অসম লাইভ ২৪ঃ পূৰ্বৰ তুলনাত সংক্ৰমণৰ হাৰ সৰ্বাধিক হ’লেও তুলনামূলকভাৱে মৃত্যুৰ সংখ্যা কম হৈছে ক’ৰোনাৰ দ্বিতীয় ঢৌত। দেশৰ বিভিন্ন প্ৰান্তৰ চিকিৎসকসকলৰ এক সমীক্ষাত প্ৰকাশ পাইছে এই তথ্য। চিকিৎসকসকলৰ মতে, ক’ৰোনাৰ দ্বিতীয় ঢৌত আক্ৰান্তৰ ৯৯ শতাংশ লোকেই সু্স্থ হৈ উঠিছে। কোভিড ৰোগীৰ মৃত্যুৰ হাৰ ১ শতাংশতকৈ সামান্য বেছি। দেশজুৰি সৃষ্টি হোৱা কোভিডৰ সংকটৰ সময়ছোৱাত এই আশাব্যঞ্জক খবৰে সাময়িকভাৱে সকাহ দিছে দেশবাসীক। কোভিডৰ দ্বিতীয় ঢৌৰ সংক্ৰমণত বেছি আতংকিত কৰিছে ভাইৰাছবিধৰ নতুন লক্ষণে। বিপৰীতে দ্ৰুত সংক্ৰমণৰ সংখ্যা বৃদ্ধি হ’লেও কোভিডমুক্ত হোৱা ব্যক্তিৰ সংখ্যা ৯৮.৮৮ শতাংশলৈ বৃদ্ধি পাইছে। এপ্ৰিলৰ শেষৰফালে দেশত আক্ৰান্তৰ সংখ্যা বাঢ়িলেও কোভিডৰ ৩ টা হটস্পট কিছু নিয়ন্ত্ৰণলৈ আহিছে। এই ৩টা স্থান হৈছে মহাৰাষ্ট্ৰ, ছত্তীশগড় আৰু দিল্লী। বিগত ২৪ ঘণ্টাত ৩ লক্ষাধিক লোক আক্ৰান্ত হৈছে কোভিডত। কেন্দ্ৰীয় স্বাস্থ্য মন্ত্ৰালয়ৰ তথ্য অনুসৰি, সোমবাৰে দেশত নতুনকৈ কোভিডত আক্ৰান্ত হৈছে ৩ লাখ ৫২ হাজাৰ ৯৯১গৰাকী। বিগত ২৪ ঘণ্টাত দেশত মৃত্যু হৈছে ২,৮১২ গৰাকী লোক। সামগ্ৰিকভাৱে দেশত ক’ৰোনা আক্ৰান্তৰ সংখ্যা ১ কোটি ৭৩ লাখলৈ বৃদ্ধি পালেও মৃত্যুৰ সংখ্যা প্ৰায় ১ লাখ ৯৫ হাজাৰ। অৰ্থাৎ মৃত্যুৰ হাৰ ১.১২ শতাংশ।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
