অসম লাইভ২৪ঃ মহাভাৰতৰ কুৰুক্ষেত্ৰৰ যুদ্ধত অৰ্জূনৰ সাৰথিৰ দায়িত্বত আছিল শ্ৰীকৃষ্ণ৷ তেওঁ এই যুদ্ধত কিন্তু নিজে অস্ত্ৰ ধাৰণ কৰা নাছিল৷ অৰ্জূনক প্ৰতি মুহূৰ্তত উপদেশ দি যুদ্ধত জয়লাভ কৰাৰ বাবে সহায় কৰিছিল সখা শ্ৰীকৃষ্ণই৷ কুৰুক্ষেত্ৰৰ মহাৰণ আৰম্ভ হোৱাৰ আগে আগে সংশয়াবিষ্ট অৰ্জুনক জীৱনৰ ধৰ্ম আৰু কৰ্মৰ আদৰ্শৰ পাঠ দিছিল৷ তৃতীয় পাণ্ডৱক দিয়া কৃষ্ণৰ এই বাণীসমূহ উল্লেখ থকা একমাত্ৰ গ্ৰন্থই হৈছে শ্ৰীমদ ভাগৱৎ গীতা৷ গীতাত জীৱনৰ সঠিক দৰ্শনৰ কথা উল্লেখ আছে৷ সকলো সমস্যাৰ সমাধান আৰু জীৱন সম্পৰ্কীয় যিকোনো প্ৰশ্নৰ উত্তৰ গীতাত পোৱা যায়৷ হাজাৰ হাজাৰ বছৰৰ অন্ততো গীতাত উল্লেক থকা সকলো কথাই আজিও প্ৰাসংগিক৷ গীতাতেই শ্ৰী কৃষ্ণই জনাইছে যে জীৱনত ইচ্ছা নাথাকিলেও পাপ কৰিবলৈ বাধ্য হয় বহু মানুহ৷ এই পাপৰ পৰা কেনেকৈ মুক্ত হ’ব সেই কথাও গীতাত উল্লেখ কৰি থৈ গৈছে শ্ৰীকৃষ্ণই৷
গীতাৰ বাণী
গীতাত অৰ্জুনে প্ৰশ্ন কৰিছে, ‘হে কৃষ্ণ, মানুহে কিয় পাপ কৰে? যি মানুহে পাপ কৰিবলৈ ইচ্ছা নকৰে তেনে মানুহে পাপকৰ্মত ব্ৰতী হ’লে ইয়াৰ পৰা কেনেকৈ উদ্ধাৰ পাব?’ উত্তৰত শ্ৰী কৃষ্ণই কৈছিল, ‘মানুহৰ লোভ আৰু কায়েমী স্বাৰ্থই এজন মানুহক পাপ কৰিবলৈ বাধ্য কৰে৷ গীতাৰ বাণী অনুসৰি বহু সময়ত মানুহে জানিবুজি কেতিয়াও পাপ কৰ্মত লিপ্ত হ’ব নোখোজে৷ বিবেকেও বাৰে বাৰে বাধা দিয়ে৷ কিন্তু মানুহৰ মনৰ লোভ যেতিয়া বাঢ়ে তেতিয়া বিবেক হেৰাই যায়৷ নিজৰ লোভ লালসাক চৰিতাৰ্থ কৰি ললেই পাপ নিজেই কৰি পেলাই৷ মানুহৰ বাবে লোভ আৰু লালসাক জয় কৰা খুবেই কঠিন৷ এবাৰ যেতিয়া পাপ কাম কৰি পেলাই সেই মানুহে বাৰে বাৰেই পাপকৰ্মত ব্ৰতী হ’ব লগা হয়েই৷ এনেকৈ পাপৰ সাগৰতেই এজন মানুহ ডুব যায়৷’
গীতাত শ্ৰীকৃষ্ণই কৈছে যে, লোভৰ পৰাই আমাৰ মনত জন্ম হয় ক্ষোভৰো৷ আৰু এই ৰাগ বা ক্ষোভৰ পৰাই জন্ম হয় সংশয়ৰো৷ মনত সংশয়ে দেখা দিলে মানুহৰ মনত বুদ্ধিও হেৰাই যায়৷ আৰু বুদ্ধি হেৰাই গ’লেই এজন মানুহ নিজে নিজে ধ্বংস হ’বলৈ আৰম্ভ হয়৷ গীতাত উল্লেখ আছে . যেনেকৈ ধোঁৱাই জুইক ঢাকি ৰাখে তেনেকৈয়ে লোভ আৰু লালসাই মানুহৰ জ্ঞান বুদ্ধিকো আচ্ছন্ন কৰি পেলায়৷ সেয়ে মানুহে বাৰে বাৰে পাপ কৰিবলৈ আৰম্ভ কৰে৷
পাপৰ পৰা কেনেকৈ মুক্তি পাব?
ভগৱান শ্ৰীকৃষ্ণই পাপৰ পৰা কেনেকৈ মুক্তি পাব তাৰো উপায় দি থৈছে৷ লোভ আৰু লালসাৰ পৰা নিজকে মুক্ত কৰিব পাৰিলেও পাপৰ পথৰ পৰা ওলাই অহা সম্ভৱ৷ ইয়াৰ বাবে মোহমুক্তিও ঘটিব পাৰে৷ য’ত বেছি লালসা থাকিব তাতেই বেছি পাপো হয়৷ তেনে লালসা ত্যাগ কৰিবলৈ শিকক, পাপৰ পৰা মুক্তি পোৱাৰ ইয়াতকৈ ডাঙৰ উপায় একো নাই৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
