিৰ যন্ত্ৰপাতি, সুবিধা, যান-বাহন, স্থান আৰু অন্যান্য সম্পত্তি অধিগ্ৰহণ বা সাময়িকভাৱে ব্যৱহাৰ কৰাৰ ব্যৱস্থা আছে।

কেনেধৰণৰ সম্পত্তি ব্যৱহাৰ কৰিব পাৰে?

আইনৰ অধীনত ‘civilian resources’ বা অসামৰিক সম্পদৰ ভিতৰত ব্যক্তি আৰু সংস্থাৰ মালিকানাধীন বা ব্যৱহৃত—
যান-বাহন
যন্ত্ৰপাতি আৰু বিভিন্ন সা-সঁজুলি
নিৰ্দিষ্ট স্থাপনা বা সুবিধা
কোনো কোনো ক্ষেত্ৰত ব্যৱহাৰযোগ্য স্থান
উৎপাদন আৰু সেৱাৰ সৈতে জড়িত অন্যান্য সম্পদ অন্তৰ্ভুক্ত হ’ব পাৰে। সংশোধিত আইন অনুসৰি, ৰাষ্ট্ৰীয় প্ৰতিৰক্ষা মোবিলাইজেচনৰ সিদ্ধান্ত লোৱাৰ পাছত যদি মজুত থকা সামৰিক সম্পদে প্ৰয়োজন পূৰণ কৰিব নোৱাৰে, তেন্তে স্থানীয় চৰকাৰে আইনৰ নিৰ্দিষ্ট ক্ষমতা আৰু প্ৰক্ৰিয়া অনুসৰি অসামৰিক সম্পদ অধিগ্ৰহণ বা ব্যৱহাৰৰ বাবে ল’ব পাৰে। অৱশ্যে ‘চৰকাৰে যিকোনো সময়তে নাগৰিকৰ ঘৰ-বাৰী বা সম্পত্তি লৈ ল’ব পাৰিব’—এনে অধিকাৰ চৰকাৰক এই আইনে নিদিয়ে। সংশোধিত National Defense Mobilization Lawত ব্যক্তি আৰু পৰিয়ালৰ দৈনন্দিন জীৱনৰ বাবে অত্যাৱশ্যকীয় সামগ্ৰী আৰু বাসস্থান এনে সম্পদৰ তালিকাত ৰখা হৈছে যিবোৰ সাধাৰণতে অধিগ্ৰহণ বা ব্যৱহাৰৰ পৰা ৰেহাই পাব। শিশুৰ যত্ন কেন্দ্ৰ, বৃদ্ধাশ্ৰম, প্ৰতিবন্ধী পুনৰ্বাসন কেন্দ্ৰ আদি সামাজিক কল্যাণমূলক প্ৰতিষ্ঠানৰ জীৱনধাৰণৰ বাবে প্ৰয়োজনীয় সামগ্ৰী আৰু বাসস্থানৰ ক্ষেত্ৰতো ৰেহাইৰ ব্যৱস্থা আছে।

কেতিয়া এই ব্যৱস্থা প্ৰয়োগ হ’ব?

এই ক্ষমতা সাধাৰণ পৰিস্থিতিত দৈনন্দিনভাৱে ব্যৱহাৰ কৰাৰ বাবে নহয়। National Defense Law অনুসৰি, চীনৰ সাৰ্বভৌমত্ব, একতা, ভূখণ্ডৰ অখণ্ডতা, নিৰাপত্তা বা উন্নয়নমূলক স্বাৰ্থ ভাবুকিৰ সন্মুখীন হ’লে দেশজুৰি বা নিৰ্দিষ্ট অঞ্চলত ৰাষ্ট্ৰীয় মোবিলাইজেচন কৰিব পাৰে। ৰাষ্ট্ৰীয় মোবিলাইজেচনৰ অৰ্থ হৈছে—সেনা আৰু ৰিজাৰ্ভ বাহিনীৰ প্ৰস্তুতিৰ লগতে অৰ্থনীতি, পৰিবহণ, উৎপাদন, সামগ্ৰী আৰু অন্যান্য অসামৰিক সম্পদকো যুদ্ধ বা জাতীয় সংকটৰ প্ৰয়োজন অনুসৰি সংগঠিত কৰা।

এই প্ৰতিবেদন যুগুতাইছে মানসজ্যোতিয়ে

এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ