যৌন সক্ষমতা বঢ়োৱা ঔষধ হিচাপে ভায়েগ্ৰাৰ নাম প্ৰায় সকলোৱেই জানে৷ বহু পুৰুষেই দ্ৰুত ফল পাবলৈ কিংবা যৌনজীৱনত অধিক তৃপ্ত হ’বলৈ চিকিৎসকৰ পৰামৰ্শ অবিহনেই এই ঔষধ সেৱন কৰে৷ অতিৰিক্ত ভায়েগ্ৰা খোৱা শৰীৰৰ বাবে যেনেকৈ বিপজ্জনক, তেনেকৈ প্ৰাণঘাতীও হব পাৰে৷ বিশেষজ্ঞসকলৰ মতে যৌন সুখৰ মোহত ভায়েগ্ৰাৰ অপব্যৱহাৰ কৰিলে নানান ধৰণৰ শাৰীৰিক আৰু মানসিক সমস্যাই দেখা দিব পাৰে৷
প্রথমেই জানি থোৱা ভাল যে ভায়েগ্ৰাই মূলত ৰক্তনলী শিথিল কৰি লিংগত ৰক্তপ্ৰবাহ বঢ়ায়৷ যাৰ ফলত সাময়িকভাৱে উত্থান সহজ হয়৷ কিন্তু দেহত প্ৰয়োজনীয় মাত্ৰাতকৈ বেছি এই ঔষধ গ্ৰহণ কৰিলে ৰক্তচাপ অস্বাভাৱিকভাৱে নামি যায়৷ ইয়াৰ ফলত মূৰ ঘূৰোৱা, বুকুৰ ধৰফৰণি, অজ্ঞান হৈ যোৱাৰ দৰে ঘটনা ঘটিব পাৰে৷ হৃদৰোগৰ আক্ৰান্ত ব্যক্তিৰ বাবে ই অতি ভয়ানক৷ কাৰণ ইয়াৰ ফলত হঠাৎ হাৰ্ট এটেক বা ষ্ট্ৰোকৰ আশংকা বাঢ়ি যায়৷ অতিৰিক্ত ভায়েগ্ৰা সেৱনৰ আৰু এটা পাৰ্শ্বপ্ৰতিক্ৰিয়া হৈছে প্ৰিয়াপিজম৷ অৰ্থাৎ দীৰ্ঘ সময় ধৰি বেদনাদায়ক লিংগোত্থান হোৱা৷ ই অবহেলা কৰিলে লিংগৰ টিছ্যু স্থায়ীভাৱে ক্ষতিগ্ৰস্থ হব পাৰে আৰু ভৱিষ্যতে সম্পূৰ্ণ যৌন অক্ষমতাও আহিব পাৰে৷
কেৱল সেয়াই নহয় চকুৰ ওপৰতো ইয়াৰ ক্ষতিকৰ প্ৰভাৱ পৰে৷ হঠাৎ দৃষ্টিশক্তি কমি যোৱা, ৰং ঠিকমতে নেদেখা কিংবা একেবাৰে দৃষ্টিশক্তি হেৰুৱাৰ দৰে ঘটনাও চিকিৎসাশাস্ত্ৰৰ ইতিহাসত পোৱা গৈছে৷ অতিৰিক্ত সেৱনৰ ফলত কিডনিৰ ওপৰতো চাপ পৰে৷ মূৰৰ বিষ, হজমৰ খেলিমেলি, ডায়েৰিয়া, অতিৰিক্ত ঘাম ওলোৱা, টোপনিৰ সমস্যা ইত্যাদি ধৰণৰ পাৰ্শ্বপ্ৰতিক্ৰিয়া হলেও ঔষধৰ মাত্ৰা বাঢ়ি গলে আৰু মাৰাত্মক ৰূপ লব পাৰে৷
মনস্তাত্ত্বিক দিশৰ পৰাও আশংকা কম নহয়৷ বহুতেই ভায়েগ্ৰাৰ ওপৰত নিৰ্ভৰশীলো হৈ পৰে৷ স্বাভাৱিকভাৱে যৌনক্ষমতা থকাৰ পাছতো আত্মবিশ্বাস হেৰুৱাই ভায়েগ্ৰা প্ৰতিদিনে সেৱন কৰে৷ ইয়াৰ ফলত মানসিক চাপ, উদ্বেগ আৰু বিষন্নতা বাঢ়ি যায়৷ আনকি দাম্পত্যৰ সম্পৰ্কতো অবিশ্বাস আৰু অস্থিৰতা তৈয়াৰ হব পাৰে৷ বিশেষজ্ঞৰ মতে ভায়েগ্ৰা কেৱল চিকিৎসকৰ পৰামৰ্শতহে সঠিক মাত্ৰাত সেৱন কৰা উচিত৷ হৃদৰোগ, ডায়বেটিছ বা উচ্চ ৰক্তচাপত ভোগা ব্যক্তিয়ে নিজেই এই ঔষধ গ্ৰহণ কৰাটো বিপজ্জনক৷ যৌন সক্ষমতা বৃদ্ধিৰ বাবে প্ৰয়োজন হলে পূৰ্বে স্বাস্থ্য পৰীক্ষা কৰি কাৰণ নিৰ্ণয় কৰাই শ্ৰেয়৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
