কেন্দ্ৰীয় চৰকাৰে Employees’ Pension Scheme (EPS)-2026 কাৰ্যকৰী কৰিছে। Code on Social Security, 2020ৰ অধীনত প্ৰৱৰ্তিত এই নতুন আঁচনিখনে এতিয়া EPS-1995 আৰু Employees’ Family Pension Scheme, 1971-ৰ ঠাই লৈছে। নতুন আঁচনিৰ উদ্দেশ্য হৈছে, কমেও ১০ বছৰৰ পেঞ্চন-যোগ্য সেৱা সম্পূৰ্ণ কৰা কৰ্মচাৰীসকলক প্ৰতিমাহে নিয়মীয়া পেঞ্চন প্ৰদান কৰা। কিন্তু বহু কৰ্মচাৰীৰ মনত প্ৰশ্ন উঠিছে—নতুন আঁচনিত পেঞ্চন গণনাৰ পদ্ধতি সলনি হৈছে নেকি? ইয়াৰ উত্তৰ হৈছে—নহয়। EPS-2026ত মাহিলী পেঞ্চন গণনাৰ সূত্ৰ পূৰ্বৰ দৰেই ৰাখা হৈছে।
এনেদৰে গণনা কৰা হ’ব মাহিলী EPS পেঞ্চন
EPS-2026-ৰ অধীনত মাহিলী পেঞ্চন তলৰ সূত্ৰ অনুসৰি গণনা কৰা হ’ব—
মাহিলী EPS পেঞ্চন = (পেঞ্চন-যোগ্য দৰমহা × পেঞ্চন-যোগ্য সেৱা) ÷ 70
ইয়াত পেঞ্চন-যোগ্য দৰমহা বুলিলে চাকৰি এৰা বা অৱসৰ গ্ৰহণৰ আগৰ শেষৰ ৬০ মাহ (৫ বছৰ)ৰ গড় মাহিলী দৰমহাক বুজায়। অৰ্থাৎ, যদি কোনো কৰ্মচাৰীৰ গড় পেঞ্চন-যোগ্য দৰমহা ১৫,০০০ টকা হয় আৰু তেওঁ ১০ বছৰৰ পেঞ্চন-যোগ্য সেৱা সম্পূৰ্ণ কৰিছে, তেন্তে তেওঁ প্ৰায় ২,১৪৩ টকা মাহিলী পেঞ্চন লাভ কৰিব পাৰে।
১০ বছৰৰ সেৱাৰ পিছত কিমান পেঞ্চন লাভ কৰিব পাৰি?
যদি কোনো কৰ্মচাৰীয়ে কমেও ১০ বছৰৰ পেঞ্চন-যোগ্য সেৱা সম্পূৰ্ণ কৰে, তেন্তে তেওঁৰ গড় মূল দৰমহাৰ ওপৰত ভিত্তি কৰি আনুমানিক মাহিলী পেঞ্চন তলত দিয়া ধৰণৰ হ’ব—
গড় মূল দৰমহা ১০,০০০ টকা – প্ৰায় ১,৪২৯ টকা
১১,০০০ টকা – প্ৰায় ১,৫৭১ টকা
১২,০০০ টকা – প্ৰায় ১,৭১৪ টকা
১৩,০০০ টকা – প্ৰায় ১,৮৫৭ টকা
১৪,০০০ টকা – প্ৰায় ২,০০০ টকা
১৫,০০০ টকা – প্ৰায় ২,১৪৩ টকা মাহিলী পেঞ্চন
কোনে EPS-2026ৰ অন্তৰ্ভুক্ত হ’ব পাৰিব?
চৰকাৰী অধিসূচনা অনুসৰি, ২৯ জুন, ২০২৬ বা তাৰ পিছত EPF আঁচনিত অন্তৰ্ভুক্ত হোৱা আৰু চৰকাৰে নিৰ্ধাৰণ কৰা বেতন-সীমাৰ ভিতৰত থকা কৰ্মচাৰীসকল EPS-2026ৰ সদস্য হ’ব পাৰিব। ইয়াৰ উপৰিও, পূৰ্বতে EPS-1995 বা Employees’ Family Pension Scheme, 1971ৰ সদস্য আছিল বা সদস্য হ’বলৈ যোগ্য আছিল, তেওঁলোকো এই নতুন আঁচনিৰ অন্তৰ্ভুক্ত হ’ব।
১০ বছৰ পূৰ্ণ হোৱাৰ আগতে চাকৰি এৰিলে কি হ’ব?
যদি কোনো কৰ্মচাৰীয়ে ১০ বছৰৰ পেঞ্চন-যোগ্য সেৱা সম্পূৰ্ণ হোৱাৰ আগতে চাকৰি এৰে, তেন্তে পূৰ্বৰ দৰেই তেওঁৰ ওচৰত দুটা বিকল্প থাকিব—
Withdrawal Benefit লৈ জমা হোৱা ধন উলিয়াই ল’ব পাৰে, অথবা
Scheme Certificate লাভ কৰিব পাৰে।
পিছত যদি তেওঁ EPFৰ সৈতে সংযুক্ত আন কোনো প্ৰতিষ্ঠানত চাকৰি কৰে, তেন্তে পূৰ্বৰ সেৱা নতুন সেৱাৰ সৈতে যোগ কৰি পেঞ্চনৰ সুবিধা লাভ কৰিব পাৰিব।
EPS-2026ত কি কি পৰিবৰ্তন হৈছে?
যদিও পেঞ্চন গণনাৰ পদ্ধতিত কোনো পৰিবৰ্তন কৰা হোৱা নাই, তথাপি নতুন আঁচনিত কেইবাটাও প্ৰশাসনিক সংস্কাৰ কৰা হৈছে। পেঞ্চনৰ দাবী ২০ দিনৰ ভিতৰত নিষ্পত্তি কৰাৰ লক্ষ্য নিৰ্ধাৰণ কৰা হৈছে।
যদি EPFO-এ কোনো যুক্তিসংগত কাৰণ নোহোৱাকৈ দাবী নিষ্পত্তিত পলম কৰে, তেন্তে সংশ্লিষ্ট সদস্যক বছৰি ১২% হাৰত সুত দিয়াৰ ব্যৱস্থা কৰা হৈছে। Higher Pension-সম্পৰ্কীয় বিধানসমূহ আঁচনিখনত অন্তৰ্ভুক্ত কৰা হৈছে। নিয়োগকৰ্তাসকলৰ বাবে Digital Compliance বাধ্যতামূলক কৰা হৈছে।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
