উত্তৰ প্ৰদেশৰ ইছলামিক ধৰ্মপ্ৰচাৰক মৌলানা জাৰজিছ আনছাৰীয়ে ঝাৰখণ্ডৰ এখন ধৰ্মীয় সভাত ভগৱান কৃষ্ণক লৈ কৰা এক আপত্তিজনক মন্তব্যক কেন্দ্ৰ কৰি সমগ্ৰ দেশজুৰি বিতৰ্কৰ সৃষ্টি হৈছে। এই মন্তব্যৰ পিছত বিভিন্ন হিন্দু সংগঠনে তীব্ৰ আপত্তি প্ৰকাশ কৰাৰ লগতে আনছাৰিৰ বিৰুদ্ধে তীব্ৰ সমালোচনাত মুখৰ হৈ পৰিছে। উত্তৰ প্ৰদেশৰ ইটাৱাৰ বাসিন্দা জাৰজিছ আনছাৰী পূৰ্বেও বিতৰ্কিত মন্তব্যৰ বাবে চৰ্চাত আহিছিল। এইবাৰ আনছাকীয়ে দাবী কৰিছে যে ভগৱান কৃষ্ণই ইছলামৰ শিক্ষা দিছিল আৰু দিনটোত ৫ বাৰ নামাজ আদায় কৰিছিল। তেওঁৰ এই বক্তব্যৰ ভিডিঅ’ সামাজিক মাধ্যমত ভাইৰেল হৈ পৰাৰ পিছত ব্যাপক প্ৰতিক্ৰিয়াৰ সৃষ্টি হৈছে আৰু তেওঁৰ বিৰুদ্ধে আইনী ব্যৱস্থা গ্ৰহণৰ দাবীও উঠিছে।
মৌলানা জাৰজিছ আনছাৰীয়ে কি কৈছিল?
বিভিন্ন সংবাদমাধ্যমৰ তথ্য অনুসৰি, ২৩ জুনত ঝাৰখণ্ডত অনুষ্ঠিত এখন ধৰ্মীয় সভাত তেওঁ বিতৰ্কিত মন্তব্যটো কৰিছিল। শ্ৰীমদ্ভগৱদ্গীতাৰ ষষ্ঠ অধ্যায়ৰ এটা শ্লোকৰ উল্লেখ কৰি আনছাৰীয়ে কয়, “যদি আমাৰ হিন্দু ভাইসকলে বেয়া নাপায়, তেন্তে কৃষ্ণজীয়েও দিনটোত পাঁচবাৰ নামাজ পঢ়িছিল। যদি বিশ্বাস নকৰে, তেন্তে ভগৱদ্গীতাৰ ষষ্ঠ অধ্যায়ৰ দশম শ্লোক পঢ়ক।”
সদায়ে বিতৰ্কত থাকিবলৈ ভাল পোৱা আনছাৰীয়ে আৰু দাবী কৰে যে উক্ত শ্লোকত সমগ্ৰ শৰীৰেৰে ঈশ্বৰৰ উপাসনা কৰাৰ কথা কোৱা হৈছে, যিটো তেওঁৰ মতে ইছলামত নামাজ আদায় কৰাৰ পদ্ধতিৰ সৈতে সাদৃশ্যপূৰ্ণ। তেওঁ কয়, “কৃষ্ণজীয়ে অৰ্জুনক কৈছে যে ঈশ্বৰৰ উপাসনা কৰাৰ সময়ত কেৱল থিয় হৈ নহয়, সমগ্ৰ শৰীৰেৰে উপাসনা কৰিব লাগে।”
ৰাম আৰু কৃষ্ণক লৈ কৰা মন্তব্যক কেন্দ্ৰ কৰি সমালোচনা
একেই ভাষণত আনছাৰীয়ে এই দাবীও কৰে যে যদি হিন্দুসকলে নিজৰ ধৰ্মগ্ৰন্থ মনোযোগেৰে অধ্যয়ন কৰে, তেন্তে তেওঁলোকৰ ইছলামৰ প্ৰতি আকৰ্ষণ জন্মিব। তেওঁ কয়, “ইছলাম কেৱল মুছলমানসকলৰ ধৰ্ম নহয়; ই তেওঁলোকৰো ধৰ্ম। একেই শিক্ষাই ৰামচন্দ্ৰজী আৰু কৃষ্ণজীয়েও দিছিল।” এই মন্তব্যৰ পিছত একাধিক হিন্দু সংগঠনে অভিযোগ কৰে যে আনছাৰীয়ে হিন্দু ধৰ্মগ্ৰন্থৰ ভুল ব্যাখ্যা আগবঢ়াই ধৰ্মীয় অনুভূতিত আঘাত হানিছে।
ভিডিঅ’টো সামাজিক মাধ্যমত ব্যাপকভাৱে প্ৰচাৰিত হোৱাৰ পিছত বিভিন্ন হিন্দু সংগঠনৰ সদস্যসকলে মৌলানা জাৰজিছ আনছাৰীক গ্ৰেপ্তাৰ কৰাৰ দাবী জনাইছে। তেওঁলোকৰ অভিযোগ, এনে মন্তব্যই ধৰ্মীয় অনুভূতিত আঘাত কৰাৰ লগতে সাম্প্ৰদায়িক সম্প্ৰীতি বিঘ্নিত কৰিব পাৰে।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
