গৰমৰ দিনকেইটাত চিলিং ফেনখন দৈনন্দিন জীৱনৰ এক অপৰিহাৰ্য অংগ হৈ পৰে। কিন্তু বহু সময়ত আমি ফেনৰ ব্লেডত জমা হোৱা ধূলিকণাৰ প্ৰতি গুৰুত্ব নিদিওঁ। দেখাত সাধাৰণ যেন লাগিলেও এই ধূলিৰ তৰপে ফেনৰ কাৰ্যক্ষমতা হ্ৰাস কৰাৰ লগতে বিদ্যুতৰ বিল বৃদ্ধি আৰু মটৰৰ আয়ুস কমাই পেলাব পাৰে। ফেনৰ মূল কাম হৈছে ব্লেডৰ সহায়ত বায়ুক তললৈ ঠেলি শীতল বতাহ সৃষ্টি কৰা। যেতিয়া ব্লেডবোৰ পৰিষ্কাৰ আৰু মসৃণ থাকে, তেতিয়া বায়ু সহজে কাটি আগুৱাই নিব পাৰে। কিন্তু ব্লেডত ধূলিৰ ডাঠ তৰপ জমা হ’লে ইয়াৰ পৃষ্ঠভাগ ৰুক্ষ হৈ পৰে। ফলত বায়ুৰ সৈতে ঘঁহনি বৃদ্ধি পায় আৰু ফেনে আগৰ দৰে সহজে বায়ু চলাচল কৰাব নোৱাৰে।
ফেনৰ ব্লেডত ধৃলি জমা হলে কেনেকৈ হ’ব পাৰে অপকাৰ?
ধূলিৰ বাবে ব্লেডৰ বায়ুগতিবিদ্যাৰ (Aerodynamic) কাৰ্যক্ষমতা কমি যায়। বিশেষজ্ঞসকলৰ মতে, ব্লেডত মাত্ৰ প্ৰায় ০.৫ মিলিমিটাৰ ধূলিৰ তৰপ থাকিলেও বায়ু প্ৰবাহৰ ক্ষমতা ৫%ৰ পৰা ১০% পৰ্যন্ত হ্ৰাস পাব পাৰে। সেইবাবে ফেনখন ঘূৰি থাকিলেও আগৰ দৰে ঠাণ্ডা বতাহ অনুভৱ নহয়। যেতিয়া বায়ু প্ৰবাহ কমি যায়, তেতিয়া একে গতি বজাই ৰাখিবলৈ মটৰটোৱে অধিক পৰিশ্ৰম কৰিবলগীয়া হয়। ফলস্বৰূপে মটৰত অধিক তাপ উৎপন্ন হয় আৰু দীৰ্ঘদিন ধৰি এনে অৱস্থা চলি থাকিলে মটৰৰ আয়ুস কমি যায়। কেতিয়াবা মটৰ বিকল হৈ মেৰামতি বা নতুন ফেন কিনাৰ খৰচো বহন কৰিবলগীয়া হয়। ইয়াৰ উপৰিও, ফেনে পৰ্যাপ্ত বায়ু নিদিয়াৰ বাবে বহুতে কুলাৰ, এয়াৰ কণ্ডিচনাৰ (AC), দেৱালৰ ফেন আদি একেলগে ব্যৱহাৰ কৰিবলৈ আৰম্ভ কৰে। এই অতিৰিক্ত বৈদ্যুতিক সঁজুলিবোৰ ব্যৱহাৰ কৰাৰ ফলত ঘৰৰ বিদ্যুতৰ খৰচ স্বাভাৱিকতে বৃদ্ধি পায়। অৰ্থাৎ ধূলি জমা হোৱা ফেনে পোনপটীয়াকৈ বহুত বিদ্যুৎ খৰচ নকৰিলেও, ইয়াৰ কম কাৰ্যক্ষমতাৰ বাবে অন্য যন্ত্ৰ অধিক ব্যৱহাৰ কৰিবলগীয়া হোৱাত বিদ্যুতৰ বিল বৃদ্ধি পায়।
অত্যাৱশ্যকীয় খৰচ ৰোধৰ বাবে কি কৰিব?
অত্যাৱশ্যকীয় খৰচবোৰ ৰোধ কৰিবলৈ ফেন নিয়মিতভাৱে পৰিষ্কাৰ কৰাটো অতি প্ৰয়োজনীয়। প্ৰায় ১৫ দিনৰ মূৰে মূৰে শুকান বা সামান্য সেমেকা কাপোৰেৰে ব্লেড আৰু ফেনৰ গা মচি পৰিষ্কাৰ কৰিলে ধূলি জমা হোৱাৰ সম্ভাৱনা কমে। ইয়াৰ ফলত ফেনে অধিক বায়ু দিব পাৰে, মটৰৰ ওপৰত অতিৰিক্ত চাপ নপৰে আৰু ইয়াৰ আয়ুসো বৃদ্ধি পায়। ফেনৰ ব্লেডত জমা হোৱা ধূলি কেৱল পৰিষ্কাৰ-পৰিচ্ছন্নতাৰ বিষয় নহয়; ই ফেনৰ কাৰ্যক্ষমতা, মটৰৰ স্থায়িত্ব আৰু ঘৰৰ বিদ্যুতৰ খৰচৰ সৈতেও জড়িত। সেয়েহে নিয়মিতভাৱে ফেন পৰিষ্কাৰ কৰাৰ অভ্যাস গঢ়ি তোলাটো বুদ্ধিমানী আৰু লাভজনক পদক্ষেপ।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
