ঝাৰখণ্ডৰ ধনবাদ, যাক ‘ক’লা হীৰাৰ চহৰ’ বুলি কোৱা হয়, এই ধনবাদেই পুনৰবাৰ EDৰ অভিযানৰ কেন্দ্ৰবিন্দু হৈ পৰিছে। অবৈধ কয়লা খনন, ধন দাবী আৰু ধন সৰবৰাহৰ অভিযোগৰ ভিত্তিত ED-এ ধনবাদত এতিয়ালৈকে অন্যতম বৃহৎ অভিযান চলাইছে। ধনবাদৰ আগশাৰীৰ কয়লা ব্যৱসায়ী আৰু আউটচ’ৰ্চিং ঠিকাদাৰৰ ৩০টাতকৈও অধিক স্থানত ED-এ একেলগে তালাচী চলোৱা হয়। এই অভিযানত BCCL অন্যতম প্ৰভাৱশালী আউটচ’ৰ্চিং ব্যৱসায়ী লাল বাবু সিং, কয়লা ব্যৱসায়ী অনিল গোৱাল আৰু তেওঁলোকৰ সহযোগীৰ ৬০০ কোটি টকাৰো অধিক মূল্যৰ সম্পত্তি আৰু বহু গুৰুত্বপূৰ্ণ নথি-পত্ৰৰ সন্ধান লাভ কৰা বুলি তদন্তকাৰী সংস্থাই প্ৰকাশ কৰিছে।
ধনবাদৰ চৰাইদেলা, কাতৰাছ, ঝাৰিয়া আৰু বেংক ম’ৰ অঞ্চলত EDৰ ৰাঁচী জ’নেল কাৰ্যালয়ৰ বিশেষ দলে একেলগে অভিযান আৰম্ভ কৰে। হঠাতে চলোৱা এই তালাচীৰ ফলত সমগ্ৰ কয়লা বেল্টত তীব্ৰ চাঞ্চল্যৰ সৃষ্টি হয়। এল বি সিঙৰ বিভিন্ন প্ৰতিষ্ঠানত অনুসন্ধান চলাই ED-এ বিপুল পৰিমাণৰ সন্দেহজনক সম্পত্তিৰ তথ্য লাভ কৰে। ইয়াৰ ভিতৰত প্ৰায় ১৬০ কোটি টকা মূল্যৰ মিউচুৱেল ফাণ্ড একাউণ্ট ফ্ৰীজ কৰা হৈছে আৰু ৬০০ কোটি টকাৰো অধিক মূল্যৰ বেনামী সম্পত্তিৰ সন্ধান পোৱা গৈছে।
অভিযানকালত তদন্তকাৰী সংস্থাই ২০০ৰো অধিক স্থাৱৰ সম্পত্তিৰ নথি উদ্ধাৰ কৰে। ইয়াৰ ভিতৰত প্লট, বাণিজ্যিক কমপ্লেক্স, খনি-সংশ্লিষ্ট শ্বেয়াৰ আদি অন্তৰ্ভুক্ত আছে। এই সম্পত্তিসমূহৰ আনুমানিক বজাৰ মূল্য ৫০০ কোটি টকাৰ পৰা ৬০০ কোটি টকাৰো অধিক বুলি অনুমান কৰা হৈছে। ইয়াৰ উপৰি বিভিন্ন স্থানৰ পৰা এক কোটি টকাতকৈও অধিক হিচাপবিহীন নগদ ধন, একাধিক ডিজিটেল ডিভাইচ আৰু বহু বেংক একাউণ্টৰ নথিপত্ৰ জব্দ কৰা হৈছে।
ধনবাদৰ কয়লা মাফিয়াৰ ইতিহাস বহু পুৰণি। ১৯৭০ চনত বিচিচিএলৰ ৰাষ্ট্ৰীয়কৰণৰ পিছৰে পৰা এই অঞ্চলত অবৈধ কয়লা খনন আৰু ছিণ্ডিকেটৰাজৰ বিস্তাৰ ঘটে। ১৯৭০ৰ পৰা ২০০০ চনলৈকে ধনবাদত গেং-আধিপত্যৰ ৰাজত্ব চলিছিল। বি.পি. সিনহা আৰু সূৰ্যদেৱ সিঙৰ দৰে শক্তিশালী গেঙৰ সময়ত কয়লা খনিৰ নিয়ন্ত্ৰণক কেন্দ্ৰ কৰি বহু ৰক্তাক্ত সংঘৰ্ষও সংঘটিত হৈছিল। জনপ্ৰিয় চলচ্চিত্ৰ Gangs of Wasseypur-ৰ কাহিনীৰ মূল পটভূমিও এই অঞ্চলৰ বাস্তৱ ঘটনাৰ ওপৰত ভিত্তি কৰি গঢ়ি উঠিছিল।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
