সমগ্ৰ বিশ্বৰ কোটি কোটি ফুটবল অনুৰাগীৰ অপেক্ষাৰ অন্ত পৰিবলৈ মাজত আৰু মাথোঁ দুটা দিন। ২০ জুলাইত বিশ্ব ফুটবলে লাভ কৰিব নতুন বিশ্ব চেম্পিয়ন। নিউ জাৰ্ছীত অনুষ্ঠিত হ’বলগীয়া মহাৰণত ডিফেণ্ডিং চেম্পিয়ন আৰ্জেণ্টিনাৰ সন্মুখীন হ’ব ২০১০ চনৰ বিশ্ব চেম্পিয়ন স্পেইন। এফালে বিশ্ব ফুটবলৰ জীৱন্ত কিংবদন্তি লিঅ’নেল মেছি, আনফালে নতুন প্ৰজন্মৰ উদ্ভাসিত তাৰকা লামিনে য়ামাল। এই মহাৰণৰ আগমুহূৰ্ততে সামাজিক মাধ্যমত জুইৰ দৰে বিয়পি পৰিছে ১৯ বছৰ পুৰণি এখন বিশেষ ফটো।
এই ফটোখনৰ বিশেষত্বই ফুটবল বিশ্বক আবেগিক কৰি তুলিছে। সকলোৱে সমস্বৰে কৈছে-এই কাকতলীয়া সংযোগ কেনেকৈ সম্ভৱ? ফটোখনত দেখা গৈছে ২০ বছৰীয়া লিঅ’নেল মেছিয়ে এটি পাঁচমহীয়া শিশুক বাথটাবত গা ধুৱাই আছে। সেই সময়ত হয়তো কোনেও কল্পনাও কৰা নাছিল, মেছিৰ কোলাত থকা সেই কণমানি শিশুটোৱেই এদিন বিশ্ব ফুটবলৰ অন্যতম উদ্ভাসিত তাৰকা হিচাপে আত্মপ্ৰকাশ কৰিব আৰু ফুটবলৰ সৰ্বশ্ৰেষ্ঠ মেচখনত সাম্প্ৰতিক সময়ৰ সৰ্বশ্ৰেষ্ঠ ফুটবলৰ যাদুকৰ মেছিৰ বিৰুদ্ধে যুঁজ দিব। বাথটাবৰ সেই শিশুটোৱেই এতিয়া স্পেইনৰ ৰাইট উইংগাৰ লামিনে য়ামাল।
এটা বিশেষ কাৰ্যসূচীৰ বাবে তোলা হৈছিল ফটোখন
সম্প্ৰতি ভাইৰেল হোৱা এই ফটোখন ২০০৭ চনত তোলা হৈছিল। তেতিয়া য়ামালৰ বয়স আছিল মাত্ৰ পাঁচ মাহ আৰু মেছিৰ বয়স ২০ বছৰ। ২০২৪ চনৰ ইউৰো কাপৰ সময়ত য়ামালৰ পিতৃয়ে ছবিখন ইনষ্টাগ্ৰামত শ্বেয়াৰ কৰাৰ পিছতেই ই বিশ্বজুৰি আলোচনাৰ কেন্দ্ৰবিন্দু হৈ পৰিছিল। এতিয়া বিশ্বকাপ ফাইনেলৰ আগমুহূৰ্তত সেই ঐতিহাসিক মুহূৰ্তটো যেন পুনৰ জীৱন্ত হৈ পৰিছে।
ছবিখনৰ আঁৰৰ কাহিনী
এই যুগমীয়া মুহূৰ্তটো কেমেৰাত বন্দী কৰিছিল এছ’চিয়েটেড প্ৰেছৰ ফ্ৰীলান্স ফটোগ্ৰাফাৰ জোৱান মনফোৰ্টে। ছবিখন আছিল ইউনিচেফ আৰু স্থানীয় ক্ৰীড়া দৈনিক ডায়াৰিঅ’ স্প’ৰ্টৰ যৌথ উদ্যোগত আয়োজিত এক বিশেষ চেৰিটি ফটোশ্বুটৰ অংশ। সেই কাৰ্যসূচীৰ বাবে স্থানীয় পৰিয়ালসমূহৰ মাজত ড্ৰ অনুষ্ঠিত কৰা হৈছিল। সৌভাগ্যক্ৰমে লামিনে য়ামালৰ পৰিয়াল সেই ড্ৰত বিজয়ী হৈছিল আৰু বাৰ্চিলোনাৰ খেলুৱৈসকলৰ সৈতে ফটোশ্বুটৰ সুযোগ লাভ কৰিছিল। সেই সুযোগতেই জন্ম হৈছিল আজিৰ এই ঐতিহাসিক ছবিখনৰ। এই ঐতিহাসিক ফটোখনৰ ফটোগ্ৰাফাৰ জোৱান মনফোৰ্টে এক সাক্ষাৎকাৰত সদৰী কৰিছিল এই কথা
মেছিৰ আৰ্জেণ্টিনাৰ বিৰুদ্ধে স্পেইনৰ প্ৰধান অস্ত্ৰ য়ামাল
বৰ্তমানৰ স্পেইনত বহু বিশ্বমানৰ তাৰকা খেলুৱৈ থাকিলেও ১৯ বছৰীয়া লামিনে য়ামালেই দলটোৰ আটাইতকৈ ডাঙৰ ভৰসা, পৰিসংখ্যাই তাকেই কয়। ইউৰো কাপ আৰু বিশ্বকাপ মিলাই য়ামালে যিমানখন মেচত স্পেইনৰ ষ্টাৰ্টিং ইলেভেনত স্থান লাভ কৰিছে, সেই সকলো মেচতেই স্পেইনে জয়লাভ কৰিছে। সেয়েহে বিশ্বকাপৰ ফাইনেলতো স্পেইনৰ কোটি সমৰ্থকৰ আশা-আকাংক্ষাৰ কেন্দ্ৰবিন্দু হৈ পৰিছে লামিনে য়ামাল।
এয়া যেন নাটকৰ কাহিনী
১৯ বছৰ আগতে মেছিয়ে কোলাত লৈ যি অখ্যাত শিশুক গা ধুৱাইছিল সেই শিশুটোৱেই এতিয়া ফুটবলৰ শ্ৰেষ্ঠতম মেচখনত ফুটবলৰ যাদুকৰ মেছিৰ বিৰুদ্ধে এঘড়ী যুঁজিবলৈ সাজু হৈছে। ২০ জুলাইত আমেৰিকাৰ নিউ জাৰ্ছী ষ্টেডিয়ামে সাক্ষী হব এই বিৰল পৰিঘটনাৰ। এফালে ফুটবলৰ সৰ্বকালৰ অন্যতম সৰ্বশ্ৰেষ্ঠ খেলুৱৈ মেছি আৰু আনফালে তেৱেঁৰেই সান্নিধ্য লাভ কৰা এটি শিশু যি এতিয়া ফুটবল বিশ্বৰ এজন উদ্ভাসিত তাৰকা য়ামাল।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
