সম্পূৰ্ণ সুৰক্ষিত ছিৰিয়াৰ ৰাষ্ট্ৰপতি, বিমানৰ কোনো দুৰ্ঘটনা হোৱা নাই, বৰ্তমানে এইখন দেশে দিছে শৰণ
ৰাছিয়াৰ চৰকাৰী সংবাদ সংস্থাসমূহে প্ৰকাশ কৰা অনুসৰি ছিৰিয়াৰ পদচ্যুত ৰাষ্ট্ৰপতি বাছাৰ আল আছাদ আৰু তেওঁৰ পৰিয়াল বৰ্তমানে সম্পূৰ্ণ সুৰক্ষিত। পলায়নৰ সময়ত হোৱা বিমান দুৰ্ঘটনা তেওঁলোকৰ নহয়। এক উৰাবাতৰি বিয়পি পৰিছিল সকলোফালে।
বৰ্তমানে মস্কোই শৰণ দিছে ছিৰিয়াৰ ৰাষ্ট্ৰপতিক। মস্কোতে আশ্ৰয় লৈ আছে বাছাৰ আল আছাদ আৰু তেওঁৰ পৰিয়াল। ইছলামিক নেতৃত্বাধীন বিদ্ৰোহীয়ে ছিৰিয়া নিয়ন্ত্ৰণ কৰাৰ কেইঘণ্টামান পিছতে এই তথ্য সদৰি হৈছে।
জানিব পৰা মতে, “আছাদ আৰু তেওঁৰ পৰিয়ালৰ সদস্যসকল মস্কোত উপস্থিত হৈছে।” প্ৰতিবেদনত কোৱা হৈছে যে “ৰাছিয়াই মানৱীয় ভিত্তিত আশ্ৰয় প্ৰদান কৰিছে।” ৮ ডিচেম্বৰ দেওবাৰৰ দিনা বেছিভাগ সময় বিমান ট্ৰেকাৰসকলে আছাদৰ বিমানৰ ৰহস্যজনক অৱস্থানৰ বিষয়ে জল্পনা-কল্পনা কৰি আছিল, হঠাতে নোহোৱা হোৱা বিমানৰ বাবে দুৰ্ঘটনা হোৱাৰ আশংকা কৰিছিল।
প্ৰকাশিত তথ্য অনুসৰি ৰাজধানীখন বিদ্ৰোহীয়ে দখল কৰাৰ প্ৰায় একে সময়তে ডামাস্কাছ বিমানবন্দৰৰ পৰা ছিৰিয়ান এয়াৰৰ এখন বিমানে উৰা মাৰিছিল।
বিমানখনে প্ৰথমে আছাদৰ আলাৱী পন্থাৰ দুৰ্গ ছিৰিয়াৰ উপকূলীয় অঞ্চলৰ ফালে উৰি গৈছিল যদিও তাৰ পিছত হঠাতে ইউ টাৰ্ণ কৰি বিপৰীত দিশত কেইমিনিটমান উৰি যোৱাৰ পিছত মানচিত্ৰৰ পৰা নোহোৱা হৈ যায়। যাৰ বাবেই জল্পনা কল্পনা অধিক হৈ যায়। পাছে বৰ্তমানে সদৰি হোৱা তথ্য অনুসৰি সম্পূৰ্ণ সুৰক্ষিত আছাদ আৰু পৰিয়াল।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
