পিত-মাতৃ নহয়, বন্ধুৰ নামত লিখিলে ২৮ কোটি টকাৰ সম্পত্তি

সাধাৰণতে পিতৃ-মাতৃয়ে নিজৰ সমগ্ৰ সম্পত্তি সন্তানৰ নামত লিখি থৈ যায়। আনহাতে কোনো যুৱকে কিবা কাৰণত নিজৰ সম্পত্তি অৰ্পণ কৰিবলৈ হলে পিতৃ-মাতৃ অথবা ভগ্নী-ভাতৃ বা পত্নীৰ নামত লিখি থৈ যায়। কিন্তু এই সাধাৰণ ঘটনাৰ বিপৰীতে এজন যুৱকৰ এটা সিদ্ধান্তই সম্প্ৰতি ব্যাপক চৰ্চা লাভ কৰিছে। যুৱকজনে নিজৰ বিশাল সম্পত্তি পিতৃ-মাতৃ বা পৰিয়ালৰ আন সদস্যৰ নামত কৰাৰ বিপৰীতে শৈশৱৰ এজন বন্ধুৰ নামত কৰিছ।

এই ঘটনাৰ সবিশেষ

এই ঘটনাৰ স্থান হৈছে আমাৰ চুবুৰীয়া ৰাষ্ট্ৰ চীন। চীনৰ চাংহাইৰ এজন যুৱকে নিজৰ প্ৰায় ২০ মিলিয়ন ইউৱান (ভাৰতীয় মুদ্ৰাত প্ৰায় ২৮ কোটি টকা) মূল্যৰ সম্পত্তি পিতৃ-মাতৃৰ সলনি শৈশৱৰ এজন ঘনিষ্ঠ বন্ধুৰ নামত লিখি দিছে। South China Morning Postৰ এক প্ৰতিবেদন অনুসৰি, এই যুৱকজনৰ নাম লি। তেওঁ চাংহাইত বাস কৰে আৰু দুঃসাহসিক অভিযান তথা এক্সট্ৰিম স্প’ৰ্টছৰ প্ৰতি অত্যন্ত আগ্ৰহী। লিয়ে এই সন্দৰ্ভত কয়, “এই ধৰণৰ খেলত জীৱনৰ প্ৰতি বিপদ সদায়েই থাকে। সেয়েহে যদি কেতিয়াবা মোৰ লগত কোনো দুৰ্ভাগ্যজনক ঘটনা ঘটে, তেন্তে মোৰ কষ্টৰে উপাৰ্জিত সম্পত্তি যেন বিশ্বাসযোগ্য লোকৰ হাতলৈ যায়, সেই উদ্দেশ্যেই আগতীয়াকৈ উইল প্ৰস্তুত কৰিলোঁ।” লিৰ সম্পত্তিৰ ভিতৰত আছে এটা বিলাসবহুল এপাৰ্টমেণ্ট আৰু বেংকত জমা থকা উল্লেখযোগ্য পৰিমাণৰ ধন। কিন্তু তেওঁ এই সম্পত্তি পিতৃ-মাতৃৰ পৰিৱৰ্তে শৈশৱৰ বন্ধুৰ নামত হস্তান্তৰ কৰাৰ সিদ্ধান্ত লয়।

পিতৃ-মাতৃক সম্পত্তিৰ পৰা বঞ্চিত কৰাৰ কাৰণ

লিৰ এই সিদ্ধান্তৰ পিছত বহুতে প্ৰশ্ন উত্থাপন কৰে—কিয় তেওঁ পিতৃ-মাতৃক সম্পত্তিৰ পৰা বঞ্চিত কৰিলে? কিন্তু ইয়াৰ কাৰণ কোনো ব্যক্তিগত শত্ৰুতা নহয়। কিন্তু বহু বছৰ পূৰ্বেই লিৰ পিতৃ-মাতৃৰ বিৱাহ বিচ্ছেদ হৈছিল আৰু পিছত দুয়োৱে পুনৰ নিজ নিজ জীৱনসংগী নিৰ্বাচন কৰি নতুকৈ বিৱাহপাশত আৱদ্ধ হয়। লিৰ মতে, তেওঁ পিতৃ-মাতৃৰ নতুন জীৱনসংগীক নিজৰ পৰিয়ালৰ সদস্য হিচাপে মানি ল’ব নোৱাৰে। তেওঁ নিবিচাৰে যে তেওঁৰ মৃ*ত্যুৰ পিছত তেওঁৰ সম্পত্তিৰ সুবিধা এনে লোকৰ হাতলৈ যাওক, যিসকলৰ সৈতে তেওঁৰ কোনো আত্মীয়তা বা মানসিক সম্পৰ্ক নাই। সেইবাবে তেওঁ কেৱল শৈশৱৰ সেই বন্ধুকেই বিশ্বাস কৰিছে, যিজনে সদায় সুখ-দুখত তেওঁৰ কাষত থিয় দিছে।

আইনে কি কয়?

চীনৰ উত্তৰাধিকাৰ আইন অনুসৰি, যদি কোনো ব্যক্তি অবিবাহিত হয় আৰু তেওঁৰ কোনো সন্তান নাথাকে, তেন্তে তেওঁৰ সম্পত্তিৰ ওপৰত প্ৰথম অধিকাৰ থাকে পিতৃ-মাতৃৰ। অৱশ্যে, যদি ব্যক্তিজনে বৈধভাৱে উইল প্ৰস্তুত কৰি থৈ যায়, তেন্তে তেওঁ নিজৰ পৰিয়ালৰ বাহিৰৰ যিকোনো ব্যক্তিৰ নামতো সম্পত্তি লিখি দিব পাৰে। লি ইতিমধ্যে নিজৰ উইল চাংহাই উইল ৰেজিষ্ট্ৰেচন চেণ্টাৰত আনুষ্ঠানিকভাৱে পঞ্জীয়ন কৰাইছে। নিয়ম অনুসৰি, তেওঁৰ মৃ*ত্যুৰ পিছত সেই বন্ধুজনে ৬০ দিনৰ ভিতৰত সম্পত্তিৰ দাবী জনাব লাগিব। অন্যথা তেওঁ সেই অধিকাৰ হেৰুৱাব।

এই প্ৰতিবেদন যুগুতাইছে মানসজ্যোতিয়ে

এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ