আগন্তুক অমাৱস্যা কাইলৈ মঙলবাৰ হোৱাৰ বাবে ভৌমৱতী অমাৱস্যাৰ শুভ সংযোগো গঠিত হৈছে। হিন্দু ধৰ্মীয় বিশ্বাস অনুসৰি, এই তিথি পিতৃপুৰুষক উৎসৰ্গিত। সেয়ে এই দিটোত পবিত্ৰ নদীত স্নান, পিতৃ-তৰ্পণ আৰু শ্ৰাদ্ধ কৰ্মৰ লগতে সামৰ্থ্য অনুসৰি দান-পুণ্য কৰাটো অতি শুভ বুলি গণ্য কৰা হয়।
পুৰাণ আৰু শাস্ত্ৰসমূহত কলিযুগত দানৰ বিশেষ মাহাত্ম্য বৰ্ণনা কৰা হৈছে। বিশ্বাস কৰা হয় যে, এই দিনা আন্তৰিকতাৰে দান কৰিলে পুণ্যফল লাভ হোৱাৰ লগতে পিতৃপুৰুষৰ আশীৰ্বাদে জীৱনত সুখ, শান্তি আৰু সমৃদ্ধি কঢ়িয়াই আনে।
১. ক’লা তিল দান
পিতৃ-তৰ্পণ আৰু শ্ৰাদ্ধ কৰ্মত ক’লা তিলৰ বিশেষ গুৰুত্ব আছে। ক’লা তিলক পিতৃপুৰুষৰ তৃপ্তিৰ প্ৰতীক বুলি ধৰা হয়। সেয়ে এই অমাৱস্যাৰ পুৱা শুভ মুহূৰ্তত পবিত্ৰ নদীত স্নান কৰি নিজৰ সামৰ্থ্য অনুসৰি দৰিদ্ৰ বা প্ৰয়োজনীয় ব্যক্তিক ক’লা তিল দান কৰিব পাৰে। বিশ্বাস অনুসৰি, ইয়াৰ ফলত পিতৃপুৰুষ সন্তুষ্ট হয় আৰু তেওঁলোকৰ আশীৰ্বাদে পৰিয়ালত সুখ-শান্তি বজাই ৰাখে। গৰুড় পুৰাণ আৰু ধৰ্মসিন্ধুতো ক’লা তিল দানৰ মাহাত্ম্য বৰ্ণনা কৰা হৈছে।
২. অন্ন দান
শাস্ত্ৰ অনুসৰি অন্নদানক মহাদান বুলি কোৱা হয়। এই অমাৱস্যাত দুখীয়া আৰু অভাৱগ্ৰস্ত লোকক অন্ন দান কৰাটো অতি পুণ্যৰ কাম বুলি গণ্য কৰা হয়।ধাৰণা আছে যে, এই অমাৱস্যাত অন্ন দান কৰিলে ঘৰত কেতিয়াও খাদ্যৰ অভাৱ নহয়। লগতে পিতৃপুৰুষো সন্তুষ্ট হয় আৰু জীৱনত ইতিবাচক শক্তিৰ সঞ্চাৰ হয়।
৩. বস্ত্ৰ দান
অমাৱস্যা তিথিত বস্ত্ৰ দান কৰাটোও অতি শুভ বুলি বিশ্বাস কৰা হয়। প্ৰয়োজনীয় লোকক কাপোৰ দান কৰাটো দয়া, সেৱা আৰু পুণ্যৰ প্ৰতীক। স্কন্দ পুৰাণতো বস্ত্ৰ দানৰ মাহাত্ম্য উল্লেখ কৰা হৈছে। সামৰ্থ্য অনুসৰি নতুন বা ব্যৱহাৰযোগ্য পৰিষ্কাৰ কাপোৰ দান কৰিলে জীৱনৰ বহু বাধা-বিঘিনি দূৰ হোৱাৰ লগতে সুখ-সমৃদ্ধি বৃদ্ধি পায় বুলি বিশ্বাস কৰা হয়।
৪. গো-সেৱা বা গৰুৰ বাবে খাদ্য দান
সনাতন পৰম্পৰাত গো-সেৱাক অতি পুণ্যদায়ক বুলি গণ্য কৰা হয়। পদ্ম পুৰাণ অনুসৰি, গৰুৰ সেৱা কৰিলে বিশেষ পুণ্যফল লাভ হয়। এই অমাৱস্যাৰ দিনা গৰুক ঘাঁহ, ভূঁহা, গুড়, চাৰা আদি খুৱাব পাৰে বা গৌশালাত সামৰ্থ্য অনুসৰি দান আগবঢ়াব পাৰে। বিশ্বাস কৰা হয়, ইয়াৰ ফলত জীৱনৰ নানা সমস্যা হ্ৰাস পায় আৰু উন্নতিৰ নতুন পথ মুকলি হয়।
৫. পানীভৰা ঘট বা ছাতি দান
এই সময়ত দুখীয়া বা প্ৰয়োজনীয় লোকক ছাতি, পানীভৰা ঘট, পানীয় জলৰ পাত্ৰ বা দৈনন্দিন ব্যৱহাৰৰ প্ৰয়োজনীয় সামগ্ৰী দান কৰাটোও পুণ্যদায়ক বুলি ধৰা হয়।
মৎস্য পুৰাণত এই ধৰণৰ দানক সেৱা আৰু পৰোপকাৰৰ এক উৎকৃষ্ট নিদৰ্শন বুলি বৰ্ণনা কৰা হৈছে। বিশ্বাস অনুসৰি, এনে দান কৰিলে জীৱনৰ বিভিন্ন বাধা-বিঘিনি হ্ৰাস পায় আৰু শুভ ফল লাভ হয়।
(দ্ৰষ্টব্য: ওপৰত উল্লেখ কৰা বিষয়সমূহ হিন্দু ধৰ্মীয় বিশ্বাস, পুৰাণ আৰু শাস্ত্ৰত বৰ্ণিত ধাৰণাৰ ওপৰত ভিত্তি কৰি লিখা হৈছে। বিভিন্ন অঞ্চল আৰু পৰম্পৰা অনুসৰি আচাৰ-অনুষ্ঠানত কিছু পাৰ্থক্য থাকিব পাৰে।)
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
