ফ্ৰান্সৰ ৰাজধানী পেৰিছৰ পৰা আৰম্ভ হোৱা ছাত্ৰ-ছাত্ৰীৰ প্ৰতিবাদে এতিয়া সমগ্ৰ ফ্ৰান্সতে ব্যাপক ৰূপ ধাৰণ কৰিছে। বিদ্যালয়ত শিক্ষক-শিক্ষয়িত্ৰীৰ অভাৱ, অধিক ছাত্ৰ থকা শ্ৰেণীকোঠা, বিদ্যালয়ৰ দুৰ্বল আন্তঃগাঁথনি আৰু শিক্ষা ব্যৱস্থাৰ বিভিন্ন সমস্যাৰ বিৰুদ্ধে আৰম্ভ হোৱা এই আন্দোলন এতিয়া ফ্ৰান্স চৰকাৰৰ বাবে ডাঙৰ প্ৰত্যাহ্বান হৈ পৰিছে।
এই আন্দোলনৰ আৰম্ভণি হৈছিল পেৰিছৰ সমীপৰ ক্ৰেটেইল অঞ্চলত। ২১ ছেপ্টেম্বৰৰ পৰা ছাত্ৰ-ছাত্ৰীয়ে বিদ্যালয় বন্ধ কৰি, বিদ্যালয়ৰ গেটত অৱস্থান ধৰ্মঘটৰ লগতে বিভিন্ন প্ৰতিবাদী কাৰ্যসূচীৰ জৰিয়তে নিজৰ ক্ষোভ প্ৰকাশ কৰিবলৈ আৰম্ভ কৰে। শিক্ষাৰ্থীৰ মূল অভিযোগ হৈছে— বহু বিদ্যালয়ত পৰ্যাপ্ত শিক্ষকৰ অভাৱ, শিক্ষকৰ খালী পদ পূৰণত ব্যৰ্থ, শ্ৰেণীকোঠাত ছাত্ৰ-ছাত্ৰীৰ সংখ্যা অত্যধিক, জাৰজীৰ্ণ বহু বিদ্যালয়ৰ ভৱন আৰু দুৰ্বল আন্তঃগাঁথনি, দীঘলীয়া পাঠদানৰ সময় আৰু অত্যধিক শৈক্ষিক চাপ। ইয়াৰ উপৰিও বিশ্ববিদ্যালয়ত নামভৰ্তিৰ Parcoursup ব্যৱস্থাক লৈও বহু ছাত্ৰ-ছাত্ৰীৰ অসন্তুষ্টি আছে। এয়া কেৱল এখন বিদ্যালয় বা এটা অঞ্চলৰ সমস্যা নহয় বুলি প্ৰতিবাদকাৰীসকলে দাবী কৰিছে। তেওঁলোকৰ মতে, বহু বছৰ ধৰি ফ্ৰান্সৰ চৰকাৰী শিক্ষা ব্যৱস্থাত পুঞ্জীভূত সমস্যাৰ ফলতেই এই বৃহৎ আন্দোলনৰ সৃষ্টি হৈছে।
আৰম্ভণিতে পেৰিছৰ উপকণ্ঠ অঞ্চলত সীমাবদ্ধ থকা এই আন্দোলন অতি কম সময়ৰ ভিতৰতে ফ্ৰান্সৰ বিভিন্ন প্ৰান্তলৈ বিয়পি পৰে। প্ৰাপ্ত তথ্য অনুসৰি, সম্প্ৰতি প্ৰায় ৪০০ৰ পৰা ৫০০খন বিদ্যালয় সম্পূৰ্ণ বা আংশিকভাৱে বন্ধ হৈ আছিল। শিক্ষা মন্ত্ৰালয়ৰ মতে, বিদ্যালয়সমূহত প্ৰতিবাদ আৰু অৱৰোধৰ ফলত শিক্ষাদান ব্যাপকভাৱে ব্যাহত হৈছে।
প্ৰতিবাদ শান্তিপূৰ্ণভাৱে আৰম্ভ হৈছিল যদিও পিছলৈ কিছুমান স্থানত পৰিস্থিতি উত্তপ্ত হৈ পৰে। পেৰিছৰ লগতে লিলে, টোউলৌছে আদি চহৰতো আৰক্ষী আৰু প্ৰতিবাদকাৰীৰ মাজত সংঘাতৰ ঘটনা সংঘটিত হৈছে। কিছুমান স্থানত আৰক্ষীয়ে কন্দুৱা গেছ আৰু অন্যান্য নিয়ন্ত্ৰণমূলক ব্যৱস্থা ব্যৱহাৰ কৰাৰ অভিযোগ উঠিছে। আনহাতে, একাংশ প্ৰতিবাদকাৰীৰ বিৰুদ্ধে আৰক্ষীৰ ওপৰত শিলাবৰ্ষণ, বিদ্যালয়ত অগ্নিসংযোগ আৰু সম্পত্তি ক্ষতিগ্ৰস্ত কৰাৰ অভিযোগ উত্থাপিত হৈছে।
ৰয়টাৰ্ছৰ এক প্ৰতিবেদন অনুসৰি, বিগত সপ্তাহৰ পৰা এই পৰ্যন্ত প্ৰায় ৫,০০০ লোকক গ্ৰেপ্তাৰ কৰা হৈছে আৰু ইয়াৰে প্ৰায় ৮৫ শতাংশই কিশোৰ বুলি চৰকাৰী তথ্যত উল্লেখ কৰা হৈছে। প্ৰতিবাদৰ সময়ত ছাত্ৰ, শিক্ষক আৰু সাধাৰণ লোক আহত হোৱাৰ লগতে সম্পত্তিৰ ক্ষতিৰ পৰিমাণো কেইবা মিলিয়ন ইউৰো হোৱা বুলি ফ্ৰান্স চৰকাৰে সদৰী কৰিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
