ডায়েবেটিছ ৰোগীৰ বাবে এটা ভাল খবৰ। ডেনমাৰ্কৰ ঔষধ নিৰ্মাণ কোম্পানী ন’ভ’ নৰ্ডিস্কে ভাৰতত টাইপ ১ আৰু টাইপ ২ ডায়েবেটিছ ৰোগীৰ বাবে ইনচুলিন মুকলি কৰিছে। সপ্তাহত এবাৰকৈ ল’ব পৰা ইনচুলিন বেজী Awiqli (insulin icodec) মুকলি কৰিছে।
কোম্পানীটোৱে দাবী কৰিছে যে এইটো বিশ্বৰ প্ৰথমটো বেচেল ইনচুলিন, যিটো দৈনিক গ্ৰহণ কৰাৰ পৰিৱৰ্তে সপ্তাহত এবাৰহে গ্ৰহণ কৰিব লাগে।
৩৬৫ ৰ সলনি ৫২ টা বেজী
এই নতুন থেৰাপীত ৰোগীয়ে বছৰি ৩৬৫টা বেজীৰ পৰিৱৰ্তে মাত্ৰ ৫২টা বেজীহে ল’ব লাগিব। কোম্পানীটোৰ মতে, গ্লোবেল অনৱাৰ্ডছ-১ ক্লিনিকেল ট্ৰায়েলত আভিকলিয়ে দৈনিক ইনচুলিন গ্লাৰ্জিন-ইউ১০০ৰ তুলনাত তেজৰ চেনি (HbA1c) নিয়ন্ত্ৰণ আৰু নিৰাপদ মাত্ৰাত গ্লুক’জ দীঘলীয়া সময়ৰ বাবে ৰখাত সহায় কৰে।
ইয়াৰ উপৰিও অধিকাংশ ৰোগীয়ে গুৰুতৰ হাইপ’গ্লাইচেমিয়া (তেজৰ চেনিৰ পৰিমাণ অতি কম) নোহোৱাকৈয়ে নিজৰ লক্ষ্যত উপনীত হ’বলৈ সক্ষম হৈছিল।
এএনআইৰ তথ্য অনুসৰি নোভ’ নৰ্ডিস্ক ইণ্ডিয়াৰ পৰিচালন সঞ্চালক বিক্ৰান্ত শ্ৰোত্ৰিয়াই কয় যে, সপ্তাহত এবাৰ ইনচুলিন গ্ৰহণ কৰাৰ সুবিধাই বেজীৰ ভয়, চিকিৎসাৰ জটিলতা আৰু ৰোগীৰ মাজত নিয়মীয়া ঔষধ সেৱনৰ লগত জড়িত মানসিক বাধাসমূহ হ্ৰাস কৰিব পাৰে।
কোম্পানীটোৱে ইয়াৰ ৭০০ ইউনিট পেকৰ মূল্য ২৬১১ টকা, অৰ্থাৎ প্ৰতি ইউনিটৰ খৰচ প্ৰায় ৩.৭৩ টকা হ’ব, যিটো বৰ্তমানৰ বহু দৈনিক ইনচুলিন বিকল্পতকৈ কম বুলি কোৱা হৈছে।
সংবাদ মাধ্যমৰ তথ্যনুসৰি, ভাৰতত ১০ কোটিতকৈ অধিক লোক ডায়েবেটিছ ৰোগত আক্ৰান্ত হোৱাৰ বিপৰীতে প্ৰায় ১৩.৬ কোটি লোক প্ৰি-ডায়েবেটিছৰ শ্ৰেণীত আছে।
বিশেষজ্ঞসকলৰ মতে ভাৰতত ৰোগীয়ে ইনচুলিন থেৰাপী আৰম্ভ কৰাত গড়ে ৭ৰ পৰা ৯ বছৰ পলম হয়। গতিকে কম সঘনাই আৰু সহজ চিকিৎসা বিকল্পই এই পলম হ্ৰাস কৰাত মূল ভূমিকা ল’ব পাৰে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
