ভাৰতত পুৰুষ আৰু মহিলাৰ মাজত বন্ধ্যাত্ব (Infertility)ৰ সমস্যা ক্ৰমাগতভাৱে বৃদ্ধি পাইছে। ইয়াৰ এটা ডাঙৰ কাৰণ হৈছে অস্বাস্থ্যকৰ জীৱনশৈলী আৰু অপুষ্টিকৰ খাদ্যাভ্যাস। বৰ্তমান সময়ত সন্তান জন্ম দিয়াৰ ক্ষেত্ৰত মানুহৰ চিন্তাধাৰাত যথেষ্ট পৰিৱৰ্তন আহিছে। কেৰিয়াৰ, দায়িত্ব আৰু আন বহুতো কাৰণৰ বাবে অধিকাংশ দম্পতীয়ে ৩০ বছৰৰ পিছত সন্তান লোৱাৰ সিদ্ধান্ত লয়। গৱেষণাসমূহে সূচায় যে ৩০ বছৰৰ পিছত গৰ্ভধাৰণ কিছু কঠিন হ’ব পাৰে। ইয়াৰ উপৰিও অস্বাস্থ্যকৰ খাদ্যাভ্যাস আৰু জীৱনশৈলীয়েও এই সমস্যাক অধিক বৃদ্ধি কৰে।
খাদ্যৰ জৰিয়তে কেনেকৈ দূৰ কৰিব ইনফাৰ্টিলিটীৰ সমস্যা?
বিশেষজ্ঞসকলৰ মতে, খাদ্যত কিছুমান পুষ্টিকৰ উপাদান অন্তৰ্ভুক্ত কৰিলে প্ৰজনন স্বাস্থ্য (Fertility Health) উন্নত কৰাত সহায় হ’ব পাৰে। সেই উদ্দেশ্যে ঘৰতে এটা বিশেষ ফাৰ্টিলিটি পাউডাৰ প্ৰস্তুত কৰিব পাৰি, যি পুৰুষ আৰু মহিলা উভয়ৰে স্বাস্থ্যৰ বাবে উপকাৰী হ’ব পাৰে।
মখানা আৰু বিভিন্ন বীজেৰে প্ৰস্তুত ফাৰ্টিলিটি পাউডাৰ
এই পাউডাৰ বনাবলৈ আপোনাক প্ৰয়োজন হ’ব—
একাপ মখানা, একাপ ভজা ক’লা চনা, একাপ ওটছ, একাপ বাদাম, একাপ আখৰোট, আধা কাপ কুমলীয়া (Pumpkin)ৰ বীজ। এই সকলো উপাদান প্ৰ’টিন, স্বাস্থ্যকৰ চৰ্বি, ফ’লেট, আইৰন, ভিটামিন E আৰু বিভিন্ন এণ্টিঅক্সিডেণ্টৰ উৎকৃষ্ট উৎস। এইবোৰে প্ৰজনন স্বাস্থ্য উন্নত কৰাত সহায় কৰিব পাৰে।
কেনেদৰে প্ৰস্তুত কৰিব?
প্ৰথমে মখানা আৰু আন সকলো উপাদান অলপ ভাজি লওক। তাৰ পিছত সকলোবোৰ একেলগে গ্ৰাইণ্ডাৰত মিহলাই গুড়ি কৰি লওক। এই পাউডাৰ এটা বায়ুৰোধী পাত্ৰত সংৰক্ষণ কৰিব পাৰে।
কেনেদৰে সেৱন কৰিব?
প্ৰতিদিনে ১ চামুচ পাউডাৰ ২০০ মিলিলিটাৰ কুহুমীয়া গাখীৰত মিহলাই খাব পাৰে। ইচ্ছা কৰিলে দৈ বা স্মুথিতো মিহলাই খাব পাৰি। ইয়াক পুৱা বা সন্ধিয়াৰ জলপান হিচাপে গ্ৰহণ কৰাটো উত্তম।
মখানা:
ভজা মখানাত প্ৰ’টিন, মেগনেছিয়াম, কেলচিয়াম, পটাছিয়াম আৰু এণ্টিঅক্সিডেণ্ট থাকে। ই শৰীৰক শক্তি যোগোৱাৰ লগতে অক্সিডেটিভ ষ্ট্ৰেছ কমোৱাত সহায় কৰে।
ভজা ক’লা বুট:
ই উচ্চ প্ৰ’টিনযুক্ত খাদ্য। ইয়াৰ লগতে ফ’লেট, আইৰন, জিংক আৰু ফাইবাৰ থাকে। ফ’লেট আৰু আইৰনে প্ৰজনন স্বাস্থ্য উন্নত কৰাত সহায়ক হ’ব পাৰে।
ওটছ:
ওটছত বিটা-গ্লুকান ফাইবাৰ আৰু ভিটামিন বি-কমপ্লেক্স থাকে। ই তে*জত চেনিৰ মাত্ৰা নিয়ন্ত্ৰণত ৰখা আৰু ইনচুলিনৰ সংবেদনশীলতা উন্নত কৰাত সহায় কৰিব পাৰে।
বাদাম:
বাদাম ভিটামিন E, স্বাস্থ্যকৰ চৰ্বি, মেগনেছিয়াম আৰু প্ৰ’টিনৰ উৎকৃষ্ট উৎস। ভিটামিন E শক্তিশালী এণ্টিঅক্সিডেণ্ট, যিয়ে পুৰুষৰ শুক্ৰাণুৰ গুণগত মান উন্নত কৰাত সহায় কৰিব পাৰে।
আখৰোট:
আখৰোটত ওমেগা-৩ ফেটি এচিড, কপাৰ আৰু মেংগানিজ থাকে। কিছুমান গৱেষণাই সূচাইছে যে ই পুৰুষৰ শুক্ৰাণুৰ সংখ্যা আৰু গুণগত মান বজাই ৰখাত সহায়ক হ’ব পাৰে।
মন কৰিবলগীয়া কথা:
এই পাউডাৰটো পুষ্টিকৰ খাদ্যৰ অংশ হিচাপে উপকাৰী হ’ব পাৰে, কিন্তু ইয়াক বন্ধ্যাত্বৰ নিশ্চিত চিকিৎসা বুলি গণ্য কৰিব নালাগে। যদি দীৰ্ঘদিন ধৰি গৰ্ভধাৰণত অসুবিধা হৈ আছে, তেন্তে স্ত্ৰীৰোগ বিশেষজ্ঞ বা প্ৰজনন বিশেষজ্ঞৰ পৰামৰ্শ লোৱাটো অতি জৰুৰী।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
