২০২৪ৰ বিদায় বেলা, কাৰ কাৰ মহাপ্ৰয়ানে ক্ষতি কৰিলে দেশৰ
২০২৪ চনৰ বিদায় বেলা সমাগত। মাজত আৰু মাথো কেইটামান দিন বাকি। তাৰ পাছতে আৰম্ভ হ’ব নতুন বছৰ ২০২৫ । পুৰণিক বিদায় দি নতুনক আদৰাৰ প্ৰস্তুতি ইতিমধ্যে আৰম্ভ হৈছে সকলোফালে। পাছে এই ২০২৪ চনতেই দেশে হেৰুৱালে বহু উজ্জল তাৰকা। তাৰেই মাজৰ কেইটামান এনে উজ্জল তাৰকা, যাৰ ক্ষতি হয়তো কোনোদিনে পূৰ কৰিব পৰা নাযাব।
বছৰৰ আৰম্ভণিতে দেশে হেৰুৱাই ওস্তাদ ৰাশ্বিদ খানক, বছৰৰ শেষৰফালে হেৰুৱাই দ্বিগ্বজ অভিনেত্ৰী উমা দাসগুপ্তা। লগতে দেশে হেৰুৱাই অমূল্য ৰত্ন ৰতন টাটা।
ওস্তাদ ৰাশ্বিদ খান-
৯ জানুৱাৰী তাৰিখ মঙলবাৰে বছৰৰ প্ৰথমটো ক্ষতি হিচাপে দেশে হেৰুৱাই বিশিষ্ট সংগীতকাৰ ওস্তাদ ৰাশ্বিদ খানক। পদ্ম বিভূষণ, পদ্মশ্ৰী, সংগীত নাটক একাডেমী, বংগ বৈভৱ আদি সন্মানেৰে সন্মানিত এইগৰাকী বিশিষ্ট সংগীতকাৰ বহুদিনৰে পৰা কৰ্কট ৰোগৰ সৈতে যুঁজ দি অৱশেষত কেৱল মাথো ৫৫ বছৰ বয়সতে ইহ সংসাৰ ত্যাগ কৰে।
ৰতন টাটা-
দেশৰ লগতে সমগ্ৰ বিশ্বৰে অন্যতম ক্ষতি ৰতন টাটা। ব্যৱসায়ৰ ক্ষেত্ৰত ভাৰতক বিশ্বৰ দৰবাৰত উপস্থাপন কৰোৱা ৰতন টাটাই তেখেতৰ কৰ্ম জীৱনৰ সফলতাৰ বাবে পদ্ম বিভূষণ, পদ্ম ভূষণ, মহাৰাষ্ট্ৰ ভূষণ, অসম বৈভৱ আদি পোৱাৰ লগতে অষ্ট্ৰেলিয়াৰ সৰ্বোচ্চ সন্মান অৰ্ডাৰ অৱ অষ্ট্ৰেলিয়া সন্মানৰেও সন্মানিত। বাৰ্ধক্যজনিত কাৰণত ৮৬ বছৰ বয়সত ৯ অক্টোবৰ তাৰিখে তেখেতৰ মৃত্যু হয়।
উমা দাসগুপ্তা-
১৯৫৫ চনত মুক্তি পোৱা সত্যজিৎ ৰায়ৰ বিশ্ব বিখ্যাত ছবি পথেৰ পাঁচালীৰ বিষয়ে সকলোৱে জানে। যি ভাৰতীয় চিনেমাৰ মূল ভেটি স্বৰূপ। সেই চিনেমাখনৰেই দুই মূখ্য চৰিত্ৰ অপু আৰু দূৰ্গা। সেই দূৰ্গাৰ চৰিত্ৰ ৰূপায়ন কৰা উমা দাসগুপ্তাৰ মৃত্যু। ৮৪ বছৰ বয়সত কলিকতাৰ নিজা বাসভৱনত ইহ সংসাৰ ত্যাগ কৰে দ্বিগ্বজ অভিনেত্ৰীগৰাকীয়ে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
