কেংগাৰু বাহিনীৰ মূৰৰ কামোৰণি কৰিবলৈ সাজু মহম্মদ শ্বামী, অপেক্ষা কেৱল এখন পত্ৰৰ
অষ্ট্ৰেলিয়াৰ বিৰুদ্ধে এডিলেইড টেষ্টত ভাৰতৰ পৰাজয়ে সকলো অনুৰাগীকে হতাশ কৰি তোলে। মাত্ৰ ৩ দিনতে টিম ইণ্ডিয়াই পিংক বল টেষ্টত আত্মসমৰ্পণ কৰে। সেই পৰাজয়ৰ পাছতে এতিয়া আহিছে আন এক সুখবৰ। সকলো ঠিকে থাকিলে অষ্ট্ৰেলিয়াৰ মাটিত কেংগাৰু বাহিনীক বধিবলৈ সাজু মহম্মদ শ্বামী।
অভিজ্ঞ বেগী বলাৰ মহম্মদ শ্বামীৰ উভতি অহাৰ ইংগিত প্ৰকাশ। অতি সোনকালে অষ্ট্ৰেলিয়ালৈ বিমানেৰে যাত্ৰা কৰিবলৈ সাজু হৈছে শ্বামী। এতিয়া কেৱল অপেক্ষা ৰাষ্ট্ৰীয় ক্ৰিকেট একাডেমিৰ এখন পত্ৰৰ। সেই পত্ৰলৈ অপেক্ষা কৰি বিচিচিআইয়ে স্বামীৰ ভিছাও প্ৰস্তুত কৰিছে।
ভাৰতীয় ক্ৰিকেট নিয়ন্ত্ৰণ ব’ৰ্ডে ৰাষ্ট্ৰীয় ক্ৰিকেট একাডেমীৰ অনুমোদনৰ বাবে অপেক্ষা কৰি আছে। এই প্ৰতিবেদনৰ পিছতহে বৰ্ডাৰ-গাভাস্কাৰ ট্ৰফীৰ বাকী তিনিখন টেষ্ট মেচৰ বাবে বেগী বলাৰ মহম্মদ শ্বামীক অষ্ট্ৰেলিয়ালৈ প্ৰেৰণ কৰিব পাৰিব।
উল্লেখ্য যে, ২০২৩ চনৰ এদিনীয়া বিশ্বকাপৰ পিছতে আঘাতৰ বাবে আন্তঃৰাষ্ট্ৰীয় ক্ৰিকেটৰ পৰা আঁতৰি আছিল শ্বামী। আঘাতৰ পৰা সুস্থ হৈ উঠাৰ পাছত ছামীয়ে বংগৰ হৈ ৰঞ্জি ট্ৰফী আৰু চৈয়দ মুস্তাক আলী ট্ৰফী (এছ এম এ টি)ত কামবেক কৰে।
এতিয়া প্ৰকাশিত এক প্ৰতিবেদন অনুসৰি শ্বামী অষ্ট্ৰেলিয়ালৈ যোৱাৰ বাবে বিচিচিআইয়ে সকলো প্ৰস্তুতি চলাইছে। তেওঁৰ ভিছাও প্ৰস্তুত কৰা হৈছে আৰু তেওঁক ফিট ঘোষণা কৰাৰ লগে লগে তেওঁক অতি সোনকালে অষ্ট্ৰেলিয়ালৈ প্ৰেৰণ কৰা হ’ব।
বিচিচিআইৰ এজন বিষয়াই এই সন্দৰ্ভত কয়, ‘বিচিচিআইৰ বাছনি সমিতিখনে শ্বামীৰ ফিটনেছ ৰিপ’ৰ্টৰ বাবে অপেক্ষা কৰি আছে। ফিটনেছ টেষ্ট দিবলৈ বেংগালুৰুলৈ গৈছিল। ৰঞ্জি ট্ৰফী আৰু চৈয়দ মুস্তাক আলী টি-২০তো খেলি ভাল প্ৰদৰ্শন আগবঢ়ায় স্বামীয়ে। আমি কেৱল এনচিএৰ অনুমোদনৰ বাবে অপেক্ষা কৰি আছো।”
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
