অষ্টম বেতন আয়োগ গঠন হোৱাৰ পিছৰে পৰা দৰমহা আৰু বিভিন্ন ভাট্টা বৃদ্ধিক লৈ ব্যাপক আলোচনা চলি আছে। এই সময়ছোৱাত বিশেষকৈ হাউছ ৰেণ্ট এলাউন্স (HRA) বৃদ্ধি হোৱাৰ সম্ভাৱনাক লৈ অধিক চৰ্চা হৈছে। এই চৰ্চাৰ মাজতে কেন্দ্ৰীয় চৰকাৰৰ ৫০ লাখতকৈ অধিক কৰ্মচাৰী আৰু ৬৯ লাখ পেঞ্চনভোগীয়ে পাব পাৰে সুখবৰ। সাম্প্ৰতিক অনুমান অনুসৰি, যদি চৰকাৰে নতুন বেতন আয়োগত ২.০ ফিটমেণ্ট ফেক্টৰ (Fitment Factor) প্ৰয়োগ কৰে, তেন্তে লেভেল–১ৰ পৰা লেভেল–৫লৈকে কৰ্মচাৰীসকলৰ HRAত উল্লেখযোগ্য বৃদ্ধি হ’ব পাৰে। এই অনুসৰি, বিভিন্ন শ্ৰেণীৰ চহৰৰ ভিত্তিত HRA মাহে ১০,৮০০টকাৰ পৰা ১৭,৫২০টকা পৰ্যন্ত হ’ব পাৰে।
HRA কেনেকৈ নিৰ্ধাৰণ কৰা হয়?
হাউছ ৰেণ্ট এলাউন্স (HRA) হৈছে কেন্দ্ৰীয় চৰকাৰৰ অধীনৰ কৰ্মচাৰীসকলৰ মূল দৰমহাৰ এটা গুৰুত্বপূৰ্ণ অংশ, যি ভাৰা ঘৰত বাস কৰা কৰ্মচাৰীসকলক ঘৰৰ ভাৰাৰ খৰচ বহনৰ বাবে দিয়া হয়। ইয়াৰ আন এটা গুৰুত্বপূৰ্ণ সুবিধা হৈছে, ভাৰাতীয়া ঘৰত বাস কৰা কৰ্মচাৰীসকলে আয়কৰ আইন অনুসৰি HRAৰ ওপৰত কৰ ৰেহাই দাবী কৰিব পাৰে।
দেশৰ চহৰসমূহৰ মাজত শ্ৰেণী বিভাজন
চৰকাৰে জনসংখ্যাৰ ভিত্তিত দেশৰ চহৰসমূহক তিনিটা শ্ৰেণীত ভাগ কৰিছে—X, Y আৰু Z। যদি চৰকাৰে ২.০ ফিটমেণ্ট ফেক্টৰ অনুমোদন কৰে, তেন্তে নিম্ন স্তৰৰ কৰ্মচাৰীসকলৰ HRA যথেষ্ট বৃদ্ধি পাব।
সম্ভাৱ্য হিচাপ অনুসৰি—
X শ্ৰেণীৰ মহানগৰসমূহত লেভেল–১ৰ কৰ্মচাৰীয়ে মাহে ১০,৮০০টকা আৰু লেভেল-৫ৰ কৰ্মচাৰীয়ে সৰ্বাধিক ১৭,৫২০টকা HRA লাভ কৰিব পাৰে।
Y শ্ৰেণীৰ চহৰত এই পৰিমাণ ৭,২০০টকাৰ পৰা ১১,৬৮০টকাৰ ভিতৰত থাকিব পাৰে। Z শ্ৰেণীৰ সৰু চহৰত HRA ৩,৬০০টকাৰ পৰা ৫,৮৪০ টকালৈকে হোৱাৰ সম্ভাৱনা আছে। এই বৃদ্ধিৰ ফলত কৰ্মচাৰীসকলৰ ইন-হেণ্ড দৰমহা যথেষ্ট বৃদ্ধি পাব বুলি আশা কৰা হৈছে।
নতুন বেতন আয়োগৰ পৰামৰ্শ কেতিয়া কাৰ্যকৰী হ’ব?
উল্লেখ্য যে, অষ্টম বেতন আয়োগে ৩ নৱেম্বৰ ২০২৫ তাৰিখৰ পৰা আনুষ্ঠানিকভাৱে কাম আৰম্ভ কৰিছে। পূৰ্বৰ বেতন আয়োগসমূহৰ অভিজ্ঞতা অনুসৰি, সম্পূৰ্ণ প্ৰতিবেদন প্ৰস্তুত কৰিবলৈ যথেষ্ট সময় লাগে। বজাৰৰ বিশেষজ্ঞসকলৰ মতে, অষ্টম বেতন আয়োগে ২০২৭ চনৰ ফেব্ৰুৱাৰীৰ পৰা এপ্ৰিল মাহৰ ভিতৰত চৰকাৰক চূড়ান্ত প্ৰতিবেদন দাখিল কৰিব পাৰে। তাৰ পিছত প্ৰতিবেদনখন কেবিনেটৰ অনুমোদনৰ বাবে প্ৰেৰণ কৰা হ’ব আৰু অনুমোদন লাভ কৰাৰ পিছত নতুন দৰমহা আৰু ভাট্টাৰ হাৰ কাৰ্যকৰী কৰা হ’ব।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
