ৰাছিয়াই ইউক্ৰেইন আক্ৰমণ কৰাৰ পিছতে বিশ্বৰ অৰ্থনীতিত কুপ্ৰভাৱ পৰিবলৈ আৰম্ভ কৰিছে৷ কোভিড মহামাৰীয়ে কোঙা কৰি থৈ যোৱা বিশ্বৰ অৰ্থনীতিক এইবাৰ ৰাছিয়া আৰু ইউক্ৰেইন যুদ্ধই পুনৰ মুচুৰি পেলোৱাৰ আশংকা কৰা হৈছে৷
ৰাছিয়াই যুদ্ধ ঘোষণা কৰি বৃহস্পতিবাৰে পুৱতি নিশাৰ পৰা ইউক্ৰেইন আক্ৰমণ কৰাৰ পিছতে বিশ্বৰ খাৰুৱা তেলৰ বজাৰত ইন্ধনৰ মূল্য উৰ্দ্ধগামী হোৱা পৰিলক্ষিত হৈছে৷
যুদ্ধৰ আশংকা কৰি থকাৰ সময়তে আন্তঃৰাষ্টৰীয় বজাৰত খাৰুৱা তেলৰ মূল্য প্ৰতি বেৰেলত প্ৰায় ৯৭ ড’লাৰলৈ উৰ্দ্ধগামী হৈছিল৷ যুদ্ধ আৰম্ভ হোৱাৰ কিছু সময়ৰ পিছতে আন্তঃৰাষ্ট্ৰীয় বজাৰত খাৰুৱা তেলৰ মূল্য ১০০ ড’লাৰলৈ বৃদ্ধি হৈছে৷
২০১৪ চনৰ পিছত প্ৰথমবাৰৰ বাবে প্ৰতি বেৰেল খাৰুৱা তেলৰ মূল্য ১০০ ড’লাৰলৈ বৃদ্ধি হৈছে৷ যুদ্ধ আৰম্ভ হোৱা কেইটামান মুহূৰ্তৰ ভিতৰতে প্ৰতি বেৰেল খাৰুৱা তেলৰ মূল্য ১০০ ড’লাৰলৈ হোৰাহোৰে বৃদ্ধি পোৱাৰ পিছত যুদ্ধই ইয়াৰ মূল্য আৰু বৃদ্ধি কৰিব বুলি আশংকা কৰা হৈছে৷
ইফালে এই যুদ্ধ সোনকালে অৱসান হোৱাৰ সম্ভাৱনা নাই বুলিয়ে ধাৰণা কৰা হৈছে৷ ৰাছিয়াই ইউক্ৰেইনক তিনিটা দিশৰ পৰা ঘেৰি আক্ৰমণ কৰাৰ পৰিকল্পনাৰ বিষয়েও প্ৰকাশ পাইছে৷
ইফালে দুদিনমান পূৰ্বে ৰাছিয়াই ইউক্ৰেইনৰ দুই বিবদামান তথা বিচ্ছিন্নতাবাদী অঞ্চলৰ ক্ৰমে ড’নেৎস্ক আৰু লুহানস্কৰ স্বাধীনতা ঘোষণা কৰিছে৷ উল্লেখ্য যে এই দুটা অঞ্চল হৈছে ৰুছমূলীয় লোকৰ বসতি প্ৰধান অঞ্চল৷
আনহাতে কৃষ্ণসাগৰৰ উপদ্বীপ ক্ৰিমিয়াক ২০১৪ চনতে ইউক্ৰেইনৰ পৰা আজুৰি নিছিল ৰাছিয়াই৷ আমেৰিকাসহ পশ্চিমৰ শক্তিধৰ ৰাষ্ট্ৰসমূহে ইউক্ৰেইনক NATOত চামিল কৰি ৰাছিয়াক যুদ্ধৰ বাবে প্ৰলুদ্ধ কৰাৰ লগতে ইউক্ৰেইনৰ ৰাজধানী কীয়েভ আক্ৰমণ কৰিবলৈ উচতাই আহিছে বুলি যুদ্ধ বিশেষজ্ঞসকলে ধাৰণা কৰিছে৷
উল্লেখযোগ্য কথাটো হ’ল ইউক্ৰেইন আৰু ৰাছিয়া দুয়োখনেই হৈছে খাৰুৱা তেলেৰে সমৃদ্ধ ৰাষ্ট্ৰ৷ খাৰুৱা তেল আৰু গেছৰ চহকী ভাণ্ডাৰ হৈছে পশ্চিমৰ দেশ ৰাছিয়া আৰু ইউক্ৰেইন৷ ইউক্ৰেইনৰ পৰা এছিয়াসহ ইউৰোপৰ কে’বাখনো দেশে খাৰুৱা তেলৰ ৰপ্তানি কৰে৷ ৰাছিয়াৰ আক্ৰমণৰ ফলত ইউক্ৰেইনৰ খাৰুৱা তেলৰ খাদসমূহৰৰ বন্ধ হোৱাৰ লগতে ধ্বংসস্তূপত পৰিণত হ’ব বুলি ধাৰণা কৰা হৈছে৷
ইফালে প্ৰাকৃতিক গেছেৰে সমৃদ্ধ ৰাছিয়াও হৈছে বিশ্বৰ দ্বিতীয় বৃহৎ খাৰুৱা তেল উৎপাদনকাৰী ৰাষ্ট্ৰ৷ আনহাতে, ৰাছিয়াই ইউৰোপৰ দেশসমূহলৈ প্ৰায় ৩৫ শাতংশ প্ৰাকৃতি গেছ যোগান ধৰে৷ ৰাছিয়াই ইউক্ৰেইন আক্ৰমণ কৰাৰ ফলত আমেৰিকাসহ পশ্চিমৰ সমৃদ্ধিশালী দেশসমূহে অৰ্থনৈতিক প্ৰতিবন্ধকা আৰোপ কৰিবলৈ আৰম্ভ কৰিছে৷ ইয়াৰ কুফল খাৰুৱা তেলৰ ৰপ্তানিটো পৰাতো নিশ্চিত৷
যুদ্ধৰ এই দামামাৰ মাজত সেয়ে বিশ্বৰ ইউৰোপৰ প্ৰায়বোৰ আৰু এছিয়াৰ একাংশ ৰাষ্ট্ৰত খাৰুৱা তেলৰ নাটনিয়ে দেখা দিয়াটো প্ৰায় নিশ্চিত হৈছে৷ ইয়াৰ ফলত আন্তৰাষ্ট্ৰীয় বজাৰত খাৰুৱা তেলৰ দাম হোৰাহোৰে বৃদ্ধি হ’বলৈ আৰম্ভ কৰিছে৷ ইয়াৰ কুপ্ৰভাৱ ভাৰততো পৰাতো প্ৰায় খাটাং৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
