পুৱাই দিল্লীৰ মুখ্যমন্ত্ৰীৰ বাসভৱনত সোমাই আক্ৰমণ৷ দেশৰ ৰাজধানীত মুখ্যমন্ত্ৰী ৰেখা গুপ্তাৰ ছিভিল লাইনছৰ বাসভৱনত সোমাই তেওঁক মাৰধৰ কৰাৰ অভিযোগ উঠিছে যুৱকৰ বিৰুদ্ধে৷ আহত মুখ্যমন্ত্ৰীক ইতিমধ্যে হাস্পতাললৈ লৈ যোৱা হৈছে৷ বিভিন্ন সংবাদমাধ্যম সূত্ৰৰ খবৰ অনুসৰি বুধবাৰে পুৱাই মুখ্যমন্ত্ৰীৰ বাসভৱনত সাপ্তাহিক জনশুনানি চলাৰ সময়তে ঘটনাটো ঘটে৷ বিজেপিৰ দাবী, হঠাৎ এগৰাকী মধ্যবয়সীয়া পুৰুষে ৰেখাৰ বাসভৱনত সোমাই পৰে৷ বাসভৱনক সোমাই এখন কাগজ দিয়াৰ নামত মুখ্যমন্ত্ৰীৰ দিশে আগুৱাই যায়৷ অভিযোগ যে ইয়াৰ পাছতেই সেই যুৱকে চিৎকাৰ কৰি গালিগালাজ আৰম্ভ কৰে৷ ৰেখাৰ চুলি টানি ধৰি তেওঁক এটা চৰো মাৰে যুৱকে৷
এই ঘটনাৰ লগে লগেই সেই ব্যক্তিক আটক কৰিছে মুখ্যমন্ত্ৰীৰ নিৰাপত্তাৰক্ষীয়ে৷ বিভিন্ন সূত্ৰৰ দাবী, অভিযুক্ত যুৱকৰ কাষত আদালত সম্পৰ্কিত কিছু নথি পোৱা গৈছে৷ তেওঁক ইতিমধ্যেই আৰক্ষীয়ে গ্ৰেপ্তাৰ কৰি তদন্ত আৰম্ভ কৰিছে৷ মুখ্যমন্ত্ৰীৰ বাসভৱনতো লগে লগেই অতিৰিক্তভাৱে আৰক্ষীও মোতায়েন কৰা হৈছে৷
ইতিমধ্যে এই ঘটনাক তীব্ৰ নিন্দা কৰিছে কংগ্ৰেছ আৰু আম আদমী পাৰ্টিয়েও৷ আপ নেত্ৰী তথা দিল্লীৰ প্ৰাক্তন মুখ্যমন্ত্ৰী আতিশী মাৰ্লেনাই কয়, মুখ্যমন্ত্ৰীৰ ওপৰত হোৱা আক্ৰমণ অত্যন্ত নিন্দনীয়৷ গণতন্ত্ৰত মতবিৰোধ আৰু প্ৰতিবাদ থাকে কিন্তু এইদৰে হিংসাত্মক কাৰ্যকলাপ কেতিয়াও গ্ৰহণযোগ্য নহয়৷ আশা কৰো দিল্লী আৰক্ষীয়ে অভিযুক্তৰ বিৰুদ্ধে কাঢ়া পদক্ষেপ গ্ৰহণ কৰিব৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
