বহুখিনি হ্ৰাস পালে সোণৰ মূল্য, ৰূপৰো একে অৱস্থা, এদিনতে লোকচান ১০.৭ লাখ কোটি টকা
হ্ৰাস পাইছে সোণৰ মূল্য, সংবাদ মাধ্যমৰ বাতৰি অনুসৰি বাজেটৰ পিছতে সোণৰ মূল্য ৫ শতাংশতকৈ অধিক হ্ৰাস পাইছে। যাৰ বাবে দিনটোত ১০.৭ লাখ কোটিতকৈ অধিক লোকৰ লোকচান হ’ব বুলি অনুমান কৰা হৈছে। দৰাচলতে বিত্তমন্ত্ৰী নিৰ্মলা সীতাৰমণে ২৩ জুলাইত বাজেট দাখিল কৰিছিল, য’ত সোণৰ ওপৰত শুল্ক হ্ৰাস কৰাৰ কথা ঘোষণা কৰিছিল।
তথ্য অনুসৰি বাজেটৰ এদিন আগলৈকে এই বছৰ সোণৰ মূল্য ১৪.৭% বৃদ্ধি পাইছিল। সোণ প্ৰিয় ভাৰতীয়ৰ এটা অভ্যাস আছে যে যিমান পাৰি সিমান সোণ ক্ৰয় কৰি নিজৰ লগত ৰখা। ইয়াৰ আঁৰৰ উদ্দেশ্য হৈছে সোণৰ মূল্য বৃদ্ধি আৰু লাভ অৰ্জন কৰা। কিন্তু ২০২৪ চনৰ বাজেটৰ পাছত দেশৰ লাখ লাখ পৰিয়াল লোকচানৰ সন্মুখীন হৈছে৷ এক প্ৰতিবেদন অনুসৰি শ্বেয়াৰ বজাৰত বিনিয়োগ কৰা পৰিয়ালতকৈ সোণৰ মালিক পৰিয়ালৰ সংখ্যা বহু বেছি।
প্ৰকাশিত বাতৰি অনুসৰি বিশ্বৰ মুঠ সোণৰ প্ৰায় ১১ শতাংশই ভাৰতত আছে। কোৱা হয় যে ই ছুইজাৰলেণ্ড, আমেৰিকা আৰু জাৰ্মানী আদিৰ সোণৰ মজুততকৈও অধিক আছে ভাৰতত। এক প্ৰতিবেদন অনুসৰি ভাৰতত মুঠ ৩০ হাজাৰ টনতকৈ অধিক সোণ মানুহৰ হাতত আৰু মন্দিৰত আছে।
বিত্তমন্ত্ৰী নিৰ্মলা সীতাৰমণে ২০২৪ চনৰ বাজেটত সোণ আৰু ৰূপৰ মৌলিক শুল্ক ৬ শতাংশলৈ হ্ৰাস কৰিছে। বিশেষজ্ঞসকলৰ মতে, সোণৰ ওপৰত কৰ পূৰ্বৰ ১৮.৫ শতাংশৰ পৰা ৯ শতাংশলৈ আধালৈ হ্ৰাস কৰা হৈছে, য’ত জি এছ টিও অন্তৰ্ভুক্ত কৰা হৈছে। সেয়ে এইদৰে হ্ৰাস পাইছে সোণৰ মূল্য। ভৱিষ্যতে আৰু হ্ৰাস পোৱাৰ সম্ভৱনা।
আজিৰ তাৰিখত সোণ প্ৰতি ১০ গ্ৰামত ৬৮ হাজাৰ হৈছে। আনহাতে ৰূপ প্ৰতি কেজিত ৮১ হাজাৰ টকা। ৰাষ্ট্ৰীয় স্তৰত ৯৯৯ শুদ্ধতা থকা ২৪ কেৰেট সোণৰ মূল্য ৬৮১৭৭ টকা হৈছে। আনহাতে ৯৯৯ শুদ্ধতা থকা ৰূপত ৮১৮০১ টকা।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
