পূৰ্বৰ তুলনাত অধিক অপৰাধপ্ৰৱণ, অশান্তিকৰ হৈ পৰিছে সমগ্ৰ বিশ্ব। শেহতীয়াকৈ গ্লোবেল পীচ ইণ্ডেক্সত প্ৰকাশ পাইছে এই তথ্য। তথ্য অনুসৰি বিশ্বৰ ৯৯খন দেশৰ সাম্প্ৰতিক পৰিস্থিতি অত্যন্ত চিন্তাজনক। ইনষ্টিটিউট অব ইকোনমিকছ এণ্ড পীচৰ তথ্য অনুসৰি বিশ্বৰ ৭৩% অঞ্চলতেই ২০০৭ৰ তুলনাত অশান্তিকৰ পৰিবেশ বৃদ্ধি পাইছে। এই তালিকা অনুসৰি বিশ্বৰ সবাটোকৈ শান্তিপূৰ্ণ দেশখন হৈছে আইচলেণ্ড। আইচলেণ্ডে ক্ৰমাগতভাৱে ১৯সংখ্যকবাৰৰ বাবে শান্তিপূৰ্ণ ৰাষ্ট্ৰৰ মৰ্যাদা লাভ কৰিছে। ইয়াৰ পিছতেই এই তালিকাত আছে ক্ৰমে নিউজীলেণ্ড, ছুইজাৰলেণ্ড, শ্লোভেনিয়া আৰু আয়াৰলেণ্ড। লক্ষণীয়ভাৱে সবাটোকৈ অশান্ত ৰাষ্ট্ৰ তালিকাৰ প্ৰথমেই আছে ৰাছিয়া। ৰাছিয়াৰ পিছতে আছে আফ্ৰিকান দেশ ছুডান, ডেমক্ৰেটিক ৰিপাব্লিক অব কংগো, ৰাছিয়াৰ চুবুৰীয়া ৰাষ্ট্ৰ ইউক্ৰেইন আৰু মধ্যপ্ৰাচ্যৰ যুদ্ধৰ পৰিৱেশৰ মাজত থকা ইজৰাইল। GPIৰ তথ্য মতে দক্ষিণ এছিয়াতো দ্ৰুত হাৰত অৱনমিত হৈছে শান্তিপূৰ্ণ পৰিৱেশ। এই গৱেষণা মতে দক্ষিণ এছিয়াৰ দেশসমূহত পূৰ্বৰ তুলনাত দ্ৰুত হাৰত অৱনমিত হৈছে শান্তিৰ বাতাবৰণ।
উদাহৰণস্বৰূপে পূৰ্বৰ তুলনাত নেপাল ২৬ টা স্থান তললৈ অৱনমিত হয়। আনহাতে আমাৰ চুবুৰীয়া ৰাষ্ট্ৰ পাকিস্তানে এই তালিকাৰ ১৫২ সংখ্যক স্থানত আছে। অৱশ্যে ভাৰতে পূৰ্বৰ ১১৫নং স্থানতে অক্ষুণ্ণ আছে। আমেৰিকাই এই তালিকাৰ ১৩৪সংখ্যক স্থানত আছে। অৰ্থাৎ আমেৰিকাৰ স্থানত ভাৰততকৈও তলত।
GPIৰ তথ্য অনুসৰি ২০২৫ত বিশ্বৰ বিভিন্ন দেশত হোৱা যুদ্ধৰ পৰিৱেশে শান্তি বিঘ্নিত কৰাৰ উপৰিও আৰ্থিক দিশতো প্ৰভাৱ বিস্তাৰ কৰিছে। ২০১৮ৰ পৰা ২০২৫লৈ এই সময়ছোৱাত অত্যধুনিক প্ৰযুক্তিৰে নিৰ্মিত ড্ৰোন আক্ৰমণৰ ঘটনা ১১,৫০০% বৃদ্ধি পাইছে। যুদ্ধত ড্ৰোনৰ দৰে প্ৰযুক্তিৰ ব্যৱহাৰ কেৱল একোখন দেশেই নহয় বিশ্বৰ বিভিন্ন প্ৰান্তৰ ৫৬৫টা সন্ত্ৰাসবাদী সংগঠনেও এই সময়ছোৱাত কৰাৰ তথ্য প্ৰকাশ কৰিছে সংস্থাটোৱে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
