গ্ৰীষ্মকাল বুলিলেই মনলৈ আহে ৰসাল আৰু সুগন্ধি আমৰ কথা। ফলৰ ৰজা বুলি পৰিচিত আমৰ সোৱাদ প্ৰায় সকলোৰে প্ৰিয়। কিন্তু বহুতে বিশ্বাস কৰে যে মধুমেহ ৰোগীয়ে আম একেবাৰে খাব নালাগে। বিশেষজ্ঞসকলৰ মতে, বিষয়টো তেনে নহয়। কেৱল ডায়বেটিছ ৰোগীয়েই নহয়, আন কিছুমান বিশেষ স্বাস্থ্যজনিত সমস্যাত ভুগি থকা লোকেও আম সীমিত পৰিমাণে খোৱাটো উচিত।
আমত কি কি পুষ্টিগুণ থাকে?
১০০ গ্ৰাম আমত প্ৰায় ৬০ কিলোকেলৰি শক্তি, ১৫ গ্ৰাম কাৰ্বোহাইড্ৰেট, ১৩.৭ গ্ৰাম প্ৰাকৃতিক চেনি, ১.৬ গ্ৰাম ফাইবাৰ, ০.৮ গ্ৰাম প্ৰ’টিন, ৩৬.৪ মিলিগ্ৰাম ভিটামিন–C, ৫৪ মাইক্ৰ’গ্ৰাম ভিটামিন–A, ৬৪০ মাইক্ৰ’গ্ৰাম বিটা-কেৰোটিন, ৪৩ মাইক্ৰ’গ্ৰাম ফলেট, ০.৯ মিলিগ্ৰাম ভিটামিন–E, ৪.২ মাইক্ৰ’গ্ৰাম ভিটামিন–K, ১৬৮ মিলিগ্ৰাম পটাছিয়াম, ১০ মিলিগ্ৰাম মেগনেছিয়াম, ১১ মিলিগ্ৰাম কেলচিয়াম, ১৪ মিলিগ্ৰাম ফছফৰাছ, ০.১৬ মিলিগ্ৰাম আইৰণ আৰু ০.১১ মিলিগ্ৰাম কপাৰ থাকে। সেয়েহে আম কেৱল সোৱাদযুক্তই নহয়, পুষ্টিগুণতো সমৃদ্ধ।
ডায়বেটিছ থাকিলেও আম কেনেকৈ খাব পাৰি
বিশেষজ্ঞসকলৰ মতে, আম মিঠা ফল হ’লেও ইয়াত ফাইবাৰ, ভিটামিন আৰু এণ্টিঅক্সিডেণ্ট যথেষ্ট পৰিমাণে থাকে। সেয়েহে কেৱল ডায়বেটিছ আছে বুলি আম সম্পূৰ্ণ বাদ দিয়াৰ প্ৰয়োজন নাই। কিন্তু পৰিমাণৰ ওপৰত বিশেষ গুৰুত্ব দিব লাগিব। একেলগে অধিক আম খালে তে*জত চেনিৰ মাত্ৰা বৃদ্ধি পাব পাৰে।
আম খোৱাৰ আগত এইসকল লোকে হওক সাৱধান
ডায়বেটিছৰ উপৰি প্ৰি-ডায়াবেটিছ, ইনচুলিন ৰেজিষ্টেন্স আৰু মেটাব’লিক ছিণ্ড্ৰোমত ভুগি থকা লোকেও আম সীমিত পৰিমাণে খাব লাগে। কাৰণ এইসকলৰ শৰীৰে তে*জত চেনিৰ মাত্ৰা নিয়ন্ত্ৰণ কৰাত ইতিমধ্যে অসুবিধাৰ সন্মুখীন হয়। ওজন কমাব বিচৰা লোকসকলেও আম খোৱাৰ আগতে আমৰ পৰিমাণৰ ওপৰত গুৰুত্ব দিয়ক। যিসকলে ওজন হ্ৰাস কৰাৰ চেষ্টা কৰি আছে, তেওঁলোকেও আম খোৱাৰ ক্ষেত্ৰত সাৱধান হোৱা উচিত। আমৰ বতৰত বহুতে অজানিতে একেলগে দুটা বা তিনিটা আম খাই পেলায়। ফলত কেলৰি আৰু প্ৰাকৃতিক চেনিৰ পৰিমাণ বৃদ্ধি পায়, যিয়ে ওজন নিয়ন্ত্ৰণত প্ৰভাৱ পেলাব পাৰে।
কিডনী, এলাৰ্জী ৰোগীৰ বাবে বিশেষ পৰামৰ্শ
কিডনী ৰোগত ভুগি থকা লোকসকলে নিয়মীয়াকৈ আম খোৱাৰ আগতে চিকিৎসকৰ পৰামৰ্শ লোৱা উচিত। এনে ক্ষেত্ৰত বহু সময়ত পটাছিয়ামৰ মাত্ৰা নিয়ন্ত্ৰণত ৰখাটো প্ৰয়োজনীয় হয়।ইয়াৰ উপৰিও যদি কাৰোবাৰ আমত এলাৰ্জি থাকে, তেন্তে তেওঁলোকে আম সম্পূৰ্ণৰূপে পৰিহাৰ কৰিব লাগে।
বিশেষজ্ঞৰ পৰামৰ্শ
বিশেষজ্ঞসকলৰ মতে, সুস্থ ব্যক্তিয়ে দৈনিক এক পৰিমাণত সতেজ আম নিশ্চিন্তে খাব পাৰে। অৱশ্যে আমৰ ৰস, মিল্কশ্বেক বা অধিক চেনিযুক্ত আমৰ মিঠাইৰ সলনি গোটেই আম খোৱাটো অধিক উপকাৰী। লগতে বাদাম বা দৈৰ সৈতে আম খালে খাদ্য অধিক সুষম আৰু স্বাস্থ্যকৰ হয়।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
