ঝাৰখণ্ডৰ হাজাৰীবাগ জিলাৰ কটকমছান্দি থানা এলেকাৰ লুপুং গাঁৱত সংঘটিত হৈছে এক হৃদয়বিদাৰক ঘটনা। ঘৰত পচি যোৱা আলু পেলোৱাক লৈ হোৱা সামান্য ঘৰুৱা বিবাদৰ মাজতে এজন পিতৃয়ে নিজৰ ছমহীয়া পুত্ৰক নিৰ্মমভাৱে আক্ৰমণ কৰাৰ অভিযোগ উঠিছে। গুৰুতৰভাৱে আহত শিশুটোৰ চিকিৎসালয়লৈ নিয়াৰ পথতে মৃ*ত্যু হয়। জানিব পৰা মতে, লুপুং গাঁৱৰ বাসিন্দা আকাশ কুমাৰৰ ঘৰত পচি যোৱা আলু পেলোৱাক লৈ পৰিয়ালৰ মাজত কাজিয়াৰ সৃষ্টি হৈছিল। এই বিবাদৰ মাজতে আকাশ কুমাৰে খঙৰ বশৱৰ্তী হৈ শুই থকা ছমহীয়া পুত্ৰক তুলি ঘৰৰ পিছফালে থকা কুঁৱাৰ ওচৰলৈ লৈ যায়।
অভিযোগ অনুসৰি, কুঁৱাৰ কাষৰ প্লেটফৰ্মত তেওঁ শিশুটোক মাটিত পেলাই দিয়ে আৰু নিৰ্মমভাৱে আক্ৰমণ কৰে। ঘটনাটো দেখি পৰিয়ালৰ লোকে ততাতৈয়াকৈ শিশুটোক উদ্ধাৰ কৰি চিকিৎসালয়লৈ লৈ যায়। প্ৰথমে গুৰুতৰভাৱে আহত শিশুটোক হাজাৰীবাগৰ শ্বেখ ভিখাৰী চিকিৎসা মহাবিদ্যালয় আৰু চিকিৎসালয়ত ভৰ্তি কৰোৱা হয়। অৱস্থা সংকটজনক হোৱাত চিকিৎসকে উন্নত চিকিৎসাৰ বাবে ৰাঁচীৰ ৰিমছলৈ প্ৰেৰণ কৰে। কিন্তু ৰাঁচীলৈ নিয়াৰ পথতেই শিশুটোৰ মৃ*ত্যু হয়। শিশুটোৰ মৃ*ত্যুৰ পিছত মাতৃ নিৰালি দেৱীয়ে স্বামী আকাশ কুমাৰৰ বিৰুদ্ধে কটকমছান্দি আৰক্ষী থানাত এজাহাৰ দাখিল কৰে। এজাহাৰৰ ভিত্তিত আৰক্ষীয়ে আকাশ কুমাৰক গ্ৰেপ্তাৰ কৰে আৰু আদালতৰ নিৰ্দেশত তেওঁক ন্যায়িক জিম্মালৈ প্ৰেৰণ কৰা হয়।
আৰক্ষীয়ে ঘটনাটোৰ তদন্ত আৰম্ভ কৰিছে। এই ঘটনাত পৰিয়ালৰ আন কোনো সদস্যৰ ভূমিকা আছিল নেকি, সেই বিষয়েও তদন্ত চলাই থকা হৈছে। সামান্য ঘৰুৱা বিবাদে এইদৰে এটা নিৰীহ শিশুৰ প্ৰাণ কাঢ়ি লোৱাক লৈ সমগ্ৰ অঞ্চলটোতে শোকৰ ছাঁ পৰিছে। ঘটনাটোৱে ঘৰুৱা কাজিয়া আৰু খঙৰ সময়ত মানুহে নিয়ন্ত্ৰণ হেৰুৱালে কিমান ভয়ংকৰ পৰিণতি হ’ব পাৰে, সেই কথাও পুনৰ স্পষ্ট কৰি তুলিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
