আফ্ৰিকাত বিগত প্ৰায় ৫ মাহ ধৰি ইবোলা ভাইৰাছে সংহাৰ অব্যাহত ৰাখিছে। ইবোলা ভাইৰাছৰ ফলত সৰ্বাধিক ক্ষতি হৈছে আফ্ৰিকান দেশ কংগো। আফ্ৰিকাৰ কংগোত ইবোলাৰ ভয়াৱহ সংক্ৰমণৰ ফলত এতিয়ালৈকে ১,০০০ জনতকৈ অধিক লোকৰ মৃ*ত্যু হৈছে। আফ্ৰিকাৰ মুখ্য স্বাস্থ্য সংস্থাই জনোৱা অনুসৰি কংগোত ইবোলাৰ প্ৰাদুৰ্ভাৱ দিনক দিনে বাঢ়িহে গৈ আছে। কংগোত ইবোলাৰ সংহাৰে ইতিহাসৰ সকলো ৰেকৰ্ড ভংগ কৰিছে। ইবোলাৰ সংহাৰ হ্ৰাস নোহোৱাৰ মুখ্য কাৰণ হৈছে দেশখনত ভেকচিন, ঔষধ আৰু পৰ্যাপ্ত ধনৰ অভাৱ।
কংগোৰ স্বাস্থ্য মন্ত্ৰালয়ৰ শেহতীয়া তথ্য অনুসৰি, সোমবাৰলৈ ইবোলাৰ ২,৪৭৩টা নতুন সংক্ৰমণৰ ঘটনা পোহৰলৈ আহিছে। দেশখনৰ স্বাস্থ্য মন্ত্ৰালয়ে জনাইছে যে কমেও ৭৩৭ জন ৰোগী আইচ’লেচনত আছে অথবা চিকিৎসাধীন হৈ আছে। ১৫ মে’ত ঘোষণা কৰা এই নতুন ভেৰিয়েণ্ট পূৰ্বৰ ইবোলা ভাইৰাছৰ তুলনাত কিছু পৃথক বুলি জনাইছে দেশখনৰ স্বাস্থ্য মন্ত্ৰালয়ে। এই ভেৰিয়েণ্টে এতিয়ালৈকে নথিভুক্ত আন যিকোনো ইবোলা প্ৰাদুৰ্ভাৱতকৈ অধিক দ্ৰুতগতিত বহু লোকৰ প্ৰাণ কঢ়িছে।
২০১৩-১৬ত ১১ হাজাৰ লোকৰ মৃ*ত্যু
২০১৩–২০১৬ চনতো আফ্ৰিকাত ইবোলা ভাইৰাছে সংহাৰ চলাইছিল। সেই সময়ত ইবোলাই প্ৰায় ১১ হাজাৰ লোকৰ প্ৰাণ কাঢ়িছিল আৰু প্ৰায় ২৮,০০০ জন লোক ইবোলাত সংক্ৰমিত হৈছিল। ইপিনে সম্প্ৰতি বিশ্ব স্বাস্থ্য সংস্থাই (WHO) জনাইছে যে ইবোলাৰ প্ৰকৃত প্ৰভাৱ চৰকাৰী তথ্যতকৈ ২ৰ পৰা ৪ গুণ অধিক হ’ব পাৰে। কিয়নো বিদ্ৰোহী গোটসমূহৰ সংঘৰ্ষৰ বাবে বহু দূৰ্গম অঞ্চললৈ স্বাস্থ্যকৰ্মীসকলৰ প্ৰৱেশ সম্ভৱ হোৱা নাই, ফলত বহু ঘটনা নথিভুক্তও নোহোৱাৰ আশংকা প্ৰকাশ কৰা হৈছে।
ইবোলা কেনেকৈ বিয়পে?
ইবোলা এক অত্যন্ত সংক্ৰামক ৰোগ। ই মূলতঃ বমি, তেজ, বীৰ্য আদি শৰীৰৰ তৰল পদাৰ্থৰ সংস্পৰ্শৰ জৰিয়তে বিয়পে। ইবোলাই অতি কম সময়ৰ ভিতৰতে ৰোগীক গুৰুতৰভাৱে অসুস্থ কৰি তোলে। স্বাস্থ্য কৰ্তৃপক্ষই সতৰ্ক কৰি দিছে যে নতুনকৈ ধৰা পৰা প্ৰায় ৮০ শতাংশ ঘটনা পূৰ্বে চিনাক্ত কৰা সংক্ৰমণস্থলৰ বাহিৰত দেখা গৈছে। ইয়াৰ অৰ্থ হৈছে, স্বাস্থ্য বিভাগে যিমান দ্ৰুতভাৱে ৰোগীসকলক চিনাক্ত কৰিছে ইবোলাই তাতকৈও বেছি দ্ৰুতগতিত সংক্ৰমিত হৈছে।
মৃ*তদেহ সমাধিস্থ কৰাও ডাঙৰ প্ৰত্যাহ্বান
ইবোলাত মৃ*ত্যুমুখত পৰা লোকসকলৰ মৃ*তদেহ সুৰক্ষিতভাৱে সমাধিস্থ কৰাটোও এক ডাঙৰ সমস্যাত পৰিণত হৈছে। বহু ঠাইত স্থানীয় লোকসকলে স্বাস্থ্য বিভাগৰ বিশেষ দলক বাধা দিয়া দেখা গৈছে কিয়নো কিছুমান সম্প্ৰদায়ে পৰম্পৰাগত নিয়ম অনুসৰি মৃ*তদেহ সমাধিস্থ কৰিব বিচাৰে, যি পদ্ধতিয়ে ভাইৰাছ অধিক বিয়পাৰ আশংকা বৃদ্ধি কৰে। ইয়াৰ উপৰিও, মৃ*তদেহ সমাধিস্থ কৰা দল, স্বাস্থ্যকেন্দ্ৰ আৰু উদ্ধাৰকাৰী দলসমূহৰ ওপৰতো আক্ৰমণৰ ঘটনা সংঘটিত হৈছে।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
