গুলশ্যন গ্ৰোভাৰৰ সৈতে চুম্বনৰ সেই বিতৰ্কিত দৃশ্যক লৈ কেটৰিনাৰ মন্তব্য কি?

আজি বলিউডৰ অন্যতম জনপ্ৰিয় অভিনেত্ৰী কেটৰিনা কাঈফৰ জন্মদিন। অভিনেত্ৰীগৰাকীয়ে আজি ৪৩বছৰত ভৰি দিলে। কেটৰিনা কাঈফে নিজৰ কেৰিয়াৰত অসংখ্য সফল ছবি উপহাৰ দিছে। কিন্তু আজিও তেওঁৰ অভিনয় জীৱনৰ আৰম্ভণিতে কৰা এটা দৃশ্য সময়ে সময়ে সামাজিক মাধ্যমত পুনৰ চৰ্চালৈ আহে। সেই দৃশ্যটো হৈছে ২০০৩ চনত মুক্তি পোৱা ‘বুম’ ছবিত অভিনেতা গুলশ্যন গ্ৰোভাৰৰ সৈতে থকা বিতৰ্কিত চুম্বনৰ দৃশ্য।
ছবিখন মুক্তিৰ সময়ত কেটৰিনা কাঈফ বলিউডত সম্পূৰ্ণ নতুন আছিল। সেই সময়ত তেওঁ মডেলিঙৰ পৰা চলচ্চিত্ৰ জগতত খোজ পেলাইছিলহে মাত্ৰ। ছবিখনত বহু সাহসী দৃশ্যৰ লগতে গুলশ্যন গ্ৰোভাৰৰ সৈতে তেওঁৰ দীৰ্ঘ চুম্বনৰ দৃশ্যেও ব্যাপক বিতৰ্কৰ সৃষ্টি কৰিছিল। যদিও ছবিখনে বক্স অফিচত সফলতা লাভ কৰিব নোৱাৰিলে, এই দৃশ্যটো এতিয়াও ছ’চিয়েল মিডিয়াত চৰ্চিত হৈ আছে।

নতুন হোৱাৰ বাবে ল’ব পৰা নাছিল সিদ্ধান্ত

বিভিন্ন সাক্ষাৎকাৰত কেটৰিনা কাঈফে ‘বুম’ ছবিখনৰ অভিজ্ঞতাৰ বিষয়ে খোলাখুলিভাৱে মন্তব্য কৰিছে। তেওঁৰ ভাষ্য অনুসৰি, সেই সময়ত তেওঁ চলচ্চিত্ৰ উদ্যোগত একেবাৰে নতুন আছিল আৰু বহু বিষয়ৰ বিষয়ে পৰ্যাপ্ত অভিজ্ঞতা নাছিল। কেটৰিনাই কয় যে কেৰিয়াৰৰ আৰম্ভণিতে তেওঁ বহু সিদ্ধান্ত সম্পূৰ্ণৰূপে বুজি উঠা নাছিল। পিছলৈ অভিজ্ঞতা লাভ কৰাৰ পিছত তেওঁ উপলব্ধি কৰে যে আজিৰ জ্ঞান আৰু অভিজ্ঞতা যদি তেতিয়া থাকিলেহেঁতেন, তেন্তে হয়তো কিছুমান দৃশ্য কৰাৰ সিদ্ধান্ত তেওঁ নল’লেহেঁতেন। অৱশ্যে তেওঁ কেতিয়াও দৃশ্যটো জোৰ-জবৰদস্তি কৰোৱা হৈছিল বুলি অভিযোগ কৰা নাই, তথাপিও ইয়াক তেওঁ নিজৰ জীৱনৰ এক শিক্ষণীয় অভিজ্ঞতা বুলি উল্লেখ কৰিছে।

বিতৰ্কিত দৃশ্যটোৰ সন্দৰ্ভত কি কয় গুলশ্যন গ্ৰোভাৰে?

আনহাতে, অভিনেতা গুলশ্যন গ্ৰোভাৰে একাধিক সাক্ষাৎকাৰত এই বিতৰ্কৰ উত্তৰ দি কৈছে যে চুম্বনৰ দৃশ্যটো সম্পূৰ্ণ পেছাদাৰী নিয়ম অনুসৰি শ্বুট কৰা হৈছিল। তেওঁৰ মতে, কেটৰিনা সেই সময়ত নতুন হোৱাৰ বাবে দৃশ্যগ্ৰহণৰ আগতে পৰিচালক আৰু সমগ্ৰ ইউনিটে দুয়োজন অভিনেতাৰ সৈতে বিশদ আলোচনা কৰিছিল। শ্বুটিঙৰ সময়ত কেটৰিনাই যাতে কোনো ধৰণৰ অস্বস্তি অনুভৱ নকৰে, সেই বিষয়টোও বিশেষভাৱে লক্ষ্য ৰখা হৈছিল। গুলশ্যনৰ দাবী, দৃশ্যটো দুয়োপক্ষৰ সম্পূৰ্ণ সন্মতিৰে আৰু পেছাদাৰী পৰিৱেশত গ্ৰহণ কৰা হৈছিল।

বিতৰ্কক পিছ পেলাই গঢ়ি তুলিছে সফল কেৰিয়াৰ

‘বুম’ ছবিৰ পিছত কেটৰিনা কাঈফে ধাৰাবাহিকভাৱে বহু সফল ছবিত অভিনয় কৰি বলিউডৰ আগশাৰীৰ অভিনেত্ৰী হিচাপে নিজকে প্ৰতিষ্ঠা কৰে। মেইনে প্যাৰ কিঁউ কিয়া, নমস্তে লণ্ডন, এক থা টাইগাৰ, টাইগাৰ জিন্দা হ্যায়, জিন্দেগী না মিলেগী দোবাৰা, টাইগাৰ ৩ আদি ছবিয়ে তেওঁৰ কেৰিয়াৰক এক নতুন উচ্চতালৈ লৈ যায়।

এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ