অসম লাইভ২৪ঃ
‘সমম্বয়ৰ বাবেই এই বস্ত্ৰ৷ আদৰি লওক গামোছাৰ নামেৰে এই নতুন বস্ত্ৰক৷’ দুই মন্ত্ৰীয়েই হাঁহি হাঁহি পিন্ধিছে এই বস্ত্ৰ৷ ফটো ভাইৰেল হৈ পৰা মাত্ৰকেই ৰাইজো চিন্তিত, ‘GI-টেগ পাইয়ো আকৌ সংকটত নেকি গামোছা?’
মন্ত্ৰী বিমল বৰা আৰু ৰণোজ পেগুৰ ডিঙিত উজলিছে এখন বস্ত্ৰ৷ পাৱাৰলুমৰ গামোছা বন্ধ কৰিবলৈ চৰকাৰে নিৰ্দেশ দিয়াৰ সময়তে হিমন্ত নেতৃত্বাধীন চৰকাৰৰ মন্ত্ৰীৰ ডিঙিত এক বিশেষ বস্ত্ৰ৷ গামোছাক ন’ ৰূপ দিয়াৰ আঁৰৰ এই পৰিকল্পনা কিন্তু আজিৰ নহয়৷ ২০১৭ চনতেই লোৱা হৈছিল গামোছাৰ বিশেষ নক্সা৷ বাংলা সাহিত্যসভাই অসমীয়াৰ গামোছাক লৈ প্ৰস্তুত কৰিছিল নক্সা৷ বৰাক উপত্যকা সাহিত্য-সংস্কৃতি সন্মিলনীয়ে লৈছিল এই সিদ্ধান্ত৷ বৰাকত অসমীয়া গামোছা পিন্ধোৱাক লৈ আপত্তি আছিল একাংশৰ৷ বৰাক উপত্যকা সাহিত্য-সংস্কৃতি সন্মিলনীৰ কাছাৰ জিলা সমিতিৰ অধিবেশনতে লোৱা হৈছিল গামোছাৰ বিশেষ নক্সা৷ অসমীয়া গামোছাৰে বাংলা সাহিত্যিকক আদৰণি জনোৱাত ক্ষোভিত হৈছিল বহুকেইজন সাহিত্যিক৷ বাংলা সাহিত্যিক মুজাম্মিল আলি লস্কৰে তেতিয়া প্ৰশ্ন কৰিছিল, ‘অসমীয়া গামোছা মোক কিয় পিন্ধাইছে?’
কাছাৰ জিলা সভাপতি তৈমুর ৰা জা চৌধুৰীৰো আছিল ঘোৰ আপত্তি৷ তেওঁ অনুষ্ঠানতেই মুকলিকৈ কৈছিল, ‘বহু অনুষ্ঠানতেই এই গামোছা আমাক দিয়ে, অসমীয়া গামোছাৰ প্ৰতি বিদ্বেষ নাথাকিলেও গ্ৰহণ কৰাত অসুবিধা হয়৷ অসমীয়াৰ অনুষ্ঠানত দিলেহে সন্মানবোধ কৰো৷ ব্ৰহ্মপুত্ৰ উপত্যকাত পালে আমাৰ আপত্তি নাই৷ বৰাক উপত্যকাত কিন্তু এয়া ধাৰ কৰা সংস্কৃতিহে৷
কাছাৰ জিলা সন্মিলনৰ পাছতেই একাংশই এই মন্তব্যৰ প্ৰতি আপত্তিও দৰ্শাইছিল৷ উত্থাপিত হৈছিল একোটা প্রশ্নও, বৰাক অসমৰেই এটা উপত্যকা নহয়নে? বুদ্ধিজীৱীৰ সন্মিলনতেই এনেকুৱা মন্তব্য কিয়? উত্তৰ দিবলৈ দল সংগঠন আগুৱাই গ’লেও নিৰৱ ভূমিকা লৈছিল চৰকাৰীপক্ষই৷ তেতিয়া মুখ্যমন্ত্ৰীৰ দায়িত্বত আছিল সততে বৰাক-ব্ৰহ্মপুত্ৰৰ সমম্বয়ৰ কথা কোৱা মুখ্যমন্ত্ৰী সৰ্বানন্দ সোনোৱাল৷ সোনোৱালে কিন্তু তেতিয়াও লৈছিল নীৰৱ ভূমিকা৷
অসমীয়াৰ স্বাভিমান গামোছাক অপমানক লৈ বৰ্তমান ছচিয়েল মিডিয়াত আৰম্ভ হৈছে চৰ্চা৷ গামোছাক দিয়া ন’ ৰূপ সঠিকনে সেই বিচাৰ অসমীয়াই কৰিব, কিন্তু হাঁহি হাঁহি এই বস্ত্ৰ গ্ৰহণ কৰা অসম চৰকাৰৰ দুই মন্ত্ৰীক কি ক’ব জনতাই সেয়াহে এতিয়া গুৰুত্বপূৰ্ণ প্ৰশ্ন হৈ পৰিছে?
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
