ৰাষ্ট্ৰপতি ভ্লাদিমিৰ পুটিনে যুদ্ধ ঘোষণা কৰাৰ পিছতেই বৃহস্পতিবাৰে পুৱতি নিশাৰ পৰাই ৰাছিয়াই ইউক্ৰেইন আক্ৰমণ কৰিছে৷ ৰাছিয়াই যুদ্ধ বিমানেৰে ইউক্ৰেইনত আক্ৰমণ চলোৱাৰো দাবী কৰিছে৷ ৰাছিয়াই ক্ষেপণাস্ত্ৰ আৰু যঁজাৰু বিমানেৰে আক্ৰমণ চলাইছে৷
ৰাছিয়াই দাবী কৰিছে যে আক্ৰমণ আৰম্ভ কৰিয়েই ইউক্ৰেইনৰ এক বিমান ঘাটি ইতিমধ্যে ধ্বংসস্তূপত পৰিণত কৰিছে৷ ৰুছ বাহিনীৰ আক্ৰমণ ইতিমধ্যে ৭ গৰাকী ইউক্ৰেইনৰ নাগৰিকৰ মৃত্যু ঘটাৰ লগতে অন্য ৯ গৰাকী লোক আহত হোৱা বুলিও প্ৰকাশ পাইছে৷
ইফালে ইউক্ৰেইনেও ৰুছ বাহিনীক প্ৰত্যাক্ৰমণ কৰিছে৷ ইউক্ৰেইনৰ দাবী যে লুহানস্ক এলেকাত ৰাছিয়াৰ ৫ খন যুদ্ধ বিমানৰ লগতে এখন হেলিকপ্টাৰো গুলীয়াই ভূপতিত কৰিছে ইউক্ৰেইনৰ সেনাই৷
Footage of the airport bombing in Ivano-Frankivsk. #Ukraine #Russia pic.twitter.com/MLVuNyPItI
— Ω (@W4RW4ATCHER) February 24, 2022
ইফালে মস্কোৱে দাবী কৰিছে ইউক্ৰেইনৰ জনবসতি থকা অঞ্চল তথা সাধাৰণ জনগণৰ ওপৰত আক্ৰমণ কৰা নাই৷ ৰুছ সেনাই কেৱল ইউক্ৰেইনৰ সামৰিক ঘাটি, অস্ত্ৰভাণ্ডাৰ আৰু বিমান ঘাটিসমূহতহে আক্ৰমণ কৰা বুলি দাবী কৰিছে৷
উল্লেখ্য যে ইতিপূৰ্বে ৰাছিয়াৰ ৰাষ্ট্ৰপতি ভ্লাদিমিৰ পুটিনে ইউক্ৰেইনৰ সেনাক অস্ত্ৰ বৰ্জন কৰিবলৈ সকীয়নি দিছিল৷ পুটিনে হুংকাৰ দি কৈছিল যে ইউক্ৰেইনৰ সেনাই অস্ত্ৰ বৰ্জন কৰক নহ’লে ৰুছ বাহিনীৰ আক্ৰমণৰ বাবে সাজু হওক৷
ইফালে আমেৰিকা আৰু পশ্চিমৰ শক্তিধৰ দেশসমূহৰ সকীয়নিলৈ কোনো কেৰেপ নকৰি ৰাছিয়াই ইউক্ৰেইন আক্ৰমণ কৰিছে৷ ইউক্ৰেইনৰ এক প্ৰশাসনিক বিষয়াই দাবী কৰিছে যে ৰাছিয়াৰ আক্ৰমণত ইউক্ৰেইনৰ কে’বাশ মানুহৰ মৃত্যু ঘটিছে৷
আনফালে ইউক্ৰেইনৰ এগৰাকী সাংসদ ছোফিয়া ফেডিনাই সংবাদ মাধ্যম আগত কৈছে যে ইউক্ৰেইনৰ সাধাৰণ লোকক সুৰক্ষিতভাৱে ৰাখিবলৈ দেশখনৰ বাংকাৰসমূহ সাজু কৰি তোলা হৈছে৷ দেশৰ মানুহক নিৰাপত্তাৰ কাৰণে উক্ত বাংকাৰসমূহলৈ লৈ যোৱা হ’ব বুলিও তেওঁ প্ৰকাশ কৰিছে৷
ৰাছিয়াৰ আক্ৰমণক সৰ্বশক্তি প্ৰয়োগ কৰি প্ৰতিৰোধ কৰা হ’ব আৰু তেওঁলোক জয়ী হ’বই বুলি দাবী কৰিছে ইউক্ৰেইনৰ বিদেশ মন্ত্ৰী দিমিত্ৰো কুলেবাই ৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
